Manifesto no día escolar da paz e a non violencia

1. MANIFESTO NO DÍA ESCOLAR DA PAZ E A NON VIOLENCIA
Desde o noso centro reivindicamos fronte ao aumento da conflitividade mundial, a necesidade de
promover procesos educativos que ensinen desde e para a non violencia e que constrúan cidadanía
global. Cremos que os centros educativos, onde a infancia comeza a súa socialización e adquire hábitos
que a acompañarán toda a vida, teñen que converterse en instrumentos de diálogo e entendemento.
Cremos que a educación debe ser a única arma e a máis poderosa que pode usarse en contra da
violencia e a favor da paz.
Para iso é necesario, que como hoxe, todos esteamos de acordo en abrazar a paz. A paz duradeira é
requisito para o exercicio de todos os dereitos e deberes humanos. Non a paz do silencio, dos homes e
mulleres silenciosos, silenciadas. A paz da liberdade, da alegría, da igualdade, da solidariedade, onde
todos os cidadáns contan, conviven e comparten.
Non basta coa denuncia. É tempo de acción. Non basta con coñecer, escandalizados, o número de nenos
explotados, o número de refuxiados ou de famentos. Trátase de reaccionar, todos e cada un. Non hai
que contemplar soamente o que fan os gobernos. Temos que desprendernos dunha parte “do noso". Hai
que dar. Hai que darse. Esta debe ser a nosa utopía: poñer os Dereitos Humanos en práctica, vivilos e
reavivalos con cada amencer. Ningunha nación, institución ou persoa debe sentirse autorizada a posuír e
representar os dereitos humanos nin menos aínda a outorgar credenciais aos demais. Os dereitos
humanos non se teñen nin se ofrecen, senón que se conquistan e merécense cada día.
Os nenos de Ares queremos alzar hoxe a nosa voz polos nenos que non teñen voz e sofren agora a
traxedia da guerra.
Saudámosvos, nenos de Siria, e sentimos a vosa aflición.
Saudámosvos nenos de Afganistán e de Paquistán e facemos noso a vosa dor.
Saudámosvos nenos de Somalia, Congo e Sudán e compartimos a vosa fame de xustiza.
Saudámosvos nenos de Palestina e Israel, México, Nixeria, Turquía, Líbano, Iraq, Libia, Ucraína, Exipto,
Xordania,Yemen.., a todos e cada un dos nenos do mundo que padecedes amargamente as peores
consecuencias do despropósito, e comprometémonos a loitar con todos os medios pacíficos ao noso
alcance para que o voso exemplo sirva para erradicar para sempre e dunha vez por todas, o horror
terrible das guerras.
Abrazar a paz é un reto alcanzable se o afrontamos xuntos, por iso todos os que hoxe estamos aquí imos
levantar e unir as nosas voces para cantar e dicirlles aos que mandan que chegou a hora da paz.
A comunidade educativa do CPI As Mirandas
queremos facer público ,neste acto, o noso
compromiso coa paz.