1. Conference kal ve thu
-Ellis H.Pachuau
“Kha, mitdel chem vaiin kan pik ve a ni e, a fahrah viau mai thei,” tiin Ruata Zadeng chuan a
article chungchánga a insit thu Phuaibuang-ho tih dàn takin a bekdawm (mobile) hmangin min rawn hrilh a.
VENGLAI Chanchin bu (2008)-a article of the year-a ka lo hual a ni a; a rawn thlawh chhuak ropui
nameuh mai le. ‘Venglai Dara’ tih mai pawh a phû hliah hliahin ka hria!
Khatia, a duh lam hawi záwng záwnga a kam huahna a pik tâk puat puatah chuan, kei, Záwngin khaw
tui liak meuh pawh min pik khum ta bawrh bawrh kha a ni a! Lo Sepui ruah tuar ve tlawk tlawk rîkngawt chu kei
sipai rilru lo chhuak ta hian a thei lo a ni ber mai a. Ka han chhim thal bekang puah ve phawng phawng ang a, ár
chuk tui lo khawp chuan kan inchhuah êm lo vang chu.
Ruata Zadeng angin tlangval hnu-a K|P Gen. Conf. kal nawm thu sawi kur dup tùr ka hre ve hran
lo va, pawn thuah tel meuha vawi khat ka chhuahna ve chu thuziak hmanga han umzui hrãm chu ka duh ve
bawk si a; Tu emaw anga 90’s chho bawr vela senior lam inan tawh hnu-a Conf. lo kal daih tawh ka ni lo
bawk nèn. Vawi khat kal naa vawi khat tawnhriat, mita hmuh leh benga hriatte chu thlasik mau puahpui
phawng phawng ila a ni mai alãwm ka ti ta deuh.
Kan kal hma hawt aangin Zirlai Hruaitu ( Pu Mamawia, a fanu Sikul kal a hruai hìn) chuan
Conference-na-ah chuan chaw eikhama e hìn tán chaw dawh hma a hat thu te, chu chu chaw hel leh
hmeh ningnawi deuh pumpelhna a nih thu báng lovin min hrilh tawh a; thinlung phêka ziak chungin vawkpui
koham ang bawrh bawrha nawr chu a mawi dáwn lo tih ka ngaihtuah nghal a.
Branch Palaite angin Physician Sample pai tùr nei ve ta lo chu thlavéng atán mum uk leh nachhâwkna
chu ka han paipawn ve ram a. Kan rama ruihtheihthil khap loh awmchhun motor ruih hlauvin kal hma zan
aangin damdawi ka han ei an nghal pang a! Ka vawthlep bun tùr leh ha nawhna tùr nèn lam ipte tepéngah
azan azanin ka han thun lâwk vek mai a.
A tûkah chuanna tùr Bus kan han pan a, henkhatin mutbu leh ipte ilo an han rem fel malh malh a;
henkhatin motor-ah Branch Flag an han âwn bet chawt chawt bawk a. Thiltihna apiang maia nghah ngai
ve ziah hìn member henkhatte hun tiam pelh tawha lo thleng ve hman ta lo thlîrin kan ring kan han fan ãk
ãk bawk a.
Bus-ah kan chuang kim hep hawp tawh a, hutna ruak awm reng chunga Bus Conductor emaw
inti tlat, kawngka bula dingtlat chi hi hetiang nikhua hian kan awm hin a; tun umah pawh hian kan bang
chuang lo.
Branch hruaitu ningkhãwng hre deuhin kal tùrte min han vai liam a; a nacháng hria, hun nei remchang
ve loten Bekdawm hmanga min han thlahte chuan rilru an tithlamuang thlawt e. |awngaia min han thlah liam
hnu phei chuan ngaih a ngam takzet tawh.
Bus enkawltuin Bus a han tinung dur dur a, a che hrut a, flag phe hlawp hlawpin kan han tlan liam
ta vung vung mai chu a nia le (h). Kei ta pek, Zaipáwl-ah tih loh chuan mi hnunga awm nuam ti lo mi ka ni
a; Bus khalhtu hnênah chuan, “I motor aia tê chauh lo chuan tu motor mahin min lehpel tùr a ni lo,” ka’n ti
nghal ringawt pek a. Flag tar heuh heuh, thlen tum ram thuhmun heuh heuh chu kan han inzui kawi nguai
nguai mai a, ral a khat aanga hmaa mite chuanna bus inher liam tùr han hmuh pawh a lehlam zawng tak
chuan a lunglèn thlâk khawp mai.
Land of Iskut, Ruata Zadeng-te naupan laia tual an chaina, an sephung laihna hmun leh ram, hnap
dawk pir per, chalsam tla zên a kawrhma suiha a ngam loh a tawn chánga a ah haw-na hin pawh kár
lovah chuan kan thleng mai rêng a. Chû’ng hun laite chuan hetiang chen chen hian tei ruk ruk khawpin a
tlangval rei ang tih a ngaihtuah bîk ka ring lo. Khaw hlui tlawh rau rau, a lo inthlauh theih dáwn mang e ka
ti rilru a. Bag aka vai liamtu an awm a nih chuan, chû’ng mite chu a hring a hrana hianzaho pawha lâwmthu
sawi paha chibai tùra baklénga kal nal nal chi a ni ang. (Chhunzawm leh a ni ang)
Unpublished