1. Elbira Zipitria
ikastetxea
Txillardegi, 14
20108 OBABA
Tel.: 993 21 44 04
Faxa: 993 31 14 64
Esperanza Lasa Agirre
X zonaldeko ikuskaria
Andre hori:
14/15 ikasturte honetan, Scratch programa lantzen hasi gara DBHko 1. mailako Teknologia
ikasgaiaren barruan, 2013. urtean Lehen Hezkuntzan abian jarri genuen Zientzia Proiektuari
jarraipena emateko.
Esperientzia oso positiboa izan denez, datorren ikasturtean jarraitzeko baimena eskatu dugu
Hezkuntza, Hizkuntza Politika eta Kultura Sailean, proiektua zegokion deialdira aurkeztuta. Proiektu
horretan, programarekin jarraitzeko ez ezik, indartzeko ere eskatzen dugu, alderdi hauek kontuan
hartuta: hezkuntza teknologikoan, hezkuntza robotika sustatu (oinarrizko mailan); eskola baratza
abian jarri; irakasleentzako aurrez aurreko prestakuntza jarduerak egin; eta “Zientzia Hezkuntza”
programan parte hartu.
Irakaskuntzan aritzen garen guztiok dakigunez, edozein proiektu era egokian aurrera eramateko,
ardatza izaten da irakaslearen papera, beste faktore batzuen garrantzia ukatu gabe. Gaur egun,
nahikotzat jo dezakegu geure Lehen Hezkuntzako irakasleen finkotasun maila. Gauza bera ezin da
esan, ordea, Bigarren Hezkuntzari dagokionez: hizkuntza arloan (euskara, ingelesa eta gaztelania)
finkotasun erabatekoa lortu badugu ere, zientzia arloan ez dago ezta irakasle finko bat ere; Hamaika
Esku programari esker, berriz, lortu da irakasle bat hiru urterako Natura arloan aritzeko, baina horrek
ezin du ziurtatu proiektu osoa garatzea. Beraz, ezinbestekotzat jotzen dugu Teknologia irakaslearen
konpromisoa proiektua hurrengo hiru urteetan egoki garatzeko.
Aurten gertatu dena erraz gerta daiteke berriro: plaza hartu zuen irakasleak 1. ebaluazioan baja hartu,
eta haren ordez etorritako irakasleak egokitzapen epea behar izan zuen ikasleak eta ikastetxea
ezagutzeko, eta traba handiak izan ditu beste norbaiten lana garatzeko.
Horregatik guztiagatik, eskatzen dizugu bitartekari izan zaitezela gurerako teknologia irakasle bat
lortzeko, gutxienez ikastetxean hiru urtez aritzeko konpromisoa hartuko duena, ikastetxeak finkatu
nahi duen Hezkuntza Robotika programa aurrera eramateko. DBHko 1. eta 2. mailetan oinarrizko
robotika landu beharko luke, Scratch programa erabilita, bai eta robotika aurreratua ezarri ere
progresiboki (2016/17 eta 2017/18 ikasturteetan) DBHko 3. eta 4. mailetan: programazio lengoaia eta
dagokion plaka erabili, bai eta 3Dko diseinuaren edo inprimatze elementuen bidez sormena garatzeko
proiektuak abian jarri ere.
Une honetan ezin dugu esan zein irakaslek bete ditzakeen baldintza horiek, baina, gure ustez,
Berritzeguneko Maria Sarasua Mujika aholkularia pertsona egokia da eskatutako perfileko irakaslea
bilatzeko.
Zure berrien zain geratzen gara. Adeitasunez, agur.
Obaban, 2015eko maiatzaren 21ean
Izpta.: Maite Etxebarria
