1. PURA PASSION, AUTENTICA EMOZION
L’è un ameno paesin,
L’è piazzò su, su quasi in scima al canton Tisin
Ambrì, a dila giusta, l’è de Quint na frazion
Quattro o cinq cà, un poo de stall e na stazion
Da sempro, d’invern a ghé poc da faa
Tanta nev da spalaa, met sota i tapèll o patinaa
Patina inchée, patina doman
ghè stacc gent che pensò da fa su na squadra de hockey a la man
Isci, tant da giughetaa
Staa in compagnia e divertis senza esageraa
Giuga inchée, giuga doman
Ghè stacc gent che pensò da iscriv la squadra al campionato
E ia semnò el prim gran

2. Vari an ghè pasò ormai e Ambrì el gà quattro cà, un poo de stall e na stazion
Pooc centinaia de anim la so popolazion
Ma a ghè di siir che i stradin i sa anima e i risctorant i sa riempis
A riva gent da tut el canton e anca foresct
La so fama la ga miga confin e tucc i diferenz i scomparis
Giovin e anzian, ticines e uran
Migliaia de person streghée da la stesa passion
Portée li dal chér in cerca de emozion da condiviid
E a incitaa i so campion
Chi che ama i soffris, l’è isci
I tifosi de l’Ambri ial sa e i capis
El chér el bat, e ogni tant el sa ferma, par la scquadra
I canti e i cori de la curva sud iagh da voos ai sentiment
La gioia quant sa vinc, la disperazion quant sa pèrt
Coreografì da vedée, da gusctaa par el piasée del moment

3. Con l’Ambri de regola iè tribulazion
Ma manca miga i sodiscfazion
Quant iè pooc iè moltiplichée par un milion
I at ripaga dai delusion
La Gioventù Biancoblù l’invia via i canti
Sa vinch o sa perd el ga miga importanza
I vosa fin a perd el fiaat e i tira drée anca i altri
Giugadoo o spetadoo, se na volta su in val i vegn
Emozion indimenticabil i porta a cà
La Valascia la lasa sempro el segn
El peer de galina quant sa sent «La Montanara»
L’è indesccrivibil, sa dev vivel, sa dev cantala
L’è na feed, l’è un credo, l’è soferenza,
L’è na droga, l’è l’anima, l’è na lota
L’è gioia, l’è unic, l’è par sempro, l’è l’Ambri Piotta!
GIL©2014 (l’an di play-off)