2. ZER DA?
Jaizkibel Gipuzkoako mendi bat da, Oarsoaldea eta Bidaso beherea eskualdeen
artean kokatua. Pasai Donibane, Lezo eta Hondarribiko udalerriek banatzen dituzte
mendi horren lurrak.
Jaizkibel kate tertziarioko mendi eraketa bat da. 547 m garai da, eta 2.423,6 ha
luze-zabal. Bere muinorik altuena Allerru du izena.
Jaizkibelen zatirik ederrena, seguraski itsas ertza da, harearriak oso itxura berria
hartzen baitu olatuek astintzen duten lekuetan. Bere ganador luzean hainbat gune
interesgarri aurki dezakegu: Pasaia aldetik igotzen den gandorrean karlistek
eraikitako hiru dorreak eta Hondarribi aldekoan Guadalupe ermita eta gotorlekua.
Pasaia aldean, Puntak izeneko itsasmuturrean eskalada eremu bat dago, nahiko
berezia, harearrizko hormetan gora, txapaz josia eta igoerabide ugarirekin.
3. APARTEKO NATURGUNEA
Jaizkibel mendia Gipuzkoako eta euskal kostaldeko natur gune garrantzitsuenetarikoa
da, Natura 2000 sarean barneratuta dagoena eta erkidego mailako katalogo eta hainbat
babes forma dituela ere.
15 kilometroko itsaertze hau EAEko kostalderik zainduenetarikoa da, paisai ikusgarriez
osatua, besteak beste itsaslabar itzelak, ibarrak, itsasgaineko zelaiak eta formazio
geologiko bitxiak. Bestalde, landare eta animali espezie anitzek dute Jaizkibel
babeslekua, hauetako asko Europa mailan interes handikoak edota espezie
endemikoak, Armeria euskadiensis bezala, itsasertz honetan soilik bizi den landarea.
Itsaslabarren eskuraezintasunari esker itsas hegazti kolonia garrantzitzuak finkatu ahal
izan dira, baita hegazti harrapari eta sarraskijaleen habiak ere, hauetako asko mehatxuak
daudenak. Jaizkibeleko itsas hondo aberatsetan eta marearteko inguruneetan, Euskal
kostaldeko Gelidium algaren populazio garrantzitsuena aurkitu daiteke, eta askotan
itsasertz honetan elikatzen diren izurde eta beste zetazeoak ikus daitezke.
Itsas eremu honen aberastasunak eta bere babes beharra Euskadiko Biologoen Elkargo
Ofizialak egindako proposamenean adierazten dira. Txosten honetan Lapurdiko mugan
bukatzen den itsasoko Natura 2000 Sareraino luzatuko den korridore ekologiko bat
eratzea proposatzen da.