1. A CANDELORIA
a festa da luz e día do amor nos antigos costumes galegos
A Candeloria é unha festa relixiosa que se
celebra o día 2 de febreiro. Consiste na
bendición das candeas que despois serían
utilizadas na celebración da Semana Santa
(máis exactamente o xoves santo).
Pero en Galicia ademais era considerada a
data coma un preludio da chegada da
primavera e con ela o renacer da natureza.
Dicíase que era a época do casamento dos paxaros e para os mariñeiros
tamén era o comezo da navegación despois da longa espera no período
invernal no cal a maior parte das embarcacións non saían dos portos.
Como sucede con outras moitas celebracións cristiáns, a festividade xurdiu para
suplir (no ano 492 o Papa Gelasio fixou o 2 de febreiro como a festa da
Purificación da Virxe María) outra festa pagán (que celebraban nestas datas
os celtas e os romanos).
Os celtas celebraban o primeiro día do mes de febreiro a festa coñecida como
“Brigantia”. O nome deriva da deusa celta Brigid que representaba á nova lúa, á
primavera e era a época das purificacións e do lume sagrado e Brigid era
honrada poñendo unha candea en cada habitación ou fiestra da casa.
Tamén os romanos nestas datas facían unha procesión con candeas acesas de
noite en honor de Proserpina, deusa relacionada co nacemento das sementes e
da primavera.
En Galicia, ademais, a Candeloria era unha festividade que marcaba un tempo:
a metade do inverno, tal e como reflicte o coñecido refrán:
“Cando a Candeloria chora, metade do inverno vai fóra. Que chore, que chore,
que deixe de chorar, a metade do inverno está aínda por pasar”.
Neste sentido, a festividade era tamén considerada o preludio da chegada da
primavera e do renacer a natureza; dicíase que era a época na que os paxaros
casaban nas árbores. É a festa do AMOR, do sentimento, da atracción física
e tamén o amor a familia, os amigos, os animais, ou a terra de nacencia.
EDLG CEIP BERGANTIÑOS