1. Landabengo VW eta sindikatuak
erregulazioa negoziatzen hasiko dira
Multinazionalak zortzi egun itxi nahi du fabrika, motorrak falta zaizkio-eta. Sindikatuek
ahalik eta kalterik txikiena egin nahi diete langileei
Volkswagenen lantegia, Iruñeko Landaben poligonoan, artxiboko irudian. VILLAR
LOPEZ / EFE
2018ko abuztuak 22
0
Diesel motorren salmentaren beherakadaren ondorioak iritsi dira Euskal Herriko lantegi
handienera ere, Landabengo Volkswagenera. Multinazionalaren zuzendaritzak fabrika
zortzi egunez ixteko asmoa du, ez baitu nahiko motorrik Poloetan muntatzeko. CO2
isurketak zorrotzago neurtzeko ezartzear dagoen WLTP sistemak ere eragin du eskasia.
Landaben ixteko iragarpenak harri eta zur utzi ditu sindikatuak. Gaur dira hastekoak
langileak aldi baterako erregulazioan uzteko negoziazioak, edo, beranduenik, bihar.
Sindikatuek negoziazio taldea aukeratu zuten atzo. Hamahiru lagun dira,
zuzendaritzarekin lan hitzarmenaren berritzea negoziatzen ari diren hamahiruak, hain
zuzen ere. Talde negoziatzailea osatzearen alde egin zuten UGTk (11 kide enpresa
batzordean), CCOOk (zazpi), ELAk (bat) eta CGCk (bat), eta abstenitu egin ziren LAB
(lau) eta CGT (bi). Azken bi sindikatu horiek LABen proposamenaren alde bozkatu
zuten, zuzendaritzari negoziatzaileen izenik eman behar ez ziotela zioenaren alde.
Sindikatuek eta enpresak aste eta erdi izango dute gehienez erregulazio dosierra
negoziatzeko, VWek irailaren 3rako jarri nahi baitu indarrean. Aste horretan, lantegia
bost egunez egongo litzateke itxita, eta langabezian geratuko lirateke Landabengo 4.600
langileak. Fabrika zortzi egunez itxi nahi dute guztira, baina zuzendaritzak negoziazioan
azaldu beharko luke gainontzeko hiru egunak zeintzuk izango liratekeen. Sindikatuek,
bestalde, argi dute zer negoziatu nahi duten: ahalik eta galera ekonomikorik txikiena
jasatea fabrika itxita dagoen egunetan.
2. Soldata osagarriak
«Langileak ez luke arazoa ordaindu beharko, baina badakigu enpresarekin negoziatzen
bada langileek kalte ekonomiko bat izango dutela. Kalte hori txikitzea da helburua»,
adierazi zuen atzo Enrique Duque CCOOko ordezkariak. Langileak zortzi egunez
langabeziara joanez gero, gehien-gehienek izango dute langabezia saria jasotzeko
aukera, baina horrek ez ditu kontuan hartzen langileek jasotzen dituzten osagarriak,
antzinatasuna, aparteko sarien ordaina eta halakoak. «Eskatuko dugu enpresak bere
kargu hartzeko osagarrien %100».
Sindikatuek aho batez salatu dute enpresaren asmoa, eta egoerara gaizki egokitzea
egotzi diote. Izan ere, jakina zen aspaldi diesel motordun autoen salmenta jaisten ari
zela. Halaber, ezaguna zen irailaren 1ean indarrean jarriko zela CO2 isurketak
kontrolatzeko sistema berria, eta ordurako motor berriek homologatuta egon behar
zutela. WLTP sistemak normal neurtzen du atmosferara isurtzen diren CO2 partikulak,
eta batez beste %20 gehiago zenbatzea ekarriko du. Matrikulazio zerga kutsaduraren
araberakoa denez, auto gehiagok pagatuko dute zerga.
Dieselari dagokionez, motor hori duten autoen salmenta %12 txikitu zen iaz Hego
Euskal Herrian, eta aurten hortik gora ari da makaltzen. Urteko lehen seihilabetean,
saldutako autoen %33,4k zeukaten motor hori; urtebete lehenago, %45etik gora ziren.
