1. Tessane Win. By Evadne Watkis 12/24/13
Raise de flag an shout fi victry
Meck some nise fi Tessanne Chin
Give Ja de Glory an tell de story,
How Tessanne sing an win.
It was a Monday night at eight p.m,
Wen a powa voice come tundarin in.
Aal four chair tun roun ,an to dem big supprise,
Meet a Jamaican caal Tessanne Chin.
She choose de sexies man alive
Fi be har coach an guide.
Nat becaase af him pretty looks,
But him music ability was wide.
Sometime wen di competitian get stiff
An di addas try fi mek har skid,
She peppa it up wid likkle reggae move
An seh hoono don't know who hoono dealin wid.
She big up di adda cantestant dem
An was jus like a madda hen.
She was an inspiratian to dem fi meck dem know
doh yu compete, yu can still be fren.
But wen di aaftaclaps come dung
An di final happenins begin,
Aal America an di res a di wirl
Seh di winna is Tessanne Chin.
So Tessie girl we proud a yu.
Jus memba wen yu reach di steeple,
Yu meck a pramise dat yu big success
Is fi yu own Jamaican people.