1. INTERVENCIÓN DE XABIER P. IGREXAS NA PONENCIA
A blogosfera galega:
tecendo dende a esquerda o idioma e a nazón
SEMINARIO ACTIVISMO POLÍTICO NA REDE, BRUXELAS, 11-11-2009

2. Bo día,
Alén dos aspectos xa sinalados, nesta intervención quero centrarme na dimensión da
Rede como espazo-ferramenta a través da cal se poden estender e agrandar procesos
de mobilización social.
Os procesos mobilizadores, independentemente da súa profundidade ou duración,
teñen na comunicación e na propaganda un elemento crucial, que pode garantir ou
inviabilizar en boa medida o éxito da convocatoria. Nese senso a Internet, como
grande canle de comunicación global, fornece aos movementos sociais (na súa
globalidade, dende os partidos máis organizados até as estruturas máis difusas) de
ferramentas de alto valor na difusión das causas, obxectivos e características
concretas dos procesos mobilizadores.
O exemplo da lingua
No caso concreto de Galiza, vou falar especificamente do ciberactivismo relacionado
co movemento de defensa da lingua galega.
O movemento de defensa da lingua está articulado por un numero importante de
organizacións sociais, culturais, políticas e sindicais, e conta cunha traxectoria de
décadas de traballo reivindicativo e mobilizador. É certo, pois, que partimos dun
ámbito no que existe un importante traballo previo, de xeración de conciencia, de
auto-organización e de resposta social. Porén, nos últimos anos a Rede ten sido
utilizada como un espazo non só para amplificar as accións do movemento de defensa
da lingua, senón tamén para desenvolver un traballo especificamente propio.
Falo por exemplo da Ciberirmandade da Fala, que dende hai moitos anos, exerce unha
importante presión en favor do idioma galego, a través de ofrecer dende o seu sitio
web un sistema dende onde enviar peticións a empresas e organismos públicos,
solicitándolle un maior compromiso co idioma, e que ten acadado importantes logros.
Falo de “Blogues pola Lingua”, unha Rede de blogueiras/os en defensa do idioma
galego da que eu fun un dos seus promotores, nada ao abeiro da celebración do Día
das Letras Galegas no ano 2008, co obxecto de utilizar as enerxías e potencialidades
da blogosfera galega para crear unha proxección multiplicadora do discurso en favor
da lingua galega, así como das convocatorias na súa defensa. Actualmente Blogues
pola Lingua aglutina a máis de 270 blogues. Dende o seu nacemento desenvolveu
diferentes ciberaccións consistentes na publicación simultánea de entradas
relacionadas co idioma nas bitácoras adheridas, e destinadas fundamentalmente a
difundir as convocatorias de manifestacións.
A principal achega de Blogues pola Lingua, non está en sumar un impacto adicional
nos medios de comunicación convencionais ás convocatorias, que tamén, senón na
difusión en rede.
Así mesmo, arredor de Blogues pola Lingua, e a través dunha lista de correo estase a
traballar, cun rico debate, na procura dunha maior estabilidade da actividade da Rede
de blogueiras/os.

3. Nese aspecto, unha das características máis positivas do ciberactivismo é o feito de
que os procesos son tremendamente participativos e inclusivos, o que redunda nun
maior aproveitamento de sinerxías que por mor das distancias físicas serían
dificilmente aproveitábeis se non é a través da Internet.
Conclusións
En conclusión, exemplos como os enunciados, aos que se poderían sumar moitos
outros, demostran como nunha nación sen estado, como Galiza, a sociedade civil, isto
é: o pobo, ten na Internet unha ferramenta moi útil para acrecentar, e mesmo
promover, os procesos de mobilización social.
Porén, esa ferramenta, tamén temos que recoñecer que nunca poderá substituír o
valor da militancia presencial organizada en movementos sociais, organizacións
políticas ou sindicais, pero si complementala nun grado moi significativo.