Didaktikaren kontzeptua

1. GABIOLA, A., RATÓN, Mª D. (2009/10).
Didaktika Orokorra. Bilbao: Didaktika eta Eskola Antolakuntza Saila. Bizkaiko atala. UPV/EHU.
Agiri polikopiatua.
1.1. Didaktikaren kontzeptua
Didaktika irakaskuntza edo irakaste-ikaste prozesuak lantzen edo aztertzen dituen
hezkuntza zientzia da.
Hitzaren etimologia kontuan hartzen badugu, didaktika didaktikós (irakasten duena edo
irakasteko gai dena) hitz grekotik dator. Didaktikós, halaber, didasko (irakastea, argitasunez
azaldu edo frogatzea) aditzetik dator.
Hau guztia, dirudienez, literatura genero batekin loturik agertu zen: genero didaktikoarekin,
alegia. Horretan, teatro edo poesiaren bidez, entzule edo irakurleei mezuak irakasten zitzaizkien.
Etimologian, beraz, Didaktika irakaskuntzarekin loturik aurkitu dugu berriro.
Mendeetan zehar, irakaskuntzari buruzko hausnarketa ugari egon dira, baina bakar bat
aipatzeko, Comenio-ren lana aipatu beharra dago: "Didaktika Handia" (1657). Didaktika "guztioi
gauza guztiak irakasteko artifizio unibertsal" moduan definitzen da.
Gaur egun, Didaktikak tradizio anglosaxoniarra hartzen du bere barnean. Tradizio honek
irakaste-ikaste prozesuak Curriculum-aren Teorian aztertzen ditu. Horregatik, Didaktikan eremu
horretatik egin diren ekarpenak jaso ditu, bai eta hitz bera ere (curriculum).
Didaktikari buruzko definizio asko eman dira. Horietatik hurrengo hirurak aukeratu ditugu
indarrean dirautelako eta oso adierazgarriak direlako.
"Hezkuntza-xedeekin adostasunean garatzeko, ikaste-irakaste prozesuak azaltzen dituen
diziplina" (Contreras, 1991:19).
"Batez ere irakaste-ikaste prozesuei buruzko ezagutza, ikerketa, proposamen teoriko eta
praktikoen eremu hori da gaurko Didaktika" (Zabalza, 1990:136).
"Ezagutza teoriko-praktiko eta teknologikoen eremu zientifikoa, horren erdiko ardatza erlazio-
eta komunikazio- testuinguruetan garatzen diren irakaste-ikaste prozesu intentzionalak izanik, hor
kultura integratzeko, bera eraldatzeko asmoz” (Fernández Soto, 1989:55).

2. Didaktikak irakaste-ikastearen arloko arazoak konpontzen lagunduko digula espero dugu,
gure irakas-lana hobetzeko metodo eta ezagutza-multzoa sor dezan, eta hori guztia, irakaste-
ikaste prozesuak hobetzeko gertatzen diren testuinguruetan.