Bahami ta'alluqaat - Ham khoob achchi tarah jaante hain ke baahami na ittefaaqi jahaan kahein bhi hogi tabaahi ka paighaam laa'eygi lekin jab ye na ittefaaqi da'wat-e-deen ka kaam karne vaalon ke darmiyaan paida hojaati hai to ye shaitaan ki itni badi fatah ban jaati hai ke voh apni is kaamyabi par jitnaa na'zaan ho kam hai. Allah ta'aa'laa farmata hai: Aur (aiy imaan valon) Allah aur us ke Rasool (saw) ki itaa'at karte raho, aapas mein ikhtilaaf na karo varna tum buzdil ho jaavoge aur tumhaari havaa ukhad jaa'eygi, aur sabr va isteqaamat ikhtiyaar karo, beshak Allah sabr va isteqaamat ikhtiyaar karne valon ke saath hota hai. (al-anfaal - 46).