журам батлах тухай
- 1. МОНГОЛ УЛСЫН ЗАСГИЙН ГАЗРЫН ТОГТООЛ
2003 оны 6 дугаар сарын 4-ний өдөр Дугаар 140 Улаанбаатар хот
Журам батлах тухай
Монгол улсын Соёлын тухай хуулийн 21 дүгээр зүйлийн 9 дэх хэсгийг үндэслэн Монгол Улсын Засгийн
Газраас ТОГТООХ нь:
1. Ном, хэвлэлийн шилдэг бүтээлийг улсын санд худалдан авах журмыг хавсралтын ёсоор баталсугай.
2. Ном, хэвлэлийн шилдэг бүтээлийг улсын санд худалдан авах эх үүсвэрийг Боловсрол, соёл, шинжлэх
ухааны сайдын төсвийн багцад багтаан санхүүжүүлж байсугай.
МОНГОЛ УЛСЫН ЕРӨНХИЙ САЙД Н.ЭНХБАЯР
БОЛОВСРОЛ, СОЁЛ, ШИНЖЛЭХ УХААНЫ САЙД А.ЦАНЖИД
Засгийн газрын 2003 оны
140 дүгээр тогтоолын хавсралт
Ном, хэвлэлийн шилдэг бүтээлийг улсын
санд худалдан авах журам
Нэг.Нийтлэг үндэслэл
1.1.Шинээр хэвлэгдэн гарч байгаа ном, хэвлэлийн шилдэг бүтээлээс улсын санд шалгаруулан
худалдан авах үйл ажиллагаагэнэхүү журмаар зохицуулна.
1.2.Худалдан авсан ном, хэвлэлийн шилдэг бүтээлийг Улсын төв номын сан болон аймаг, нийслэлийн
төв номын санд хадгална.
1.3.Ном,хэвлэлийн шилдэг бүтээлийг жил удаа сонгон шалгаруулан худалдан авна.
Хоёр.Мэргэжлийн зөвлөлийн үйл ажиллагаа
2.1. Ном, хэвлэлийн шилдэг бүтээлийг шинжлэн үзэж,үнэлгээ өгөх, улсын санд худалдан авах талаар
санал, дүгнэлт гаргах үүрэг бүхий орон тооны бус мэргэжлийн зөвлөлийг /цаашид "зөвлөл" гэх/ соёлын
- 2. асуудал эрхэлсэн Засгийн газрын гишүүн томилон ажиллуулна.
2.2.Зөвлөл нь соёлын асуудал эрхэлсэн төрийн захиргааны төв байгууллага, нийтийн номын сан,
хэвлэлийн үйлдвэр болон уран зохиол, утга зохиол судлаач, шүүмжлэгч, эрдэмтдийн төлөөллөөс бүрдсэн
есөөс доошгүй гишүүнтэй байна.
2.3.Зөвлөлийн үйл ажииллагааны хэлбэр нь хуралдаан байна.
2.4. Зөвлөлийн хуралдааныг жилд нэг удаа зарлан хуралдуулна.
2.5. Зөвлөлийн нийт гишүүдийн дөрөвний гурваас доошгүй нь хүрэлцэн ирсэн тохиолдолд хуралдааныг
хүчинтэйд тооцож,хуралдаанд оролцсон гишүүдийн олонхийн саналаар санал,дүгнэлтийг гаргана.
2.6. Зөвлөлийн гишүүн өөрийн бүтээлээ худалдаж байгаа буюу номын өмнөхүг, шүүмж бичсэн,
редакторласан бол тухайн асуудлаар санал хураахад оролцохгүй.
2.7. Зөвлөлийн санал, дүгнэлтийг хуралдаанд оролцсон зөвлөлийн бүх гишүүд гарын үсэг зурж
баталгаажуулна.
2.8. Соёлын асуудал эрхэлсэн Засгийн газрын гишүүн зөвлөлөөс гаргасан санал, дүгнэлтийг үндэслэн
шалгарсан . ном, хэвлэлийн шилдэг бүтээлийг улсын санд худалдан авах шийдвэр гаргана.
2.9. Улсын санд худалдан авах номын нэр төрөл, тоо хэмжээ, байршуулах газрыг Зөвлөл тодорхойлно.
Гурав.Шилдэг ном,хэвлэлийг шалгаруулах, худалдан авах
3.1.Шалгаруулалтанд тухайн онд хэвлэгдсэн шинэ бүтээл орох бөгөөд бүтээлийг шалгаруулалт
болохоос нэг сарын өмнө Зөвлөлд ирүүлнэ.
3.2. Шалгаруулалтанд орох бүтээл дараах шаардлагыг хангасан байна.Үүнд:
- Нийт уншигчдад зориулагдсан лавлагааны зохиол, соёл урлаг, уран зохиол, түүхийн болон эрдэм
шинжилгээний хялбаршуулсан бүтээлийн аль нэг төрөлд хамрагдаж байх,
- Хэвлэлийн бүтээгдэхүүнд тавигддаг олон улсын стандартыг хангасан байх,
3.3. Ном, хэвлэлийн шилдэг бүтээл тухайн онд хэвлэгдсэн гарсан уран зохиол, шинжлэх ухаан танин
мэдэхүй, түүхийн онцгой ач холбогдол бүхий ном,хэвлэл хамрагдана.
3.4.Улсын сангийн бүртгэл хөтлөх, шилдэг ном хувиарлалтын дагуу түгээх, худалдан авсан бүтээлийн
бүрэн бүтэн байдлыг хангах, сэргээн засварлах ажлыгУлсын төв номын сан хариуцан гүйцэтгэнэ.
3.5. Улсын төв номын сан шилдэг ном, хэвлэлийг хувиарлалтын дагуу түгээх,үүрэг хүлээнэ.
Дөрөв.Шалгарсан бүтээлийг санхүүжүүлэх, хөрөнгийг зарцуулах
4.1. Шалгарсан ном, хэвлэлийн шилдэг бүтээлийг улсын санд худалдан авахад шаардагдах хөрөнгийг
Соёл урлагийн сангаас санхүүжүүлнэ.
4.2. Ном, хэвлэлийн шилдэг бүтээлийг авах зардлыгулсын төсвөөс олгосон хэмжээнд багтаан
санхүүжүүлнэ.
