Xabier Dorronsoro Oroitzene AEK-ko ikaslearen idatzia
1. HITZEKIN
Zorigaiztoko pandemiak gure bizitzaren atal gehienak jipoitu eta etetera behartu gintuen;
horien guztien artean, esaterako, bertan behera geratu zen AEK-k euskararen alde antolatzen duen
KORRIKA ekitaldia.
Aurten, ordea, egiterik bazegoela jakin bezain laster, gehienok poz handiz jaso genuen
albistea. Gainera, gogoz gainezka geundelako euskaltegietako irakasleek euren engaiamendu irmoa
erakutsiz, Korrika ekitaldia girotzeko lanetan parte hatzera animatu gintuzten. Horrela, ikastaroko
hilabete hori bizi-bizia izan genuen. Esaterako, Korrika batzordeak hedatutako aholkuekin eta
irakasleek sustatutako hainbat egitekorekin Korrika hauspotzen hasi ginen.
Herriak egitasmoaren berri izan bezain laster, Udalak, ikastetxeek, dendek, elkarteek...
murgilduta atxikimendua erakutsi zuten. Horiekin guztiekin batera, Oroitzenen AEK euskaltegiak
egindako ekimenen laburpena agertuko dut.
Hasteko, martxoaren 31n Amurrion Korrikari ekin zitzaionean, Lezoko AEKkoek Juli del
Solek eskuz brodatutako oihal dotorea zintzilikatu genuen udaletxeko balkoian, Korrikari zegokion
pankarta handiarekin batera. Eta girotu genuen ekitaldia suziriekin. Aipatzekoa da emakume horren
kemena eta gogoa, izugarria baita. Halaber, Xabier Tubillasek prestaturiko pankarta ederra ipini
genuen, kiroldegia eta Altamira auzoa uztartzen duen zubi garaian.
Jarraian, aipu egin nahi diot irakasleen engaiamendu txalogarriari. Euren burutazioekin
gertakariaren aurrean nola animatu gintuzten ikusi besterik ez dago. Esate baterako, euskaltegiko
korridoreko paretetan hainbat urtetako elastikoak zirauten eskegita. Bakoitza bere leloarekin eta guk
asmatu behar genuen zein urtetan erabili ziren. Pasillo berean, mahai luze batean kamiseta, zorro,
txapa, bixeradun txanoak... Bulegoan diruz laguntzeko txartelak ere bazeuden. Oarsoaldeko mikro-
ipuin lehiaketa bultzatu zen. Era berean, herriko elkarte gastronomikoekin batera, pintxo-lehiaketa
antolatu zen. Azkenik, -gogoan dudana, behintzat- beste hainbatek oso agerikoa den horma bat
zuritu eta aurtengo Korrikaren leloarekin margolan bikaina osatu zuten.
Ikastetxeek ere euren atarietan Korrika-festa ospatu eta ondoren herriko kaleetara irten ziren.
Hura festa herrian!!!
Hurrena lekukoa eramaterena nola izan zen aipatuko dut. Ikastordua bukatu ostean eta
euskaltegiko bulego aurretik pasatzerakoan irakasle batek deitu eta horrela galdetu zidan: Korrikari
dagokion lekukoa eramango al zenuke? Horretarako nik baino meritu gehiago dutenak asko daudela
erantzun nion. Bada, gu zutaz oroitu gara erantzun zidan. Hautagai hoberena, nire ustez, Juli Del
Sol zela adierazi nionean, horrelaxe erantzun zidan: bai, Juli eta biok eraman ezazuen aldeko hautua
egin dugu. Hori guztia erantzun nuenean, zirrara goxoa sortu zen nire baitan eta baiezkoa eman
nuen. Hurrengo batean, HITZA aldizkarian, Juli eta bioi egindako elkarrizketa agertu zen. Egunak
aurrera zihoazen heinean, sentipen atsegina bizi izan genuen lekukoa eramateko hautatutakook.
Korrika gure herrira igande goizeko laurak eta minutu batzuetara ailegatuko zela jakin
genuen. Larunbata gauean, euskaltegiak ordu txikietara hurbiltzea errazagoa izan zedin, Saldise
enparantzan afaria atondu zuen. Lezoko herriari zegokion hainbat eragile, euskaltegiak eta Xabier
Tubillas gure ikaskidearen familiaren artean elkarbanatuko genuen lekukoa.
Oroitzene Euskaltegiari egokitu zitzaion hirurehun metroak, egun biribilgunetzarretik
beheraxeago Jauregialde auzo aldera jaisten den aldaparen erdialdean zuen hasiera eta egoitzaren
atarian bukaera. Ordua baino lehen elkartu ginen artean urduritasuna eta poza nahasten ziren.
Ikaskide, irakasle, senide eta jende ugarik inguratzen gintuzten. Julik ondoan zuen irribarretsu eta
alai ama laguntzera etorritako semea. Nik, berriz, emaztearen eta alabaren beroa; ibilbidean
2. argazkiak egin zizkigun ilobaren gertutasuna ere bai. Hori guztia argituz, mendebaldetik ezkutatzen
zihoan ilargi zoragarria.
Halako batean, badator, badator... Korrika entzun genuen eta ustekabe batean gainean
genituen lekukoa zekarkitenak, furgoneta eta jende aldra galanta. Lekukoa jaso esku banaz heldu eta
gora altxatuz, geldi ezin den Korrikaldiari ekin genion. Hirurehun metro horietan, Juliren
poztasunak eta nireak gure barruak gainezka jarri zituen. Begietatik malkoak zerizkigun, ez baita
gutxiagorako.
Euskaltegi aurrealdean eman genien lekukoa hurrengoei, bere ibilbidea jarrai zezan. A zer
gaua huraxe!! Ahantzi ezina. Dena izan genuen alde, aspaldiko gaupasarik beteena, ederrena,
zoragarriena eta hori guztia biribiltzeko dizdizka ilargia.
Gora Euskara!!
Gora Korrika!!
Gora AEK!!!
Xabier Dorronsoro Zabaleta
Oroitzene AEK-ko ikaslea