C1 mailako mintzamen-probari heltzeko aholkuak

1. Nola heldu C1eko ahozko probari?
Idatzizko proba egin eta gainditu ondoren, ahozkoa egiteko garaia da, baina nola
helduko diogu C1eko ahozko probari?
Nolakoa da azterketa?
HABEren C1eko azterketa binaka egiten da, eta bi zati ditu:
1. Testua azaldu eta iritzia eman.
2. Bat-bateko elkarrizketa.
1 Testua azaldu eta iritzia eman
Aztertzaileek testu bat emango dizute, eta 20 minutu izango dituzu testua irakurri
eta gai horren garapena prestatzeko. Ondoren, 5 minutu izango dituzu gaia ahoz
azaltzeko. Gainera, aztertzaileek eskatuko dizute zure bikotekidearen azalpenak
entzun ondoren haren gaineko iritzia emateko.
Testua arretaz irakurri, eta xedea zein den identifikatu. Ondoren, argudio eta ideia
nagusiak azpimarratu, eta zure eskema edo buru-mapa sortu. Eskema azterketa-
gelara eraman eta erabili ahalko duzu, baina ez hitzez hitz irakurri. Beraz, komeni da
argia izatea, eta ideia eta hitz klabeak nabarmentzea.
Zure testuaren azalpena egiteko gidoi honi jarraitzea proposatzen dizugu:
1. Testua aurkeztu: Lehenik eta behin, egokitu zaizun testua aurkeztu behar
duzu: zein testu-genero den, nork idatzi duen, non, zeri buruz hitz egiten duen,
zertarako...
2. Artikuluaren ahozko laburpena egin: hierarkizatu lehenengo eta bigarren
mailako ideiak. Kontatzeko orduan, ez errepikatu testuan dauden moduan,
zure hitzak erabili ideiak azaltzeko. Egin ahaleginak, testuko lexiko espezifikoa
erabiltzeko.
3. Irakurritakoaren gaineko iritzia eman: gaiaren inguruko iritzia emateko, saia
zaitez zurera ekartzen; ezagutzen duzun adibide bat jartzea egokia izan
daiteke, benetakoa edo asmatutakoa.
Gogoan izan, bikotekidearen jardunaren gaineko iritzia ere emateko eskatuko
dizutela. Horretarako, aztertzaileek baliteke zuzenean iritzia eskatzea ala galdera
zehatzen bat egitea. Dena den, zu adi egon beste azterketariaren hitzei, eta entzun
bitartean pentsatu eta prestatu zer esango duzun. Horretarako gaia zurera ekartzea
estrategia ona da hemen ere.
2 Bat-bateko elkarrizketa
Bat-bateko elkarrizketa egin beharko duzu beste azterketari batekin, argazki edo
beste elementu grafikoez baliatuz. Gai bat emanda, horren aldeko edo aurkako

2. iritzia defendatu beharko duzu eta egokitzen zaizun rolari heldu eta argudioak
eman. Proba honetan elkarrizketan parte hartzen duzuen ikasleen arteko
elkarreragina ebaluatzen denez, garrantzitsua da elkarri entzun eta modu egokian
erantzutea. Ariketa hau ez da bakarrizketa bat, eta garrantzitsua da diskurtsoa
elkarrekin eraikitzea, besteak esandakoa jasoz, galderak eginez eta galderei eta
argudioei erantzuna emanez.
Bat-bateko elkarrizketak hamar minutu inguru iraungo ditu guztira (azterketari
bakoitzak bost minutuz hitz egingo du).
AHOLKU OROKORRAK
• Azterketan bi aztertzaile daude: Zurekin hitz egiten duen bat eta oharrak jaso
eta azterketaren iraupena kontrolatzen ari den bigarren bat. Biak agurtu,
baina, azterketa egin bitartean, zurekin hitz egiten duen aztertzailearengan
jarri arreta.
• Azterketa garaian, lasai hitz egin! Mintzatzea ez da lasterketa bat. Hitz egin
aurretik, pentsatu arretaz zer esan, eta hitz egin normalean baino polikiago.
• Entzun zeure buruari hitz egiten duzun bitartean, eta akatsen bat egin duzula
antzematen baduzu, zuzendu. Hiztun guztiek egiten dituzte akatsak eta
etengabe zuzentzen dituzte.
• Gogoratu ikasle guztiak sentitzen direla urduri azterketetan. Orduan, sakon
hartu arnasa azterketa egin aurretik, eta saiatu lasaitzen.
C1 mailako ahozko azterketa-ereduak helbide honetan aurkituko dituzu.