2. Camiño paseniño á túa beira até confluír na encrucillada que nos distancia, mentres buscamos o noso espazo nun mundo real e imaxinario.
Avanzaremos atravesando sendeiros e vereas de superficies lisas ou rugosas que nos endurecerán os ósos e crearán a consistencia óptima
para percorrer o camiño da distancia e da proximidade, e agardar aquela encrucillada que nos deixe escoller un novo vieiro cara onde
dirixirnos, sentir de novo a presenza do lugar que nos acubilla e volver ao espazo do que partimos.
Encontros, partidas que deixan pegada nos nosos corazóns. Bicos , abrazos que nos dan a forza para percorrrer todas as distancias. Ritos e
crenzas que pretenden explicacións veraces. Libros de ciencia ou ficción que relatan as andanzas d@s camiñantes. Entre os feitos e as
palabras percorren os desexos, as paixóns, os sentimentos que nos conducen polas congostras solitarias e sombrías ou polas sendas claras e
soleadas, tanto coma a luz da ledicia de atoparte de novo naquela encrucillada da que un día partimos para volver encontrarnos.
Historias, soños, medos, supersticións, desexos, dúbidas… en fin, pequenos relatos creados para ti con agarimo e imaxinación polo noso
alumnado do IES Francisco Asorey de Cambados. Para que comprendas un anaquiño do que pasou pola súa imaxinación nunha mañá de
primavera, nun espazo cálido e silencioso, ao abeiro de libros, colores, olores e sabores variados.
Agardamos que, polo menos algún deles, che axude a escoller o teu roteiro nalgunha encrucillada.
Aurora Souto
Equipo de biblioteca:
Ana Blanco, Aurora Souto, Rocío Fondevila, Gerardo Rodríguez, María Gómez, Moisés Amado y Atala Paredes
Equipo de Dinamización Lingüística:
Rocío Fondevila, Aurora Souto, Alberto Nogueira y Santiago Rey
Deseño gráfico: María Gómez
IES FRANCISCO ASOREY de Cambados. Curso 2017/2018
