Eeseni_Y_(Autosaved).docx

ELESENI Y’EKWOTA ENTANG’ANI 2015
Ayare Ime
1. Okorangerigwa Kw’obong’aini
2. Korwa amato gochia amagoro
3. Eng’ana y’obogima na amakweri
4. Obong’aini bwa Nyasae
5. Ogosesenigwa kwa omonyene Oboronge
6. Keria okonyora tari kerokio keria okorora
7. Gokoora Chisegi
8. Amang’ana y’obong’aini
9. Amang’ana ya ekeene
10. Magega Y’ekiebisio
11. Koba moyo ase okwegena
12. Obokanyeku bw’abang’aini
13. Abakungu na edivai
AMANG’ANA Y’OMONTO OMONG’AINI
Ekero ebitabu ebinge bia Bibilia biichirie na ebiene bi’ekemoika n’ering’ana ria Nyasae, egetabu
ki’emereng’anio nigo geichire n’obosemia bw’obogima bwa kera rituko obwo bokororekana na
bogoikereka.
Emereng’anio eye emieng’e, eikeranete, ekogwekania ebinto, ebekire omonyo, na ara aange
eigwanaine, nigo ere emiororo koyeinyora na egokuna ense yonsi, na kobeka amang’ana koigweka
buya, kero kende ere emeikeranu mono goetania abakwani abaya na amaamereranio y’echunguru.
Omoreng’anio: “Aye ore omwororo, genda ase amage, origererie orore buna agokora emeremo
nomokia onyore obong’aini.” (Emereng’anio 6:6). Gose; “Mbuya komenya ase ense y’eroro, kobua
komenya n’omokungu omonyariomana, naende omonyandamwamu.” (Emereng’anio 21:19). Gose;
“Onye omobisa oo ore n’enchara, moe endagera arie, onye ore n’erang’o, moe amache anywe. Igo
n’obeke omorero bw’amakara ase omotwe oye, na omonene nakoe eng’eria yao.” (Emereng’anio
25:21, 22). Ning’o oranyare kweba emegwekano buna eye?
Egetabu ki’emereng’anio nigo gekorwa oborori bw’obong’aini obwo bwabekeranetigwe amo ase
ebiare ebinge. Abariki ba kerokio nigo bakoragwa buna omorwoti Sulemani. (Emereng’anio 1:1-9:18,
10:1-22:16, Emereng’anio 25-29); buna “abanto abang’aini” bataatananiri, korwa ense ya moocha
y’aang’e (Emereng’anio 22:17-24:22, 24:23-34) na amo na Aguri oyotarenge Omoisraeli
(Emereng’anio 30:1-33). Egetabu ekio nkomoitaba kere Hezekia buna oyomo bwa baria bachagete
amang’ana are imeo (Emereng’anio 25:1). Ase ebiro binde naende, egetabu eke nkoraga kere gochia
ase amariko amakoro a moocha y’aang’e, mono aria korwa Misiri y’akare.
Nonye nabo egetabu ki’emereng’anio nigo kere ring’ana ria Nyasae, ekiagera ngoetera ase omoika
omochenu abariki babegete amang’an ayio amo. Nonye Nyasae tari gwatorwa mono ase ebibungo
ebinge, nao are botambe ande onsi ase torabe ase chichiro, gose ekero togokwana, tokoria,
tokonywa, togokora emeremo, tokogora, tokoonia, togosanga, na gwancha, Omonene nao are.
Nyasae bw’emereng’anio tari Nyasae bw’omonto omwegeni rioka igo, abe omokuani gose
omosasimi oikaransete ase ebirogo. Obonyasae nigo bosoneranirie ase chingobo chi’emeremo.

Egetabu ki’emereng’anio boigo nkwegeria kere ng’a ninki kere eng’encho y’okomoiroka Nyasae
(Emereng’anio 1:7, 31:30), tari ime y’ekanisa rioka korende buna tokogenda ase obogima bwa kera
rituko, ekiagera enchera tomenyete nigo egokwana ase eriogi rinene goetania enchera tokorandia,
togosaba, gose nonye n’okorwa ebingw’anso (Emereng’anio 28:9,15:8).
Ase emereng’anio “obong’aini” nkoorokigwa bore ekero oramoitabe omonene “ase chinchera chiao
chionsi” (Emereng’anio 3:6): nakwo ogoteba, obong’aini n’okoba moyo ase okwegena na oboigweri;
nigo bore eng’encho y’okoba mwanyabanto bosio bwa Nyasae bw’obotongi.
Korwa ase egetabu ki’emereng’anio ntwegere buna torabe abang’aini, korende mono, ase obogima
bwa botambe. Egetabu ekio nigo gekoiraneria amabooria buna, Ninki naende naki ngwenerete
kobaegeria abana bane? Naki ndanyare koba n’omogoko na obobui? Nase ki inde as omochando
bw’echibesa? Naki ndakinigwe ekero ase emeremo? Naki ndabue amatemwa y’okogania okobe
kw’omobere? Naki ndagambere oromeme rwane?
Omoerio, obong’aini tibori chisemi n’echinguru chi’obongo. Ribaga erio, omonto oria omanyete
okobua kw’oboronge bwaye nigo are ase omochando omonene bw’okoba omoriri, ekiagera nonye
n’oria okageire koba n’echisemi chinene mono nigo amanyete ebinto ebike mono. Onde nabo
arekagere koba omong’aini, na ase igo tarora okogania gw’okorigia obomanyi obonene. Egento
ki’eng’encho mono ase obong’aini, ribaga erio n’okoba n’obokanyeku, korora okogania gwaito, na
ase igo ogosaba obong’aini.
Egetabu ki’emereng’anio nigo kere ekegare na egetenenku, na nigo kegokwanera amang’ana
amange. Ase engencho tore n’eribaga rike, twachorire amang’ana make igo aya toregere.
Titogokiegera gionsi, korende aria toregere, nigo aisaine koreng’ana n’ogosaba gwaito.
Jacques B. Doukhan nigo are omworokia bw’ekeiberania na omotuki bw’okobwatana ogokoro na
omorai bw’amorokererigwa a Jewish-Christian Seventh-Day Adventist Theological Seminary,
Andrews University. Omofaransa (Oiboretwe aaria Algeria), Doukhan nabwate edoctorate ase
Ekeiberania korwa e University ya Strasbourg na e doctor ya y’oborandia korwa Andrews University.
Eleseni 1 Disemba 27 – Januari 2
OKORANGERIGWA KW’OBONG’AINI
Esabato Mobaso
Okwegera gw’echuma Eye: Emereng’anio 1-3, Omoch. 1:1, Okong. 19:16, 20:20, Emer. 11:30, 13:12,
15:4.
Amang’ana O motwe. “Okomoiroka Omonene noro omochakano bwechisemi. Abariri nigo
bagochaya obong’aini na amorokererio.” (Emereng’anio 1:7).
Korwa Edeni gocha, oboroso bw’emechando ya mwanyabanto nigo bore ase ogochora okobe.
“Mwanyabanto nigo asiretie bionsi ase engencho achorete komotegera omong’ainereria goetania
komotegerera ere oyore ekeene, oria bweka ore n’obomanyi. Ase okoburukania amaya n’amabe,
ebirengererio biaye bigatantanigwa.” Ellen G. White, ducation, P. 25.
Egetabu ki’emereng’anio nigo kere igoro y’ogotokonya gokora ogochora okuya, gochora enchera ya
Nyasae ribaga ri’enchera y’omong’ainereria. Ise gose ng’ina, ogokwanera omwana oye omomura,
tari rioka ase okomokurera korwa ase ogochora okobe korende komosegeta gochora buya. Aya nigo

are ayengencho enene mono ekiagera ogochora togokora nigo kore okw’obogima gose
okw’amakweri.
Ebisieri ebitang’ani bitato bia emereng’anio nigo bikworokia enchera eye y’echisemi. Gaikire
gotwerera eganga y’egetabu: “Komanya obong’aini” (Emereng’anio 1:2) na kabekire inse ekerenga
ki’egetabu: “Okomoiroka omonene nakwo omochakano bw’echisemi” (Emereng’anio 1:7, gwekania
Emereng’anio 9:10), omoriki nigo akoirana magega na gosuka bosio korwa ase ogotokurera korwa
ase ogotegerera oboriri, na gotosorora goitaberana n’okorangerigwa kwa igoro kw’obong’aini.
*Egera eleseni y’echuma eye, bweariganie ase Esabato Januari 3.
Rituko 2 Disemba 28
Omochakano Bw’obong’aini
Ase Emereng’anio 1:1-6, eng’ana enene “emereng’anio ya Sulemani mosinto o Daudi”
(Emereng’anio 1:1) nigo ekoagacha oboamate gati ya Emereng’anio na 1Abaruoti 3:5-14. Ase
Abaruoti (buna ase egetabu kia Emereng’anio) Sulemani nigo akoorokigwa buna omwana okorigia
obong’aini korwa ase Nyasae, amo n’okomoraga Sulemani buna “omwana o Daudi” ebibungo ebi
bibere nigo bigosanga amang’ana agwekaine. “Obomanyi,” “Obong’aini” “ekina.” Aya tari koenekia
Sulemani rioka igo buna oyore magega y’okorikwa kw’egetabu, boigo nigo akoorokia ng’a
Emereng’anio nigo ere igoro y’okogania kwamwanyabanto kw’obong’aini bwa Nyasae.
Soma Emereng’anio 1:7. Ninki obong’aini? Ninki “Okomoiroka omonene?” Mboamate ki
ebirengererio ebi bibere bibwate?
“Obong’aini” aiga nigo bokwerwa buna obomanyi bw’okwegena. Nigo bore n’oboamate
n’okomoiroka omonene. Ekerenga eke ki’engencho gi’edini y’ekeiberania nakio kere ekeigorero
gochia ase emereng’anio. Tibori kororekana bokoirorerwa rioka igo, korende nabwo bore
omoroberio bw’egetabu ekegima (Emereng’anio 17, 31:30).
Okomoiroka Omonene tikobwati oboamate na obwoba bw’obwana igoro ya egesusuro kia Nyasae.
Ribaga erio, nigo kogwenerete komanywa buna ebirengererio bi’okobao kwa Nyasae omonyene ase
ebiro bionsi na kera aase. Okomoiroka omonene nakwo gokoorokia okoiraneria kw’abanto ase
okweorokia kwa Nyasae aaria Sinai (Okong. 19:16, 20:20), koreng’ana buna kwaerete okwerwa
kwabo koba abegenwa na komwancha Nyasae ase ogoitaberana n’okobwatana kwaye ase bare
(Okoir. 10:12).
Ase obweng’e, engencho y’okomoiroka Nyasae nokoba abegenwa gochia ase Nyasae na
komwancha. Eng’ana “Okomoiroka omonene noro omochakano… obong’aini” engencho yaye neria
ng’a obong’aini nigo bokorwa ase “okoiroka” oko. Ring’ana ri’ekeiberania ria “Omochakano” (reshit)
nigo rikoraga gochia ase ring’ana ritang’ani erio rikoigorera omogano bw’obotongi (Omoch. 1:1).
Eleseni entang’ani y’obong’aini, ase igo, nigo ere y’okomanya ng’a Nyasae nere omotongi oito, oria
ogotoa obogima na omoika tokoeyana, na ng’a nigo are botambe – Nyasae bw’obwanchani, na
oboronge, na okoboorigwa (Yoh. 3:16, Zab. 59:14, Ibr. 9:12).
Ngotebigwa tore tomwanche Nyasae na komoiroka boigo. Mboamate ki ebirengererio ebi bibwate
gochia ase obomanyi bwaito igoro y’omonene?
Rituko 2 Disemba 29
Chisemi Chi’ekeene

Soma Emereng’anio 1:8-19. Inchera ki ibere chiokoamererania chiorokirie aiga chie “chisemi”?
Mbotomwa ki obonene bore aiga, tari ase abaibori boka, korende ase kera oyomo oyomoirogete
Omonene?
Chisemi nigo chire ritang’ani ase onsi, eng’ana y’eamate naende chisemi chi’ekeene nigo chikorwa,
ritang’ani na igoro ase onsi, korwa ase abaibori. Ase ebibungo ebi, chisemi echio nigo chikorokwa
“amorokererio y’okorongeyia” naende “amachiko.” Ring’ana ri’ekeiberania rigoonchorwa amachiko,
torah, engencho yaye “n’enchera.” Abaibori goika babaragere abana gochia ase enchera endonge.
Ase okogwekania, chisemi echi chinde, tichimanyiri na tichiri korokwa rieta. Nigo chiitabire buna
eriogi riabanyene ebibe, echio chikoraa gochia ase enchera embe.
Boigo, amang’ana “omwana one” goatananeka gotaiyo ng’a monto ongencho ki, nigo akiororerwa
rioka rioka aase chingaki chinyinge, kobeka chinguru amorokererigwa y’abaibori. Kera omoibori, iso,
nyoko, - nigo bakororwa kera oyomo kobwaye ere omonyene, ekero ensemo y’ende ekobarora ase
obomo, “abanyene ebibe.”
Ase obong’aini bwaye omonene ochikire ng’a eamate nero ere enene mono ase ebirengo bionsi biria
bikorwa chisemi. Ase enka nao omwana agochakera. Aiga nao esukuru yaye y’eritang’ani. Aaiga ase
abaibori baye buna aborokereria, nao agwenerete kwegera amorokererigwa aria aramorae ase
obogima bwaye bwonsi…. Omong’uso bw’echisemi chianka nigo bore okobua gw’okonacha gati ya
amaya na amabe… omwana aise koba taorokereirie buya aiga, Saitani nigo aramosomie goetera ase
abakoreri baye baria omwana oyio arachore.” Ellen G. White, The Adventist Home, P. 182.
Egento ekiya mono keraegerere chisemi chieamate n’okwama gw’echisemi echio. Echi nachio
chimbwa chia ime echio chire buna amateete y’ogwechabera are ase omotwe na ase ebigoti. Aaria
ase moocha ya gati amateete n’echinguba chi’eamate nigo biarenge koereranigwa korwa ase
abaibori gochia ase abana buna omwando bw’engencho enene. Chisemi n’echi’engencho mono,
nonye nabo, goetania obotenenku bw’ebinto. Chingaki tokoira ase emeremo yaito. Boigo, okoraga
gochia ase omotwe na ebigoti, ebio bire okororekana kw’omonto bene, nigo gokworokia ng’a
chisemi nigo chirangeyie obogima bwaye. Ase chinchera chia abariri gose abanyabibe, amagoro oka
(Emereng’anio 1:15) naro agokwanerwa, buna ndiria omwana oyo konye asiririe okoba kwaye.
Naki toregere koamererania n’amatemwa yechinchera chi’eamate, abasani, nonye eamate
keratugute gochia aaria?
Rituko 3 Disemba 30
Okorangerigwa Kw’obong’aini.
Soma Emereng’anio 1:20, 21. Naki obong’aini bokoorokigwa aiga? Ninki togotebigwa?
Ekero abanyabibe “bakoboera” na “koganyerera bobisi” (Emereng’anio 1:11, 18), obong’aini nigo
“bogoaka eriogi ase chinchera” (Emereng’anio 1:20), “nigo bogoaka eriogi ase emesangererekano
emenene” (Emereng’anio 1:21) naende “bwateba” (1:21). Obong’aini aiga nigo bokobogoria ekieni
ki’omonto, na okorugwa kwaye kwaegwa omosacha na omokungu ase chinchera. Nigo bore o
bwakera omonto ase obogima bwa kera rituko. Aase egati y’eriogi na omwochogano bw’ebinto
ebinge na abaonchoreria abange, okorangeria kwa obong’aini goika kobe ase eriogi rinene; onye
taibo, rirorio takoigweka ase egati y’amariogi ande amange.
Soma Emer. 1:22-32. Ninki okwama gw’okwanga obong’aini?

Egekogera abanto bakwanga obong’aini tikeri igoro y’obong’aini obonyene na kera egento igoro
y’embwa ya baria bakobwanga. Ebi nigo bigokwanerwa buna ogochaya na ogotaigwera (Emer. 1:25
gwekania ekebungo 30) buna ndiria bamanyete buya. Engencho yaye neria ng’a obong’aini nigo
bore ase oboitongo na abororo. Naende nonye nabo, baria bakwanga obong’aini nigo bare aboro na
abororo; nigo bare abariri abwo bagechete “obomanyi’ (Emer. 1:22 gwekania ekebungo 29).
Baria bakwanga obong’aini nigo baragese okwama gw’okwanga kwabo. Kobaikire kwanga gochora
okomoiroka omonene, nigo bareisanekie barabwo abanyene: nigo “bareisanekie n’emeroberio yabo
abanyene” (Emer. 1:31). Ekero tokwanga obong’aini bokorwa igoro nigo togotigara tore n’emegano
n’obong’ainereria boria tokwebekera abanyene nabaria abange bagotebekera intwe, naend ng’a
nigo tokobwancha ase obwango obonene. Ase enchera aye, twaira chinyasae chi’ogosasima ribaga
ria Nyasae. Mamincha ya ayio, baria bagochaga edini, bachecheria na kobagambia baria
bakororekana abororo na aboro, ara aange nigo bagweisanekia ase chinchera chiabo barabwo
abanyene, babekera ebinto bigosira bwango na bitari b’ingencho rigori rinene, ebio ase omoerio,
bitasainekie okogania kw’engencho enene gwenkoro.
Soma Emereng’anio 1:33. Koreng’ana na keria giatang’anete gocha, iira na gosemeria ki tokonyora
aiga? Naki eira eye ekoorokigwa ase obogima bwaito?
Rituko 4 Disemba 31
Okonyora Kwa Obong’aini
Soma Emereng’anio 2:1-5. Inki kegotokonya komanya “okomoiroka Omonene”? Ngochora ki
torakore ase eng’ana eye?
Ara gatato enkwano eye nigo egochaka nering’ana “onye” kobeka ebitambokero bitato ase
okogendereria chisemi. “Onye” entang’ani nigo ekoigora egetambokero egetang’ani kiogotegerera;
ekio kere, koba ang’e koigwa na gotegorera amang’ana ki ogotegerera (Emer. 2:1, 2). “Onye” ya
kabere nigo ekoigora okoiraneria kw’ogokora gw’okorera na gosaba obong’aini (Emer. 2:3). “Onye”
ya gatato nigo ekoigora okwerwa kw’ogwesoyia ase okorigia na gotuka obong’aini buna ndiria
bwarenge “embonga ebisegete” (Emer. 2:4).
Soma Emer. 2:6-9. Mbinto ki bigotokonya komanya oboronge? Ensemo ya Nyasae ase okorugwa
kw’obong’ani nereri?
Rora ng’a amang’ana “Omonene nigo akorwa” ase ekebungo 6 nigo akobwatana. “Oise gokora bo…
nigo oranyare komomanya Nyasae.” Obong’aini, buna ogotooreka, nigo bore ekeegwa korwa ase
Nyasae. Koreng’ana buna ensemo entang’ani ekwera omoroberio o mwanyabanto, ensemo eye nigo
ekwera emeremo ya Nyasae: Nigo akorwa obong’aini; Nigo akogacha abang’aini.
Soma Emereng’anio 2:10-22. Ninki gekoba ekero obong’aini bokonyora obomenyo ime ase enkoro?
“Ekero obong’aini bogosoa ase enkoro,” nigo bogochaka egetambokero kiomoerio ki’ogoonchoka.
Titokogokera okomomanya Omonene gwoka, korende nigo borabe obomanyi bw’omogoko ase
chinkoro chiaito (Emer. 2:10). Nabo igo nigo toraegererwe korwa ase chinchera chiababe (Emer.
2:11), Korwa ase okoebererigwa kw’obobe (Emer. 2:16), na nigo toratare ase chinchera
chi’oboronge (Emer. 2:20)
Soma Emereng’anio 2:13, 17. Ninki kere egetambokero egetang’ani ki’obosaria, na ng’ai kegotoira?

Nonye tore abanyabibe, titogwenereti gosoa ase obosaria boria bokoorokigwa buna chinchera
chimbe goika ritang’ani borwe ase oboeto oboronge. Obobe ase igo nigo bokomanyekana ritang’ani
buna okoremerwa obwegenwa. Ebibe nigo bigochaka buna ase obong’ainereria obonene na botari
na komocha, korende ase egeka egeke omonyabibe tari omosaria rioka igo korende nigo akwegokia
kobokora.
Eke nkegwenerete kogotebia igoro yao omonyene onye, igoro yakanire, tibwegokia gokora
obosaria/ gose goetania, naki onye tori korora ng’a obosaria nobobe bore?
Rituko 5 Januari 1
Tibweba
Soma Emereng’anio 3:7. Mboreba ki boreo bw’okoba omong’aini ase amaiso ao omonyene?
Koba omong’aini ase amaiso ao omonyene nigo koraire omonto korora ng’a tamoganetie Nyasae
erio koba omong’aini. Oko nokoba gotari n’ogosemeria. “Ogosemeria nkore ase omonto omoriri
goetania oyio” (Emereng’anio 26:12). Naende, obong’aini nigo bakoorokigwa buna okwerwa
gw’okwegena. Engencho y’okoba omong’aini n’okorenda amachiko a Nyasae (Emer. 3:1), koorokia
“amabera na ekeene” (Emer. 3:3), naende komosasimera omonene” (Emer. 3:5). Engencho
y’obong’aini nokoba noboamate bwa ime mono amo na Nyasae. Rora buna enkoro ekoirorerwa
boire mono (Emer. 3:1, 3, 5) oboikaro bwaito gochia ase okoiraneria gwaito gochia ase omong’uso o
Nyasae. (Enkoro konye yaikire gokwanerwa ase Emereng’anio 2:10 buna aase obng’aini
bogwenerete gosoa.)
Soma Emereng’anio 3:19, 20. Nase ki okogania kw’obong’aini kore okwengencho enene?
Okoretwa kw’omogano bw’obotongi ase eng’ana eye nigo ekororekana ng’a nigo egosoka isiko.
Korende enchera obong’aini bogokora emeremo ase obotongi nigo ekobeka chinguru eng’ana ere
ase ekebungo 18, eyio ekobwatania obong’aini na omote bw’obogima onye ase obong’aini Nyasae
agatonga igoro chionsi na ense engima, boetanetie ebirengo bi’okobao gwense eye yaito.
Obong’aini mbore noboamate amo n’obogima bwaito bwa kare na kare boigo. Eye nero engencho
y’eleseni eye ase okoraga gochia ase omote bw’obogima, ekeinyorio ki’engencho kiomogondo o
Edeni. Oborori obo naende mboreo ase eira eria y’omoerio ase ekebungo giaito: “Abang’ani mbaire
omwando bw’obonene” (Emer. 3:35).
Rituko 6 Januari2
Genderera Kwegera: Soma Ellen G. White, “Hidden Treasure,” PP. 111-114, in Christ’s Object
Lessons; “A Blessing in The Home,” P.334, ime ya Messages to Young People; “Study of Physiology,”
PP.197, 198, ime ya Education; Ellen G White Comments, P.1156, ime ya The SDA Bible
Commentary, VOl. 3.
“Abasae mbagwenerete komanya ekerengo gi’ekeene kere ase amang’ana a Bibilia ng’a amo na
Nyasae ‘nao ensoko y’obogima.’ Zaburi 36:9. Tari igo rioka are omochaki ebinto bionsi, korende
nobogima bwa kera egento ekio kere moyo. Obogima bwaye nabwo tokonyora ase omobaso, ase
embeo engiya na enyansu, ase endagera eria ekoagacha na korenda emeremo yaito na gotoa
chinguru. Ngoetera ase obogima bwaye intwe tore moyo, ensa ase ensa, edageka ase edageka.
Nonye biaotoranirwe n’ebibe, ebiegwa biaye bionsi nigo bikorwa obogima, emebere emiya na
omogoko.” – Ellen G White, Education, PP. 197, 198.

“Abange babwatete ekerengererio ng’a okwerwa gochia ase Nyasae nigo kore ekegocha ase
obogima obuya, na omogoko ase ogosanga kw’oboamate bw’obogima, korende baria bagotara ase
enchera y’obong’aini na obochenu nigo bakonyora ng’a obonyasae nigo bore obw’okonyora
okonene ase ebinto bionsi obwo bore neira y’obogima obwo bore bono, nab aria bogocha.”
Nigo bare moyo ase okogokera obogima bwekeene nokwegokia.” – Ellen G White Comments, The
SDA Commentary, Vol. 3, P. 1156.
Amoboria Y’ogosanga.
1. Ngoatananeka ki koreo gati ya obong’aini nechisemi/ naki omonto arabe nechisemi chinyinge
korende atari n’obong’aini? Goetania onsi, mbarabi batamanyeti barobwo abanyene gose
bamanyete aake mono igoro, nabande abare nechisemi abwo bakororekana batari
n’obong’aini?
2. Menya ase eng’ana ya “Okoiroka Omonene.” Onye “okoiroka tikoiyo ase obwanchani,” 1 Yohana
4:18), naki toramoiroke omonene na komwancha ase ekero ekio? Naki torakoore
okong’usanana kore gati y’oboronge na obwanchani ase “okomoirka omonene”?
3. Nase ki okoba “abang’aini ase amaiso ao omonyene” kore omochando kobao, mono ekero
tokorora buna enkoro ya mwanyabanto ere enkorekanu, na buna ere aororo ase tore
korengereria buna ng’a mbwa ki toganetie? Rengereria igoro ya baria bagwancherana
n’echimbwa chimbe? Naki toraenekie ng’a titokora bo igo?
Elesen2 Januari 3 – 9
Korwa Amato Gochia Amagoro.
Esabato Mobaso
Egera Echuma eye: Emereng’anio 4, 1 Abaruoti 3:9, Mat. 13:44, Emereng’anio 5, 1 Abakorinto 10:13,
Emer. 6:1-19.
Amang’ana Omotwe: “Rongeyia oboeto bwamagoro ao ne chinchera chiao chionsi chibe chindonde.
Togobera gochia aande, ensemo y’okorio gose ey’okobee. Rusia okogoro kwao korwa ase ebibe
(Emereng’anio 4:26, 27).
Obonyansi bwaorokirie ng’a okoigwa nigo kogoonchora enchera togotara, naende ng’a nonye
nogoikerana kw’ogoonchora enchera togokora, naende ng’a nonye nokoirana kw’ogotenena gwaito
nigo gokong’uswa goetera buna tokoeyana buya ang’ana. Ase igo, amorokererio gose chisemi –
nakwo ogoteba, keria tokoigwa – nigo kere ekiang’encho ase okomenya gwaito. “Obong’aini nabwo
bore egento ekeene,” nabo emereng’anio 4:7 egoteba.
Tari mang’ana naki amorokererio are amaya ang’ana, omworokigwa goika ayategerere. Tari ase
okogania kw’oborimo omworokia o Misri yakare nigo amanyete ng’a “amato y’omwana omomura
nigo arenge ase omogongo oye; nigo akoigwa ekero aakirwe.’ (Ase oboonchori bwemegwekano bwa
Misri, omworokigwa nigo arenge komanywa ase amato amanene ase omogano oye).
Okomanya igoro ya amaya na amabe gwoka tigoisaini; ntogwenerete komanya gochora amaya na
amabe. Okworokereria ase obong’aini nigo kore amo nokoigwa amorokererio amaronge, na
gotunyana na koigwera keria twaeirwe erio titokorera gotara ase enchera embe.
*Egera eleseni y’echuma eye bweariganie ase Esabato, Januari 10

Rituko 1 Januari 4
Igwa!
Soma emerenng’anio 4. Nkeene ki kia maiso marore kegotoka aiga, naende naki toragekore
emeremo ase obogima bwaito abanyene ekero tokorigia komenya n’obwegenwa na Nyasae?
“Okoigwa” nigo kore egotambokero egetang’ana ase chisemi. Ase ekerengererio kiabaiberania
ekerogo kiobong’aini gose obomanyi nigo kebekire tari ase oboronge korende ase amato. Engencho
yaye neye ng’a totararigia gokonya omochando, ritang’ani goika toyaigwe. Engencho yaye neye ng’a
goika toyotegerere. Ekero Sulemani agosaba obong’aini, ere nigo agosaba “enkoro y’okoigwa” (1
Abarwoti 3:9).
Ogokora ogotang’ani kw’obong’aini, aseigo, “nogotegerera,” ekio gekworokia ng’a obong’aini nigo
bakorwa korwa isiko (ase abaibori). Titokomanya obong’ani intwe abanyene . Ogwetonga intwe
abanyene negento getakonyarekana ase ekerengererio ki’obong’aini bwa Bibilia. Ritang’ani
obong’aini n’egento tokonyora, tari egento tokorosia goetera ase obomanyi bwaito abanyene gose
togokunya korwa ase obwoge na okorengereria gwaito. Ekerengo ki’ogotegerera (ase ekeiberania,
“kobeka enkoro yao”) nigo gekoraga okobekwao gwenkoro. Okorigia kw’obong’aini, ase igo, tikori
oboonchoreria obokendu. Enkoro, eyio ere enkorekero y’omonto na (ase ekeiberania ebirengererio)
ekerogo kiebirengererio, nkobwaterana ere ase okorigia obong’aini.
Soma Matayo 13:44 na Yeremia 29:13. Mboamate ki okonyora gati y’ebibungo ebi na okorigia
obong’aini buna bikwerwa ase Emereng’anio 4?
Okweigwa nkobwate ensemo enene ase obogima bwaito buna mwanyabanto, na ase igo
titokonyara na titogwenereti gosiererigwa ase oboamate bwaito na Nyasae. Naki tokwegera ensemo
etogwenerete n’erigori riokoigwa ase obogima bwaito bw’ekemoika? Naki okweigwa kwao
kwagosukirie buya (naende bobe), na ninki kwegeire korwa ase obomanyi bwao?
Rituko 2 Januari 5
Egerera Eamate Yao.
Ekero twachorire gotara aase enchera y’obong’aini, netogwenerete korenda mono ekiagera
ntoumerane n’ebigocha ase enchera (rora 1 Pet. 5:8). Omochando oyomo omonene tokonyora nigo
ore igoro y’echiamate chiaito, echiengencho enene, chigotwechandera, na oboamate bwa ime
mono bw’obogima.
Soma Emereng’anio 5. Nkorwa ase mechando ki togwenerete gwetanga?
Omochando omotang’ani nigo ogochaka naintwe abanyane; nigo ore ase amang’ana aito.
Netogwenerete korenda chimeme chiaito koenekia ng’a aya togokwana tari koraria obotomwa
boburukaine gose botari ekeene. Ebikoba biaito goika bibwatane na obomanyi bwaito, na goika
biorokie okorora gw’okwegena gwaito.
Omochando o kabere nigo okorwa ase omokungu onde gose omosacha onde (nonye n’ekebungo
gekoraga ase omochando ogocha korwa ase “omokungu omogeni,” omonwa oyo n’ogwenerete
koigweka buna ororeria; (amatemwa nabo ararwe korwa ase omosacha gose omokungu) aria
akoburukania eamate. Onde ase aba nabo arang’aine oyo bwaeamate kobuna chiira ch’ienywomo,
na ning’o otana korora eke, gose komanya buna ekebe eke nekiogosaria mono?

Koreng’ana na ekebungo, enchera engiya y’okorwania amatemwa aya, ayio agochaka ase
amang’ana y’okoebereria, n’ogotegerera gochia ase amang’ana y’obong’aini. Goetera ase ogoitaba
na koigwera amorokererio autire n’omoika, nigo tokageire koba noborori n’ebinto bi’engencho na
ase igo, korendwa korwa ase obotomani gose gotemwa konde gwensi kogotochera.
Ee, titogwenereti gwetanga rioka korwa ase obotomani, n’etogwenerete gwetanga korwa ase
okogenda ase omokungu omotomani amenyete (Emer. 5:10), titogweenereti goika ase egesieri
kiaye (Emer. 58).
Omoerio, kero kende oboegereri obuya ase bionsi korwa ase amatemwa y’ogwancha omokungu na
omosacha onde, nobo: bwanche “omokungu na omosacha bw’obosae bwao” (Emer. 5:18). Omoriki
bw’egetabu ki’omorandia nigo akoreta ekemanyererio eke:”omenye n’omogoko na omokungu oo
bwanchete ase amatuko ao onsi ore ase obogima obo Nyasae akoeire inse y’erioba (Omorandia 9:9).
Iraneria ng’a mbuya mono ase keria obwate, naende tokonyara korigereria gochia ensemo.
Soma 1 Abakorinto 10:13. Amo n’eira eye bosio bwao, mbitambokero ki bia maiso marore
ogwenerete koira, bono iga; erio kweegerera korwa ase okogania okwo eranyarekane kogenderete
korwana korwa ime yao?
Rituko 3 Januari 6
Eegerera Obosani Bwao
Engaki eyemo omonto oyomo natebete: “Omonene ng’egerere korwa ase abasani bane; nabo
nderwanerere korwa ase ababisa bane.” Egetabu ki’emereng’anio ngwechandera kere oboreu
bw’obosani; nigo kegotosemia buna toranyare kobarenda abasani baito na boigo, onye ekobetereria
buna toreegere korwa ase bare. Ring’ana ri’ekeiberania rigoonchorwa“obosani” naende nabo
riraonchorwe buna “oboamate,” oria ore ang’e nase tore, oria ore omosani gose oyorabe omosani.
Rigori ri’obong’aini bwa Bibilia, oboamate bwa mwanyabanto, na okoborigwa gw’okoba
n’ebirengererio ebiya na amasikani ase oboamate obo.
Soma Emereng’anio 6:1-5. Mochando ki Sulemani akoraga aiga, na naki orakonywe? Machiko ki
y’ekemoika y’engencho tokonyora aiga boigo?
Nonye ebitabu bia amachiko bigotoboria tokonye abataka na kobaa chibesa totari kobasaba singo
(Okong. 22:25), ebitabu bi’obong’aini nigo bigotokurera mamincha y’ogosiba abanto bare namasira.
Emeremo y’ogokonya teri gosiekerera ogokurerwa kw’oboronge (Okong. 23:2,3). Nonye
getogwenerete koba n’enkoro y’okorwa ekero tokonyara, netogwenerete koba abang’aini ase
okoenekia ng’a obuya bwaito tiboonchoka koba okogwa (gwekania Emereng’anio 22:27).
Nakio gekogera toeire obosemia obwo bore ase Emereng’anio. Ogokurerwa ogotang’ani nigoro
yamang’ana aito. Naki ere egento ki’eng’encho koreenga na koenekia ng’a nabo tokonyara gokonya
abasani baito. Onye kere bo, rirorio kwana na koria eira. Amaene, riberera rioboamate bwaito gose
chingaki chi’okoberoroka bosaigo nabo chiraayererie okwerwa gwaito, naende, toche gweitia korwa
magega.
Tari mang’ana ng’a naki kwabwate ebirengererio ang’ana, n’egento ki’engencho enene korengereria
otarakora na kwerwa gochia ase egento ekio otanyare goikerania. Eng’ana neye ng’a toise gwesiba,
goika tokore buna toranyare goikerania bo amo n’ogwekonya intwe abanyene gwancherana
amamocho aito, na gosaba toegwe obuya bwa Nyasae.

Naki toranyare kwegera koreng’ania okogania gwaito gw’okobogorerania chigurube (Gal. 6:2) amo
namang’ana toeire ase Emereng’anio?
Rituko 4 Januari 7
Eegerera Emeremo Yao.
Soma Emereng’anio 6:6-8. Ninki toregere korwa ase amage?
Tari rioka ng’a amage ngokora are omokia (omokia goetania mwanyabanto, omonto aise
kogwekania eguruba akanyara kobogoria neria omonto akobogoria koreng’ana n’oborito bwabo),
korende amage nigo agokora emeremo n’obosibore naende taganetie arendwe. Ekerenga ekenene
ki’emeremo y’aro n’amatuko are bosio. Nigo “aganyete” chingaki chi’emechando (obokendu) na
earigania aro amanyene ase emechando eyio. Ase igo, amage nigo agotwegeria obong’aini
bw’okorengereria igoro y’echingaki chia bosio ekero tokorosia emeroberio yaito na gokora gokora
emeremo. “Eye n’eng’ana egwenerete korengererigwa mono na kera omoibori, kera omworokia,
kera omworokigwa – kera omonto, - omoke gose omonene. Meremo teiyo gose omoroberio
bw’obogima orabe omoikeranu gose omuya oria okorigereria chingaki chinke chi’obogima bwa bono
na tekorwa ribaga ri’echingaki chitari koera chia bosio.” Ellen G White, Education, P. 145.
Soma Emerenganio 6:9-11. Ninki toregere korwa ase omworo?
Omworo nere ore n’egento aregere korwa ase amage, korende tari onde bwensi: “Genda ase
amage, aye omworo; origererie orore buna agokora emeremo n’omokia oyore obong’aini”
(Emereng’anio 6:6). Ekero amage are ase emeremo, omworo ere nigo araire. Ekero amage
agendererete korosia rigesa, omworo ere nigo agendererete gokorekania amaboko aye aye abere,
ekiorokererio gi’okobaracha. Amage nigo akwemiga ase okobogoria chigurube chindito koyaetania
na ase okwearigania ase amatuko are bosio; omworo ere nigo amenyete ase amatuko a bono na
kwerosia ase aro oka.
Nonye okobaaracha na obworo bikogikerigwa aiga, goika toinyore ng’a obogima tibori ase ogokora
emeremo na konyora chibesa. Naki Esabato, buna ekoorokigwa ase echuma y’emeremo, eratokonye
kobeka ebinto bionsi ase biganeirie?
Rituko 5 Januari 8
Eegerere Aya Omonyene.
Gatwaikire gokurerwa mamincha y’obobe boria bokogosa chinsemo isato chi’obogima – chiamate
chiaito, ogosanga gwaito, na emeremo yaito - Emereng’anio nigo egotworokia buna abanto ababe
bagwatorwa. N’eng’ana y’ogochecheria eichire n’okogwekanigwa okonge na oborori obonene
bw’ebirengererio. Amatera abere (Emereng’anio 6:12-15 na 16-19) nigo atari koumerana ande na,
ase eriogi erimo ria aria atano na abere, agokuna ebirenga abwate. Ime y’omonto omobe nigo
okobwatanigwa na keria gekorengererigwa ime y’enkoro; ase ekero ekio nigo gekoorokigwa na keria
kegokoreka isiko.
Soma Emereng’anio 6:14,118 na matayo 15:19. Ing’ana ki y’engencho ekoorokigwa aiga?
“Oise kwebeka ase okorengereria kwa bosaigo, gwanchera ebirengererio biao koong’anya ase
amang’ana amabe, aye nigo, ase ekerengo, ore omomochi bosio bwa Nyasae buna ndiria
ebirengerio biao biabegetwe ase ebikorwa.” Ellen G. White, The Adventist Home, P. 334.

Ebicha eye nigo ere omogwekano. Omonto omobe ogotera nigo akobwatia omworo. Ebirengererio
nigo ebi bibere nigo bikororekana koba ebiogwataneka, korende nigo bibwate amorokererio ayamo.
Bionsi nigo bire ime yabo. Kende nkeiyo kere nokogania kwa amorokererigwa akorwa korwa isiko
ase bire. Bonsi nigobakobwatia obong’aini bwabo abanyene bwabo abanyene na emeng’uso. Aboro
ni baraire, nande nonye n’amato gose amagoro tari gokora emeremo; ase abakori amabe amagoro
abo na emenwa yabo bioka nabio bigokora emeremo, korende tari amato abo. Okwama nigo
kogwekaine: bonsi mbasoe mbasarigwe.
Korende bono, obobe mbobwate chinsemo ibere: tibori gosionora abanto, baria boka bakoreirwe
bobe, korende abanyabibe abanyene boigo. Abanga’inereria omoerio nigo bakwegena oborimo
bwabo. Naende nabo egwenerete komanywa ng’a okwana kw’obosaria nigo gokoreta
ogwatananeka n’echisegi, ebio bigosaria eamate boigo. Ee, eki ebibe bikoreta, tari mono, onye
gekoba, kegotigarera abanyabibe. Abande nigo bagosionorwa, naende ara aange bobe mono.
Naki ebibe biabande biasaririe obogima bwao? Mono, tang’utang’u etaiyo. Inki oregere korwa aiga
buna ekogwenerete korende mono erio ogokora kwao tigosionora abanto bande?
Rituko 6 Januari 9
Genderera Kwegera: soma Ellen G White, “Moral Standards,” PP. 326-339, in The Adventist Home;
“In Contact With Others,” PP. 489-491, ime ya The Ministry of Healing; “Other Object Lessons,” PP.
17-120 ime ya Education.
“Omosomi o Bibilia nagwenerete kwegerigwa koyesoma n’omoika bw’omworokigwa.
Netogwenerete korigarigia amasakara aye, tari ase okoenekia erio kogendereria ebirengereria
biaito, korende ase okomanya eki Nyasae ogokwana….
Egento ekemo ekenene gekoreta ogotaikerana kw’obongo na oboreu bwembwa n’ogotemwa
korigia mono…. Ekero amang’ana amaya agenderere korikwa ase chinyomba chiaito chikorika
ebitabu nagocha ase tore, abanene ase abake benarire ogosoma kwa bwango na kwa igoro igoro
gokeigo, na ebirengererio biaito bisiria okobua kwaye gw’okobwatana na okorengereria okonene,”
Ellen G White, Education, P. 189.
“Obomenyo boria amage akweroseria nigo bokworokia obomanyi na oborendi. Enyeke eyemo yoka
ase engaki eyemo nero akobogoria, korende ase obong’ani na oboremereria aikerania amanene.
“Sulemani nigo akoraga gochia ase omokia bw’amage ase agosookia baria bagosaria chingaki chiabo
ase okobaracha bosa gose ase ogokora koria kogosaria enkoro na omobere. Amage nigo
ekwearigania ase chingaki chigochia gocha; korende abange abare nekeegwa gi’okobua
gw’okorengereria nigo bagosinywa kwearigania ase obogima bw’ogotasareka bogochia gochia
gochia.” Ellen G White, Councels to Parents, teachers, and Students, P. 190.
Amaboria Y’ogosanga.
1. Menya ase ekerengererio eke buna tarakonye abande, nonye nkorwa ase embonga yaito
abanyene. Naki tokorigereria buna eleseni y’echuma eye egotwegerie ekero okoyegwekania
ekebungo eke: “Onde tari ore nobwanchani obonene buna obo bw’omonto akorwa obogima
bwaye ase engencho y’abasani baye.” (Yohana 15:13).

2. Inki kende naende torarusie ase obotongi ekio torabeke ase obokoreri bw’obogima bwaito
abanyene? Nonye tari mang’ana, ense kegwete, nase ki etogwenerete korenda ng’a ninki
tokorusiao?
3. Soma ebinto bi’okogechia bitano na bibere ase Emereng’anio 6:16-19. Nase ki okorenga
bikororekana bire ebibe mono ase amaiso a Nyasae?
Eleseni 3 Januari 10-16
Eng’ana Y’obogima na Amakweri
Esabato Mobaso
Egera echuma eye: Mat.5:21-30; Emer. 6:21, 7:3; Emer. 6:23; 7:2, 6:24, 6:30, 31, Emer. 7:26,27.
Amang’an Omotwe: “Amachiko nigo are etaya, na amorokererio nigo are oborabu; Ogokurera gwoka
gw’okorongeigwa nigo kore enchera y’obogima” (Emer. 6:23).
Abamura abamo babere mbatigetwe boka bare inka, korende bagakanigwa mono ng’a tibaria ekeki eria
konye arosirie. Erio koenekia ng’a abamura aba baigwereire, akabagosereria egesusuro ekero barakore
bo.
Ekero agendete, ekaira abamura baria egeka egeke konacha ekina konacha ekeki eria nonye nabo. “Eke
tikeri egento kiobogima na amakweri,” bakarengereria igo.”Baba tagotoita tokwe; ase igo tiga torie!”
Ase omworokia ime ase Emereng’anio, ee, eng’ana agokwanera nigo ere ey’obogima n’amakweri. Nigo
akoyekwana ase chinguru na kero kende aase ogotengechigwa. Ee, Yeso nakwanate ere bweka
omonyene n’echinguru ekero arenge gokwana amang’ana y’obogima bwa kare na kare na amakweri
(rora Mat. 5:21-30). Naende gokumia tikoiyo. Ase omoerio, okorera gwaito, obokare na kare bwaito
(naende ninki kerabe ekiengencho goetania igo?), nigo kore ase ogochora okwo togokora aiga. Ase igo
goika tobe abango koigwa oborito bw’omonwa ogokwanwa aiga.
Rituko 1 Januari 11
Ogochika na Obogima Bwaito
Soma Emereng’anio 6:21 na 7:3. Ninki togwenerete koigwa omogwekano bw’omobere ore ase ebibungo
ebi igoro ng’a mboamate ki torabe nabwo na ogochika kwa Nyasae?
Buna twarora ase eleseni yaeta, ase emereng’anio enkoro nigo etenenerete ekerogo giokweigwa na
ebirengererio. Gototeba ng’a tosiberanie amachiko ase chinkoro chiaito (Emer. 6:21), ekerenga
ki’omworokia nkeria ng’a goika botambe tobe n’ooboamate bwaang’e mono n’amachiko. Ingaki teiyo
togwenerete gosiria ogosanga n’amachiko, ekiagera amachiko naro agotworokia ebibe (Rum. 7:7).
Omworokia boigo nigo akobeka chinguru ng’a amachiko aya nigo agwenerete koriikwa ase chibao
chi’enkoro (Emer. 7:3), koreng’ana na amachiko arigetwe na Nyasae ase chibao chiamagena (Okong.
24:12)
Gokwanera igoro y’amachiko arikire ase enkoro nigo ekworokia ng’a, amachiko tari ebinto bia isiko
bi’emeroberio egotobetereria. Amachiko goika asoe ase okogania gwaito, ebirengererio biaito bia
bobisi, na abe ense yaito eyemo ya ime. Nokoorokigwa konde g’wokoba n’echiira chikwanire na Paulo
chia “Kristo ime yaino n’ogosemeria kw’obonene; (Kol. 1:27) koba ensemo y’obogima bwaito.

Gosiba amachiko ase ebiara nigo ekoraga okobeka amachiko ase kera ogokora. Omworokia nigo akoraga
ebiara koorokia ogokora okworo na okwaime mono. Amachiko tagwenereti gokuna ogochora gwoka
okonene korende ogochora ogoke boigo (rora Luka 16:10).
Nonye ekerenga gia Bibilia gi’echibicha echi kiarenge emereng’anio, negwenerete kororekana ng’a
emereng’anio eye nigo yarusigwe ase chingencho chia Abayaudi, abakristo na abaislamu. Nigo
akororekana korwa ase okweboyia kw’emetwe y’abagendi na chibeta chiebiara, emesalaba ase ebigoti
biabakristo, n’echibeta ase ebiara biabaislamu (na abakristo).
Emereng’anio nabo erabe ey’engencho, korende nase ki togwenerete korenda titobeka emereng’anio
ribaga r’iebinto biria bitenenerete?
Rituko 2 Januari 12
Oborabu na Obogima
Soma Emereng’anio 6:23. Naki amachiko akobwatanigwa na “obobui”?
Ime ya Bibilia, riang’ana ria Nyasae, gose amachiko aye biareng’anigwe na oborabu: “ring’ana riao
n’etaya ase amagoro ane na oborabu ase oboeto bwane” (Zaburi 119:105). Ase ebirengererio bia
abaiberania oboamate mboreo gati y’ekerengererio “kiogochika” na “ekioborabu.” Koreng’ana buna
etaya ekomoreka ase oboeto ase togotara, amachiko nigo aratokonye gotigara toteneine ase enchera;
nakwo ogoteba, ekero ekobetereria gochora igoro y’echimbwa nigo aratokonye komanya ng’a okonacha
okuya nkoroki, nonye kero kende okorengereria gwaito ogokagera gw’okonyara gwaito kogototema ase
ogosiereria ogochika.
Megwekano ki okonyora ime ya Bibilia y’abanto baria bachorete kobwatia amachiko a Nyasae nonye
barenge n’esegi enene y’okoyasiereria? Ninki toregere korwa ase oboigweri bwabo? Nase kero ki, onye
koreo, ogochora kwabo kw’obwegenwa kwarorekanete koba okobe korwa ase okorora kwa
mwanyabanto?
Amo na Emereng’anio 6:23, soma Emereng’anio 7:2. Nase ki ogochika gokobwatanigwa “n’obogima”?
Korwa ekero okogwa gwachete, ogosemeria gwaito kw’obogima tigokonyorwa aase amachiko, korende
rioka goetera ase okwegena ime ya Kristo. Nonye nabo, okoigwera amachiko na emeroberio eria
atenenerete nigo agendererete koba n’ensemo enene ase obogima bw’okwegena (rora Mat. 19:17,
Okom. 14:12). Nigo tokoigwera ekiagera, buna omonene atebetie Abaisraeli emiaka chilifu yaetire,
“inche ninche omonene Nyasae oo” (Abal. 18:4). Ogochika kwa Nyasae nigo kore n’oboamate na
“obogima,” ase engencho ya keria Nyasae are – ensoko y’obogima. Ogochika oko nigo gotenenerete
obogima bw’ekemoika bw’ekeene: nigo tokomosemeria Nyasae nechiira chiaye ch’iobogima bwa kare
na kare.
Yeso akobora: “inche n’omobaso bw’ense; oyogontunyana takogenda ase omosunte, korende nabe
n’omobaso bw’obogima” (Yohana 8:12). Naki kwanyorire obomanyi bwekeene giechiira chiogokumia
ase orogendo rwao n’omonene?
Rituko 3 Januari 13
Korwana Amatemwa.
Buna twaikire korora, omoriki bw’emereng’anio 6:23, inse y’oborai bw’omoika omochenu, nigo
akobwatania oborabu na obogima gochia ase amachiko a Nyasae. Ase oborabu bw’ekebungo eke nigo

akorwa ekiokererio egegekong’u buna naki amachiko, buna oborabu na obogima, aratoe oborendi
bw’okobua bw’ekemoika.
Igoro ya gento ki togokurerwa ime ase Emereng’anio 6:24? Goetania ayabotambe, ninki kende
ki’obong’ainereria mono togokurerwa aiga?
Ekero omonto omwegenwa agotemwa, ogotemwa okonene nakorigia kende giokwegena ekio keragere
obosaria. Komobeka Nyasae ase ogokeyia chimbwa tichirorekana chimbe tikeri okomorama Nyasae
rioka igo – nigo kere okweng’aina okonene. Nonye nabo, omonto aise gokagera ase okorengereria ng’a
“Nyasae nare nainche,” rirorio ninki orairanerie? Eke nabo keranyarekane nonye nase obotomani.
“Nyasae ong’orokirie ng’a (omosacha/omokungu) oye nere ogwenerete koba nere. Onye ekio nakio
begenete, ning’o gose ninki keranyare kobua eki “Nyasae” abaorokirie?
Rora, boigo, tari obosera bwokororekana kw’omobere gwoka okwo kwamong’usire. Nigo agokwana
amang’ana y’obong’ainereria, erio komong’usa oy’atagete gocha ase oboeto bwaye. Nara karenga
abasacha na abakungu bairirwe ase akobwatana n’echinchera chi’obong’ainereria n’amang’ana amansu
– na amango y’okoebereria, kero kende agokwanwa ase omonwa bw’okwegena? Omoriki bw’egetabu
ki’emereng’anio nigo arigetie gotokurera korwa ase amang’ana ayio.
Amachiko namaikeranu mamincha ya “oromeme rw’obong’ainereria.” Ensemo ebetereretie y’ogochika
yoka, tegotokonya kwanga amang’ana agotoebereria, ayare y’omong’uso ayio akorenta ase
ebirengererio ase amachiko aratokonye kwanga amang’ana abo amansu, ayio akoigweka ng’a namaene
na amasera. Amaene, abakungu abaegi tibagokonyora kore nekieni rioka igo korende naende kore
omong’aini na omwoge. Nabo orabokie okogania kwaye gw’ekemoika; korende mamincha y’ayio, bobe
mono, “obwanchani bwa Nyasae” nabo borabe egento akobarera ebibe biaye oboronge.
Rengereria buna toragwe ase obwororo, nonye nase okororekana gw’okwegena ase okoegerera
ebikorwa ebibe bia ngencho ende yonsi, tari obotomani bwoka. Nase ki, ase igo, okwerwa kegima gochia
ase ogochika kwa Nyasae kore obotamero bwaito bwoka mamincha y’ebirengererio biaito abanyene na
obong’ainereria boria biratoretere?
Rituko 4 Januari 14
“Toiba”
Gaikire gotokurera igoro y’obotamani (Emereng’anio 6:24-29) omoriki nigo agochaka gokwanera ekebe
kende: oboibi (ebibungo 30,31). Oboamate bare gati y’amachiko aya abere (obotomani na oboibi) nigo
bokworokia ng’a naki ogotaigwera kwa amachiko korasarie okoigwera gwaito gochia ase abande.
Ekerengererio ki’ogwancherana, kobogoria na gochora koreng’ana namachiko a Nyasae, nigo korabe
okobe mono goetania ogotaigwera gwonsi kw’amachiko. “Chindwaki chinkong’u mono chi’obotamera
chiense eye yaito tari obogima bw’bosaria obwo omonyabibe atigire gose ogweatanana; ribaga erio
n’obogima boria bokororekana buya, bw’esiko, na obonene, korende boria bogokina ase okorendwa na
batari kwegokia ase ebibe…. Ere oyoeirwe ebirengererio ebinene bi’okomanya bi’obogima na ekeene na
amasikani, oyogosaria ase ogwancha amachiko a Nyasae amachenu, oonchoire ekeegwa kiaye gochia
akoriegwa n’ebibe.” Ellen G White, Education, P. 150.
Soma Emereng’anio 6:30, 31. Ninki ebibungo ebi bigokwanera igoro ya egento nonye n’omonto oria
otang’ang’ete arakore?
Obotaka na okogania tibiri korwa ribaga ri’okoba. Omoibi nigo are omomochi nonye kare “ang’e gokwa
ase enchera” (ekebungo 30). Nonye omoibi ore nenchara tagwenereti gosiererigwa, goika airanie ara

gatano na kabere ki’ebinto biria aibete; eye nigo ekworokia ng’a nonye n’oboremeria bwaye tibori
komoa ribaga ri’okoiba. Ase enchera yende, Bibilia nigo ekobeka chinguru ng’a n’emeremo yaito
goikerania okogania kwa abataka, erio tibaigwa basugumire koiba ase okogendereria obogima bwabo
(Okoir. 15:7, 8)
Naki ere egento kiomong’uso omonene ng’a gaikire korwa ase obotomani gochia ase oboibi, amariko
naende nigo akoirania gochia ase obotomani (Emer. 6:32-35). Ebibe bibere nigo bikomochia kogwekana.
Ase chinsemo chionsi omonto nigo akoira egento getari ekiaye ase enchera, ekio kere ekiomonto onde.
Ogoatananeka okonene kore aiga, nonye nabo, gati y’okoiba na obotomani nigo kore ase ekeene ng’a
ekebe egetang’ani (okoiba) nigo kore igoro y’ogosiria egento, ekero okwo konde kore igoro y’egento
ekenene. Kero kende omonto nabo areegerere egekogera aibe egento, ase ekebe ki’obotomani, mono
ekero abana bagwesoyia, ogosaria nabo korabe okobe mono goetania ekere igoro y’okoiba.
“Totomana.” Ogochika oko nigo kogokana tari ogokora okobe gwoka, korende, ebirengererio ebibe na
okogania, gose ogokora konde gwonsi okwo gokobokia okogania okwo…. Kristo oyio bwegeretie
emeremo emenene y’ogochika kwa Nyasae, nararetie okorengereria okoba gose okorigereria koba
ebibe buna ogokora mamincha y’ogochika.” – Ellen G White, Patriachs and Prophets, P. 308.
Rituko 5 Januari 15
Okogosa kwa Amakweri.
Abanto abange tibari korengereria igoro y’amakweri ekero bagokora ebibe; nigo bare n’ebinto binde
ebiao ase ebirengererio biabo, mono egento kia ang’e mono, n’ogweisanekia na kwegokia okwo
bakonyora korwa ase ebibe. Tikeri gokonya, nonye nabo, ng’a chinchera chia abanto bande nchisigete
obotomani n’obosaria bonde. Mamincha y’ayio egetabu ki’emereng’anio nigo gekobeka ebibe ase
bigwenerete koba, eng’ana eyio egokwanwa emiaka emenge bosio amo na Paulo: “Eng’eria y’ebibe
n’amakweri” (Rum 6:23).
Soma Emereng’anio 7:22, 23. Inki gekogera omotomani are omonto ore ase omochando bw’amakweri?
Oy’okogenda “ase are” nigo agokwanerwa buna omonto oyo bwetugutire na osiririe okogania gw’okoba
moyo. Tari na birengererio naende. Ring’ana ‘erio kegima’ nigo rikoorokia ng’a tari koira chingaki ase
okwerengereria mono. Nigo akoreng’anigwa eeri “ekoirwa konyenywa,” gochia ase omoriri oyokogenda
“gosangereria ebitigari,” na gochia ase enyoni eyio “ekoayerera gochia ase omoeto.” Onde taiyo
okoinyora ng’a obogima bwabo nigo bore ase omochando.
Soma Emereng’anio 7:26, 27. Ninki gekogera omokungu omotayayi akoba n’okobua gw’okoreta
amakweri?
Nabo ekonyarekana ng’a omokungu ogokwanerwa aiga nigo aetanetie “omotomani” bosa igo. Amaene,
nigo agotenenera ebinto bire mamincha y’obong’aini. Sulemani nigo agokwana omoreng’anio oyo
gokurera abasomi baye mamincha ya nchera ende yonsi y’obosaria. Omochando nigo ore omonene,
ekiagera omokungu oyo tarigosionora rioka igo; nigo agoita, na okobua kwaye nkoria ng’a oitire nonye
nabasacha baria abakong’u. Ase amang’ana ande, abande bosio bwao, abakong’u gokobua, tibanyarete
koba moyo ase amaboko aye. Omonwa eng’ana eye egokwanerwa nigo ekoorokia ng’a omoriki o Bibilia
nigo agokwanera mwanyabanto bonsi (ring’ana ri’ekeiberania Sheol ase ekebungo tiribwati kende igoro
ya “aase abakure,” buna egokwanerwa mono; nigo rikoraga aase aria abwo bakure bono bare; oboina).
Ase omoerio, eng’ana n’eria ng’a ebibe, ebe obotomani gose kende ekeao, nigo kegoita, mamincha
y’obogima bwa kare na kare obwo Nyasae aganetie twensi tobonyore goetera ase Yeso Kristo.

Tari ogokumia, buna twarora okoigorera gw’esabato, nigo egokwanwa nechinguru – nigo tore, ee,
namang’ana y’obogima na amakweri.
Rengereria igoro y’abanto “abakong’u” abwo bagure ase enchera enene. Ninki gekogera eri
riragotengechie mono aye omonyene? Inki kere egekengero kiao?
Rituko 6 Januari 16
Genderera Kwegera: “Saitani nigo agokoa oboruoti bwense onye gokogwa inse y’okobua kwaye. Abange
nigo bagokora igo na gosiria igoro. Mbuya gokwa kobua gokora ebibe; mbuya koremerwa kobua
korianania; mbuya koba inchara kobua kong’ainereria.” – Ellen G White, Testimonies for The Church,
Vol. 4 P. 495.
“Chora obotaka, ogosekererwa, ogoatananwa korwa ase abasani, emechando y’ende yonsi kobua
gosaria omoyo na ebibe. Gokwa ntarasaria ogosikwa gose ntarasaria amachiko a Nyasae nakio
kegwenerete koba ekerenga gia kera omokristo. Buna abanto abwo twaonchoreirie, aba twanchire
ekeene ekenene, ekegochena ki’ering’ana ria Nyasae, goika toimokererie ekerengo igoro goetania
chingaki echio chia bono,” – Ellen G White, Testimonies for The Church, vol 5 P.147.
Amaboria Y’ogosanga.
1. Nanki torarende mono oborito na okong’uswa kw’ebibe totari kogwa ase omoeto bw’okoboka?
Ase ekero ekio, naki toraigwere ogochika kwa Nyasae totari gwesoyia ase okwerigeria oboronge
goetera ase aro?
2. Soma Okong’anya 20:1-17. Naki amachiko onsi ikomi abwataine okomo gochia ase okonde?
Nase ki, onye tokobuna okomo kwa amachiko moeneno, ekonyarekana ng’a twabunire onsi
boigo? (rora Yakobo 2:11) mogwekano ki oranyore ase ogosaria kw’ogochika okomo kwagerire
onsi gosarigwa?
3. Menya ase ekerengererio ng’a naki abanto barabogorie edini erio koegerera ogokora kwabo
okobe. Tikeri egento egekong’u gokora bo, mono onye kogotema koimokereria obwanchani
igoro buna ekerengo ki’oboronge na obobe. Nonye nabo, rengereria igoro y’ebinto ebibe bionsi
ebio biakorirwe inse y’ekiriria kia “obwanchani.” Naki, rende, ogochika kogendererete koba
enchera y’okoegerera abanto, korwa ase bare barabwo abanyene gose abande, abwo kero
kende barairwe ase ebibe?
4. Rora okoboria kore agwo omoerio bw’eleseni ya rituko ritang’ani, eyio ere igoro
y’ebimanyererio bi’amamocho ribaga ri’ekeene. Naki orakore igo? Omogwekano, naki
ogosasima emegwekano korabe enchera eyemo yogokora igo? Megiro ki, eyio ere emegwekano
yekeene gi’ekemoika, eyio erabogorigwe koba ekeene?
OBONG’AINI BWA NYASAE
Esabato Mobaso
Egera Echuma Eye: Emer. 8:1-21, Mat. 16:26, Emer. 8:22-31, Omoch. 1:31, Emer. 8:32-36, Emer. 9:1-18.
Amang’ana Omotwe: “Omonene nigo arenge nainche korwa omochakano bw’echinchera chiaye, agwo
kare konye ataratonga kende gionsi.” (Emereng’anio 8:22).

Ase ekerengo eke ase emereng’anio, obong’aini nkooroka bore naende (rora Emer. 1:20, 21), naende
nigo ekororekana buya mono korwa ase ekebungo gi’echuma eye ng’a obong’aini nigo bore ekeene –
ekeene buna kere ime ya Nyasae, ensoko na oboroso bw’ekeene gionsi. Eriogi eri ase embwa “yonsi”
yekeene nigo ekogwekanigwa n’okorengereria gwekero egeke, mono ase chinse chiabanto ba
bosongo,ase ekeene gekororekana getari n’oborito, gekogwekanigwa, kere enchera y’okomenya, ase
ekeene ki’omonto oyomo kere ekeao korwa ase omonto onde.
Korende ekerengererio eke tikeri egia Bibilia. Ekeene kiane negwenerete keegwekane ekiao, ekiagera
“ekeene” nigo kere ekemo ande onsi. Tikeri kionde omonyene, korende ekiabanto bonsi, abanto bonsi
ngokerora bare gose tibari gokerora
Egento giokogokia mono, n’okoboria gwa Pilato,“Ninki ekeene?” (Yohana 18:38), nigo gwachete ase
okoiraneria eng’ana ya Yeso, “kera oyore bw’ekeene nigo akoigwa eriogi riane” (Yohana 18:370. Ekeene,
ekeene gionsi, nkereo, naende nigo kegokwana naintwe; ekere ki’engencho ase tore neke ng’a gose
ngokeigwa tore gose yaya, naende ngokeigwera tore, eki kegokwana.
Rituko 1 Januari 18
Obong’ani Bw’ogwaka egeturi
Soma Emereng’anio 8:1-21, koreng’ana n’ekebungo eke, ninki kere rigori ri’obong’aini?
Obong’aini nigo bore obweng’e ekerengo boganeirie boikere kera omonto. Nyasae nere otongete
obogima bwa mwanyabanto bwonsi, na Kristo nigo akwerete kera oyomo oito. Ase igo, obong’aini,
chisemi chia Nyasae na ogotooreka koria akorwa, nigo bore obwa kera mwanyabanto.
Rora amang’ana akwera obong’aini na okobao kwaye: “goaka egeturi,” “koimokereria eriogi igoro,”
bokorangeria” “bogokwana,” “bogoaka eriogi” “bokoigora ebikoba” “omonwa” “ebikoba,” “amang’ana.”
Nonye omonto okoigwa emereng’anio eye, egento gekoigweka buya nkeria ng’a obong’aini
mbogwenerete gokwanwa; mbogwenerete koigugwa na bonsi abagotegerera. Nonye nabo, buna
twarora echuma eria yaeta, eki obong’aini bogokwana n’amang’ana y’obogima na amakweri.
Ara gatano na gatato obong’aini nigo bogokwanera igoro y’ekeene kia amang’ana ase okwerwa
kw’obong’aini aiga, okogokia mono, nigo bogoetania n’okoorokigwa kw’omonene ase Okoiranerera
32:4. Ogoetania oko tikogwenereti kobaichania, ekiagera Nyasae, buna omotongi bw’ebinto bionsi (rora
Yohana 1:1-3), nere oboroso bw’ekeene gionsi.
Soma Emereng’anio 8:10,11. Inki ebibungo ebi bigokwanera igoro y’obong’aini?
Abanto abange bamenyire naende mbagendererete komenya, ase ogotamanya, ase oboriri, an
omosunte. Abange nigo bamenyete batari n’ogosemeria nonye ng’ake, gose bare n’ogosemeria
kw’oborimo. Ninki gekoreta okoba oko okobe neke ng’a obong’aini na ekeene nigo bire ebinto
bi’ogokumia, biichire n’ogosemeria na chiira koreta obogima bwa kare na kare ase igoro enyia na ense
enyia, ogoaka mbuya mono gwonsi nase ekeng’wanso kia Yeso. Obonda bwonsi ase ense tibori na
ngencho ende yonsi (rora Omorandia 2:11-13) ekero okoboreng’ania n’echisemi chia Nyasae.
Soma Matayo 16:26, na bweborie aye omonyene naki obogima bwao bokoorokia buya mono ekeene
kieng’encho enene kia amang’ana aya.
Rituko 2 Januari 19
Obong’aini N’echisemi.

Soma Emereng’anio 8:22-31. Mboamate ki obong’aini bobwate n’echisemi?
Ase ebibungo ebi obong’aini ase enchera ya obobisi obonene nigo bobwate oboamate na omonene
buna omotongi. Ogotera oko nigo kobwate amang’ana amange agwekaine na omogano bw’obotongi
ase omochakano 1 na 2, naende koorokia omoroberio oye, oetanaine ebinto bitato ebinene bia igoro,
amache na ense enyomo. Ekerenga giokogwekania oko n’okobeka chinguru engencho enene
y’obong’aini. Onye Nyasae omonyene okorete obotongi goetera ase obong’aini, onye obong’aini bore
egekorero egekoro mono ase bionsi, egekoro goetania obotongi obonyene na bore obwengncho enene
ase okobao kw’obotongi, netogwenerete gokora kende gionsi ase obogima goetera ase obong’aini.
Chinguru nkobekwa chire ase oboroso bwa Nyasae b’wobong’aini. Ring’ana ritang’ani ase ogotera oko
nigo rire OMONENE, Yahweh, oyio ogokwaneka “onyorete” (ring’ana ria kabere) obong’aini. Ring’ana
riekeiberania Qanah, rigoonchorwa na “obwate,” ndire na okororekana gwa “okonyora” goetania
“ogotonga” (rora Okoiranerera 32:6, Omoch. 4:1). Ring’ana rikobwatia n’eriogokora erio rire
n’oboamate n’obotongi bwa omochakano: “Agwo omochakano Nyasae agatonga igoro na ense.”
Korende, ring’ana omochakano ase Emereng’anio 8:22 nigo rikoretwa ase enchera eng’ao goetania erio
rire ase Omochakano 1. Ase Omochakano 1:1 ring’ana erio nigo rire n’oboamate na obotongi obonyene,
ekero ase Emereng’anio 8:22 ring’ana erio nigo rire n’oboamate na Nyasae omonyene, gochia enchera
yaye (Derek), engencho yaye n’okoba kwaye. Ase igo, obong’aini nigo bore ensemo ya kera embwa ya
Nyasae omonyene.
Obong’aini, ase igo, nigo bwarengeo nonye konye obotongi bw’ense botarabao. Okobao kw’obong’aini,
ase ekero ekio ekero Nyasae bweka arengeo, nigo gokoorokia okobao kwa obongaini “korwa kare.”
Ase igo, obong’aini tibori gochakera korwa ase tore, korende nigo bokoorokigwa gocha ase tore; nigo
bore egento tokwegera ekio togosomigwa; tikeri egento tokorosia inte abanyene. Amaene, gotara ase
oborabu bwaito intwe abanyene nogotara ase omosunte. Nigo togotebigwa ng’a Yeso nere oborabu
bw’ekeene obwo bokorwa oborabu gochia ase kera omonto (Yohana 1:9). Kera omonto naboganetie
boigo.
Rituko 3 Januari 20
Kogoka Ime ase Obotongi
Ase Omochakano 1 nigo tokorora kera egetambokero kiobotongi gekoera ase ogokwana kweng’ana
eyemo. “Nyasae akarora ng’a nigo bire ebiya” (Omochakano 1:4, 10, 12, 18, 21, 25, 31). Egetambokero
ki’omoerio (31) nigo gekogenda goetania agwo: “nigo bire ebiya mono.” Ring’an ri’ekeiberania
rigoonchorwa “ebiya” nigo ribwate ekerengererio kiogochengera, naende nigo rire
n’engenchoy’oboamate. Ase omoerio bw’echuma y’obotongi Nyasae nigo agokung’ia ase okorachengera
obotongi bwaye (Omochakano 2:1-3). Engaki y’ogokung’ia oko, Esabato, nigo esesenerie. Naboigo
agotera gwaito nigo kogokorera ase obong’aini gochengera obotongi.
Soma Emerenganio 8:30, 31. Nase ki obong’aini bwarenge gochenga?
Ogochenga kw’obong’aini nigo gokoorokia ogochenga kwa Nyasae ase obotongi. Ogochenga oko tikori
koba “kera rituko,” ase kera egetambokero ki’obotongi, korende nigo gokobekera emeremo y’obotongi
egutwa, ekero obotongi (bwa obogima ase ense) obonyene bwaarete.
Ase Emereng’anio 8, nigo tokonyora egekogera obong’aini bochenge: “omogoko one nigo orenge
nabana ba mwanyabanto (31). Ase omoerio bw’echuma y’obotongi, ase Esabato, Nyasae agasoa ase

oboamate na mwanyabanto. Eke nakio egento egetang’ani ki’ogokung’ia kwa Nyasae na ogochenga,
nyuma y’emeremo y’echuma, nere n’engencho ase obomanyi bwa mwanyabanto bw’esabato. Kobwatia
omoroberio bw’omotongi, nere nabo arigereretie magega gochia ase emeremo eerete ase ogochenga,
omogoko, na ogoisaneka. Ase enhera eye mwanyabanto nabo arachenge tari ase obotongi bwa Nyase
bwoka, korende ase obogambi bwaye boigo, tari ase ogosaria, ase obotongi – Gerhad F, Hasel), in
Keneth A Stand, The Sabbath in Scipture and History (Review and Herald Publishing Association, 1982),
P. 23.
Soma Abakolosai 1:15-17, 23, Okomaanoka 3:14, na Yohana 1:1-4. Ninki ebibungo ebi bigototebia igoro
y’emeremo ya Yeso ase obotongi? Nase ki emeremo yaye buna omotongi ere eyengencho enene ase
okomanya emeremo yaye buna omoboria?
Rituko 4 Januari 21
Ogosorora Kw’obong’aini.
Ebibungio bike bi’omoerio biemereng’anio eye, nigo bikoirana gochia ase omonto – engencho enyene
y’okoba n’obong’aini. Ase okoreng’ania, obomanyi bwa igoro y’okobao kw’obong’aini kende
getaratongwa, okobao kw’obong’aini ekero ki’obotongi, nigo bore obogare mono. Korende ase ebuku,
ekeene goika botambe ase ekerengo gete gi’ainse gaikere ekerengo ki’omonto naende na buna
tokoiraneria keria twaeirwe ime ya Yeso.
Soma Emereng’anio 8:32-36. Mbotomwa ki bwa obogima na amakweri borure aiga?
Ring’ana ri’ekeiberania rionchoire “risesenirie” nigo ribwatanirie gochia ase chinsemo ibere. Entang’ani
nigo ekwera egekorwa: “Mbasesenirie abwo bakorenda chinchera chiane” (32). Enkwano eyio eyio nero
ere ase Zaburi 119:1, 2 igoro ‘ogochika “mbasesenirie abwo chinchera chiabo chire chindonge… abwo
bagendererete kobwatia amachiko a Omonene: Mbasesenirie abwo barendete oborori bwaye.”
Egiakabere nigo kegokwanera okogania: “Nasesenirie omonto oria ogontegerera inche” (34). Ase ebi
bionsi egento keganeirie nigo gekoraga okogenderera koba n’omokia. Okomanya enchera endonge yoka
teisaini; “toyerende.” Okoigwa ring’ana ria Nyasae tigoisaini; goika “torende botambe” na kobwatia
keria tomayete. Buna Yeso agokebeka: “Mbasesenirie baria bakoigwa ring’ana ria Nyasae na koribwata”
(Luka 11:28).
“Oyo noro omogoko osaneire ogwenerete gotoka ase enchera y’abatari abaogweri na abasaria
b’amachiko a mwanyabanto na a Nyasae? Obogima bwa Kristo nigo bogotoragera gochia ase ensoko
y’omogoko na buna torayanyore…. Onye bakoba n’omogoko ase ekeene, goika ase omogoko barigie
koba ase obokoreri, bagokora emeremo eyio egokina ime ase bare nobwegenwa, kobwatania chinkoro
chiabo na obogima gochia ase omogwekano omoikeranu.” Ellen G White, My Life Today, P. 162.
Omogoko nabo orabe egento gekwebacha; buna torateme koyorigia, nabo igo okororekana koba
omokong’u koyonyora. Nase ki obwegenwa ase Nyasae, goetania korigia omogoko, bogwenerete koba
egento egetang’ani? Goetania keria gekageire korwa omogoko (na nase ki): koborigia oborwoti bwa
Nyasae ritang’ani?
Rituko 5 Januari 22
Eke Gose Keria

Koreng’ana n’ogosorora kw’obong’aini, omoriki ore n’omoika bw’emerang’io 9 nigo agosorora
abategereri baye gochora bono gati y’echinchera ibere chi’obogima: obong’aini gose oboriri. Ebibungo
bitano na kemo ebitang’eni n’ebiomoerio (Emer. 9:1-6, 13-18) nigo bireng’aine naende nigo bikoreta
ogoatananeka okwo kore ase chinsemo echio ibere.
Gwekania Emereng’anio 9:1-6 na Emereng’anio 9:13-18. Ngoatananeka ki kore gati ya obong’aini na
oboriri?
1.Obong’aini nigo bore oboikeranu na nigo bogokora emeremo ase obotongi amang’ana atano na abere
nkwera are ogokwa kwaye (1-3). Chisiro isano na ibere bweagacheire (ekebungo 1) nigo chikobwatana
n’amatuko atano n’abere y’obotongi. Oboriri, ase okoreng’anigwa, nigo boikaransete botari gokora
kende, bogwekora koba omonto ekero ase amaene “bore obwabosa igo,” na “botamanyeti kende.”
(ekebungo 13).
2. Oboriri tibori korwa kende gekoriegwa na konyugwa; nigo bogwetogia ase okorugwa koibire.
(ekebungo 17)
3. Obong’aini nigo bogototebia twange oboriri na ase igo, koba moyo. Oboriri nigo bokoremereia mono;
tibori kogania ng’a totige kende, korende okwama kwaye n’amakweri. Baria bagotunyana obong’aini
nigo baragenderee; nigo “baratunyane enchera y’obomanyi” (ekebungo 6). Baria bagotunyana oboriri
nigo barakagare mbateneine, naende “tibakomanya kende” (ekebungo 18).
Soma Emereng’anio 9:7-9. Nanki omonto omong’aini na omonto omobe bakoiraneria gochia ase
amorokereigwa y’obong’aini? Ninki kegokora omonto omong’aini koba omong’aini goetania omonto
omobe?
Rituko 6 Januari 23.
Genderea Kwegera: “Omonene bw’obotongi tarenge bweka ase emeremo emeikeranu. Narenge
n’omokonyi – omokori emeremo amo nere oyio orenge kogokera chiganga chiaye, na orenge gosanga
omogoko ase okoa ebitongwa omogoko.” Agwo omochakano ndiarengeo ring’ana, n’ering’ana nigo
riarenge na Nyasae, na rirorio ring’ana nigo riarenge Nyasae. Yohana 1:1, 2. Kristo, ring’ana, omomoima
o Nyasae, nigo arenge oyomo na Ise o kare na kare – oyomo ase omobere – chimbwa, ase eganga – ere
bweka oyorenge gosoa ase oboikaranso ne chiganga chia Nyasae…. Na omwana o Nyasae nigo akweraria
ere omonyene: “Na omonene nigo ambogoretie inche agwo omochakano bwa enchera yaye, bosio
bw’eremo yaye ya kare. Nigo nabegetweo korwa kare…. Ekero abagete oboroso bwense: ase igo nao
narenge amo nere, buna oyomo oria oretetwe amo nere; na botambe nigo narenge, omogoko oye,
gochenga botambe ase obosio bwaye.” Emereng’anio 8:22-30” – Ellen G White, Patriachs and Prophets,
P. 34.
Amaboria Y’ogosanga:
1. Nase ki okwegena ase omogano bw’obotongi bwa omochakano kore oboroso bwa obong’aini
bwa Bibilia? Nase ki ogoonchoreria kwa ebinto korwa ebinto ebisinini gochia ebinto ebinene
kore mamincha ya Bibilia ase chinchera chionsi?
2. Menya mono ase ekerengereio ng’a obong’aini bw’ekeene nigo bore egento toteroserie intwe
abanyene korende ng’a goika keorokigwe gocha ase tore. Megwekano ki y’ekeene kiengencho
eyio totamanye onye titokomanorerwa goetera ase Omoika o Nyasae? Omogwekano, naki
toramanye igoro y’amakweri a Kristo ase omosalaba na ninki agotoa onye atamanoreretwe?
Naki rende igoro y’esabato y’erituko ria gatano na kabere gose ogocha gwa kabere?

3. Naki emeremo ya Nyasae, buna ekoorokigwa ase omochakano 1, ekoenekia ng’a amaya
takoburukanigwa na amabe? Ngencho ki okoiraneria kwao kobwate ase ekerengereio ng’a
omonto nabo, ase omogwekano, arabekeranie okorora gw’ense kw’ogoonchoreria kw’ebinto
okwo kogokana ng’a tibiatongetwe gochia ase omogano bw’obotongi bw’omochakano?
4. Naki ogochengera obotongi bwa Nyasae kogotokonya komanya ng’a naki torabe na obomanyi
bw’esabato obotambe na obotenenku?
OGOSESENIGWA KW’OMONYENE OBORONGE
Esabato Mobaso
Egera Echuma Eye: Emereng’anio 10:1-14, Matt. 19:19, Emereng’anio 1:1-12, Yohana 3:16,
Emereng’anio 13.
Amang’ana Omotwe: “Ogosesenigwa nigo gokobeera ase omotwe bw’omonyene oboronge, korende
obochege nigo boichire ase emenwa y’’abakori amabe” (Emereng’anio 10:6).
Buna ring’ana rinene rikworokia, eleseni eye nigo ekorigereia ogosesenigwa kw’abanyene oboronge.
Ring’ana ri’ekeiberania Zaddiq, rionchoire “oboronge” nario rire ekeigorero ase ekebungo giaito Zedeq
(erio narirorio rionchoire “oboronge”), korwa aase rirusirie, nkororekana rire ase amang’ana
y’okoigorera egetabu ekegima: “emereng’anio ya Sulemani… konyora amorokereigwa y’obong’aini,
oboronge (Zedeq)…” (Emereng’anio 1:1-3). Eki egetabu ki’emereng’anio kegototebia n’eke ng’a
obong’aini nabwo oboronge, na engencho “y’oboronge”n’ogotara koreng’ana na amachiko a Nyasae –
gotaara ase okwegena na oboigweri gochia ase keria omonene atorengeirie tobe na gokora. Oboronge
nigo bore ekeegwa ekio kegocha korwa ase Nyasae. Mamincha yaye n’oboriri na ogotaba n’okwegena.
Obong’aini nigo bore oboronge, oboriri nigo bore ebibe na obosaria – naende ase ebibungo ntwegere,
ogoatananeka kore egati ya birobio n’ogokong’u.
Rituko 1 Januari 25
Oboronge Nigo Bore Oboikerenu
Soma Emereng’anio 10:1-7. Machiko ki ao ao igoro y’obogima na okwegena aorokirie aiga?
Omogano noreo igoro y’omonto orenge obwato ime oyio ochagete kobochora engoro korwa ase inse
y’amagoro aye aria ase aikaransete. Ekero abanto barenge ase obwato obwo baganetie ng’a atige, nigo
airanetie; oyo tari omochando bw’onde oino, “Aa naase ane!” Okoiraneria okwo gw’okogechia nakwo
ara aange kore egetamero kia abanyabibe ase ogotuba obosaria bwabo. “Obogima obo n’obwane; tibori
igoro yao.” Ee, kende gionsi togokora ngokuna kere abanto bande, mono baria bare ang’e naintwe.
Ning’o otanya gokunwa boigo, ase enchera enene, n’okwama kw’ogokora kwabanto bande, kobe okuya
gose okobe?”
Ogochika kw’obomo gati y’obogima n’echimbwa chi’ekemoika, na obogima bw’ebinto bikororekana
nigo bore ase ebibungo 3-5. Ekerengereio ekenene neke ng’a oboreu bw’echimbwa tibiri nokoirania,
nonye omonto kare omonda, naende kabere, ng’a oboronge botambe mbobwate eng’eria ase enchera
eyemo gose eyende, nonye omonto kare omotaka.

Ase ebibungo 6 na 7, nigo tokorora okoorokigwa gwa keria Yeso akwanete buna okogania okobe kore
obotomani, gose okogechia kore omoamate bw’oboiti. Okobisa obogechi bwaito magega y’amang’ana
aito tikori gokora emeremo, boigo. Ebirengereio ebibe nigo bikoorokigwa ase emebere yaito na eriogi
ri’echinkwana chiaito. Omochakano omuya kero kende bwa oboamate obuya n’abanto bande noyo:
“omwanche omogisangio oo buna bweanchete aye omonyene” (Abalawi 19:18), gwekania na Matayo
19:19). Buna ebibungo ebi boigo bigokwana, omong’uso omuya okoorokia nabo okong’usa abande ase
engaki entambe. Nase omoerio nigo togokwanera ekerengo gete ki’ebirengereio bia botambe: Tari buya
koba n’erieta rigiya kobua ribe?
Ngochora ki kwengencho okageire gokora bwango iga? Onye torakora konde, rengereia buya omong’uso
ogochora okwo korarete ase abanto bande, ase obuya gose obobe.
Rituko 2 Januari 26
Omonwa Bw’omonyene Oboronge
Omonwa (amo na biria bireo, ebikoba na oromeme) noro ore ekimo kiengencho enene mono ase
egetabu kiemereng’anio. Ase ogoonchora kwa New King James kw’egetabu, ring’ana “omonwa” nigo
rigokwanwa ara 50, “ebikoba” ara 41, na “oromeme” ara 19. Ekimo eke ase ogokwana nigo kere
ekerenga kiengencho enene ase Emereng’anio 10-29.
Eira ereo nigo ere eyengencho enene: amang’ana aito nigo are nokobua, ebe nase obuya gose obobe.
Oromeme nabo rorabe ekimo ekiya mono gose ekebe mono ekio twaeirwe. Emeng’uso eye ebere igoro
y’oromeme nero eleseni enene mono ase Emereng’anio. Amaene, omonwa noro okoba obogima,
korende naende nabo orarete amakweri.
Soma Emereng’anio 10:11-14. Nogwatananeka koroki koreo gati ng’a naki omonto omonyene oboronge
agokwana na naki omoriri agokora bo?
Ase ebibungo 11 rora eng’ana egokwanwa ‘ ensoko y’obogima.” Eye nigo etenenerete amaya
y’obong’aini. Nigo ekomoraga omonene (Zaburi 36:9), ensoko y’obogima. Ebicha eyio naende
nkororekana ere aase egesasimero agwo ase oroche rwa mocha rogosoka korwa (Ezekiel 47:1, 2).
Goetera ase ebicha eyio Yeso nkoorokia are ekeegwa kiomoika (Yohana 4:14). Ase igo okoreng’ania
omonwa bw’omonyene oboronge “n’ensoko y’obogima” nigo ere okoyogwekania na Nyasae omonyene.
Egento gekogera omonwa oyo oba egento ekiya nekeegwa eke ekiya kia “obogima.” Obuya obo nigo
bogototebia ng’a ninki kere emeremo emiya y’omonwa. Nigo ogwenerete koba okobua kwamaya, tari
amabe, ensoko y’obogima, tari amakweri. Ekegokwanerwa aiga nkororekana kere naende ase Yakobo
3:2-12.
Inyora, boigo, ng’a ngotera ogokwa, goetera ase ring’ana “ri’okobua kwaye” (Ibra. 1:3), Nyasae atongete
igoro na ense. Ogokwana, ase igo, nigo kogwenerete gokorera eganga y’obotongi.
Rengereia ng’a naki amang’ana are ayokobua ang’ana. Ase amang’ana ao nabo oraichorie abanto
n’oboremu, omogoko, na ogosemeria gose nabo orabobune na kobasaria buna ndiria kwabaita
n’ebioge. Nang’ana naki ogwenerete korenda okobua kw’oromeme rwao?
Rituko 3 Januari 27
Ogosemeria Kwomonyene Oboronge.

“Embwa y’abanto abaronge nebarae: korende oboikeranu bw’abasaria ng’a bobasirie” (Emer. 11:3).
Mboene ki obwate bw’ekeene gi’ekebungo eke? Megwekano ki kwarorira gose kwaigure eyio asero
ekeene gi’ekemoika kiarorekanire? Ase okoreng’ania, mbinto ki kwarorire ebio bire boigo, ase ekerengo
ekenene, ebio bikogera obogorie ekebungo eke ase okwegena?
Soma Emereng’anio 11. Nonye kegokuna amang’ana amange, ngosesenigwa ki okonene okwo
kogochera abegenwa mamincha y’aria akobera ababe?
Ekerengereio kiamakia agocha n’erigori ria aria atararorekana (rora 2 Kor. 4:18) nigo agokonya gosegeta
abanyene oboronge komenya buya. Ase engencho y’ogosemeria kwabo kw’amakia agocha, abanyene
oboronge nigo bakworoika obokanyeku, obwegenwa, na amabebe.
Ase enchera y’ende, abanto abasaria nigo bamenyete ase amatuko abono oka; nigo bagochandekera
keria bakorora gioka na ogokonya kwabono gwoka. Nigo bakwerengereia barabwo abanyene boka
ritang’ani batararengereia abande naende, nabo barachore kong’ainereia na korama.
Omoreng’anio, abaonchoreria abwo bakang’aina abagori babo nabo baranyore eng’eria ase ekero ekio
y’ekerengo ekenene, korende naende abwo kegima basirie abagori babo na oboonchoreria bwabo
nabwo boragwe (Emer. 11:3, 18).
Rengereia igoro yogochora orakore na naki oragokore. Mbinto ki ogwenerete (ebia kare na kare)
ogwenerete koarigania ase ogochora kwao?
Rituko 4 Januari 28
Ekeene Ki’omonyene Oboronge
Soma Emerengenio 12 na origereia ebirengo biamang’ana, mono ase oborabu bw’ogoteba ekeene na
ogoteba oborimo. Mbotomwa ki tokonyora aiga igoro y’obwegenwa na obong’ainereia?
Omosomi Sisseko Bok. oorokirie ase oboikeranu buna obong’ainereia borabe obobe ase eamate. Nigo
akorika iga: “Eamate, ase igo, eyio ababwatani baye batari n’okobua kw’ogwatanana obotomwa
bw’ekeene korwa ase obw’oborimo, nigo eragwe. - lying: Moral Choice in Public and Private Life (New
Yolk: Panthreon Books, 1978), P. 19.
Boigo Augustine, buna ekwaneire ase okoigorera kwegetabu kia Boks naorogetie ng’a “ekero okogania
gw’ekeene gwatinyerigwe inse gose gwakorirwe koba okoreu nonye nake, ebinto bionsi nigo birabe
ebiechitang’utang’u.” P. xv.
Ellen G White narigete: “Okong’ainereia nigo kore okogechia ase are. Nigo akoraria ng’a gochia ase
omochie omochenu” tikegosoa nonye ng’ake… kende gionsi kere neubi, nonye nkeria kegotaara ase
okogechia, gose gekong’ainereia.’ Tiga ekeene tikebwatwa n’okoboko okworo gose okobwata gotari
kwamaene. Tiga kobe ensemo y’obogima. Kogosoria n’ekeene, na kogania gokerusia ase emeroberio
yao, nigo ekoreta omochando bw’okwegena…. Ere oyogokwana ayatari ayekeene nigo okoonia enkoro
yaye ase enchiiro embe. Oborimo bwaye nabo borarorekane obwogokonya ase ekero egetang’ani
ki’omobasokano; nabo ararokane okogenderea buya ase oboonchoreria bwaye obwo batamoretere
okonyora ase enchera endonge, korende omoerio boikere ase atamwegene onde bwensi. Ere omonyene
n’omong’ainereia, takoba n’oboremu ase amang’ana y’abanto bande.” – My Life Today, P. 331.
Ekero tokorengereia buna amang’ana are ayokobua ang’ana, goika torengereie igoro y’okong’ainereia
boigo, ekiagera obong’ainereia obonge nigo bogokorwa ase amang’ana. Ning’o otanya koigwa obororo,
okomigwa, okweigwa kw’ogosarigwa goetera ase oborimo? Teri akong’u korora eamate ekogwa ase

emechando emenene ekero oborimo bore egento kia botambe goetania egento ki’ogotantana korwa
ebinto bia botambe.
Ensemo y’ende nereo, boigo: egekomonyora oria okong’ainereia. Abanto bande banaririe goika tibari
korora ng’a negento ekebe gokora bo; abanto abange nonye nabo, nabo bakweigwa koba abamochi,
bare nobosooku ekero bakong’ainereia. Ayio n’amaya ase bare, ekigera igo mbare n’omoika omochenu.
Rengereia, nonye nabo, omochando bw’omonto oria okong’ainereia korende tari korengereia igoro ya
ayio.
Indi ri’omoerio gwakwanete oborimo? Naki kweigwete ekero gwakorete bo?
Rituko 5 JAnuari 29
Eng’eria Y’omonyene Oboronge
Buna twarorire ase Emereng’anio, amorokereio amange na amorokereigwa arurweo nigo arurwe ase
okogwekania abanto b’echingencho ibere. “Omonto omong’aini nigo agokora eke, omoriri orora keria.”
“Omonto omoirogete Nyasae nigo agokora keria, na omosaria okora eke.”
Ee, ase amaene, obong’aini mboreo boke na oboriri boigo ase tore twensi. Gotatiga Yeso bweka, intwe
twensi n’abanyabibe, twensi twaremeirwe n’obonene bwa Nyasae” (Rum. 3:23). Egesio ekiya, ntore
n’eira y’ogokumia eyio egocha ase ekebungo gekobwatia: nonye tore abanyabibe, ase okwegena nabo
tokobarerwa oboronge bosa ase okoboorigwa okwo kore ime ya Kristo Yeso” (Rum. 3:24).
Omoerio, mwanyabanto bonsi ngocha bare gosoa ase ekemo ki’ebiombe bibere: abanto baria bagochia
gotoorigwa nabaria bagochia gosira.
Soma Yohana 3:1116. Nsemo ki ibere echio chibaganyete mwanyabanto bonsi?
Soma Emereng’anio 13. Naki egesieri eke gekoreng’ania obomanyi na okoba kw’abanto abanyene
oboronge nabaria abasaria?
Abang’aini nigo bakoreng’anigwa etaya yakare na kare, ekero abasaria bakoreng’anigwa na etaya eyio
erarimigwe (Emereng’anio 13:9). Omonto omong’aini nagokore okwama okuya kwa emeremo yaye,
ekero omonyabiobe aragese obosareku (ebibungo 2, 25). Goetera ase abana babo (Emereng’anio
13:22), abang’aini mbare n’ogosemeria kwamakia agocha kobaetania barabwo abanyene; abanyabibe,
ribaga erio, nigo baratigere obotenenku bwabo abageni obwa bare abanyene oboronge (Emer. 13:22).
Eng’ana ere aiga neria ng’a obogima bw’okwegena na oboigweri gochia ase omonene nigo bore obuya
goetania obogima bw’ogotaigwera na oboriri.
Ekero okobeka ebinto ebinene bi’eira y’obogima bwa kare na kare ensemo, ninki kere ekiabwango iga,
okonyora gwa kera rituko okwo kwanyorire goetera ase okomenya obogima bw’okwegena ime ya Kristo.
Rituko 6 Januari 30
Genderea Kwegera: “Teisaini koba nokwegena ime ya Kristo na amarieta aito akorikwa ase ebitabu
bi’ekanisa…. Tari mang’ana ekerengo giaito nkereki, ekio tikeri eki’engencho gotatiga rioka Kristo
oorokigwe ase emeremo yaito y’oboronge.” – Ellen G White, Christ’s Object Lessons, PP. 312, 313.
Obong’ainereia obonene bw’ebirengereio bia mwanyabanto ase amatuko a Yeso mboria ng’a ogotwara
oboamate bwa bosaigo nekeene ng’a nakwo oboronge. Ase obogima bwonsi bwa mwanyabanto

obomanyi bwamang’ana y’ekeene bwoka bwaenekigwe koba obotaisaini ase ogotoria emoyo…. Ekereo
ki’omonto omonene ase omogano nigo geichire nechinguru chimariko y’abarai obwo bakoretwa
nabanto abwo barenge abegeni ase chidini…. Omochando buna oyio nonye mbono noreo. Abange nigo
bagoisaneka bosaigo ng’a nabakristo bare, ekiagera begenete ring’ana gete nedini. Korende tibarabeka
ekeene ase obogima bwabo…. Abanto nabo baratebe ng’a mbegenete ekeene; korende ekio tikeri
kobakora koba abanyakeene, abaitongo, abaremereia, abakobogorerania chigurube, ababegete
ebirengereio biabo igoro, nigo ere okoragereigwa ase bare, naende goetera ase omong’uso obo nigo ere
okoregerigwa gochia ase ense.
“Oborenge boria Kristo egeretie nokorwa gw’enkoro na obogima gochia ase ogwancha kwa Nyasae
koorokirie.” – Ellen G White, The Desire of Ages, PP. 309, 310.
Amaboria Y’ogosanga;
1. Sanga buna ogochora gwaito kogokuna abanto bande ase obuya gose ase obobe. Nase ki eke
kere egento otebachere ase obogima? Ekeene eke ritang’ani nigo kiaorogetigwe ase omogano
bw’okogwa, agwo ase goika nonye ndero iga keria Adamu na Awa bachorete nkoigweka kere
ase obogima bwaito. Nigo erabe ogotemwa ase ogotema korenga ekerengo kia amaya gose
amabe ogochora gwaito gokoreta, korende obwo noboreba, ekiagera titori komanya eki
ogochora gwaito gokoreta. Nase ki, rende, ase oborabu bwa Nyasae n’ogochika kwaye,
ebetereeti tochore gokora ayare amaya, tari mang’ana mbobe ki ogochora okwo gokorete.
2. Emereng’anio nkobeka ere ogoatananeka gati y’omonto omonyene oboronge na abataka
naende, korwa ase ebibungo ebi, twegeire ng’a ngento ki kere ekiya na ekebe. Nase ki, nonye
nabo, etogwenerete korenda ng’a mbarabi tokogambia buna aboriri. Ase enchera yende, nara
karenga twang’ainirwe nabaria ekero gete twakagerete ng’a nabanyene oboronge?
Eleseni 6 Januari 31 – Februari 6
Keria Okonyora Tari Kerokio Okorora
Esabato Mobaso
Egera Echuma Eye: Emereng’anio 14, Dan. 7:25, Mariko 12:30, 31, Emer. 15:3, Is. 5:20, Emer. 15, Mat.
20:26-28.
Amang’ana Omotwe: “Enchera nere ekororekana ase omonto ng’a nendonge, korende omoerio
bwenchera eyio namakweri” (Emereng’anio 14:12)
Buna koreng’ana Paulo akwanete: “Nigo tokorora buna ase ekerore, orotutu” (2 Kor. 13:12). Nigo
tokorora ake mono, na keria tokorora ching’aki chinyinge, nigo kegocha gechunchugire goetera ase
ebirengereio biaito. Amaiso aito namato, - chinsemo chionsio tokoigwera, amaene - nigo chigotoa
okorora ogoke mono kwa aria are isiko.
Nabo torang’aineke, boigo, tari igoro y’ense yoka, korende igoro yaito abanyene boigo. Chindoto chiaito,
okorora gwaito, na ebirengereio biaito nabo biratoe ebicha ensareku igoro ya keria tore, na igoro
y’oborimo bwonsi, boria borabe obobe mono.
Ninki togwenerete gokora rende, gwetanga korwa ase obong’ainereia obo? Emereng’anio ngotoa ere
obosemia bweritang’ani. Titobaisa gwesemeria intwe abanyene, buna baria abariri bagokora. Ribaga
erio ntogwenerete komosemeria omonene, oria ogamberete ebinto bionsi nonye ndiria bionsi
bikororekana kogenda bobe. Ase obweng’e, ntogwenerete koba moyo ase okwegena na tari ase okorora

bosaigo, ekiagera okorora gwaito nabo ase ekerengo ekenene koratong’aine, ase ogotworokia ensemo
enkeigo ya keria kereo, naende bobe goetania igo, kogosaria keria egeke kogotworokia.
*Egera eleseni y’echuma eye bweariganie ase Esabato, Feb. 7
Rituko 1 Feb. 1
Oboenenu bwa Omoriri
Soma Emereng’anio 14. Ninki egokwanera igoro y’omonto omoriri?
Omoriri nigo agokwana ase oboenenu (Emer. 14:3). Obong’ainereia obotang’ani bw’omonto omoriri
nigo bore igoro y’enkwano yaye y’oboenenu.” Ebicha y’enyimbo y’ebikoba bi’omonto omoriri nigo
ekoraga gochia ase egesusuro kiaye. Amang’ana aye y’oboenenu abeire ogoakwa ase ebikoba biaye,
okwama okwo gokororekana ase okoreng’anigwa amo n’ebikoba biaye omonto omong’aini, ebio bire
ebikorekanu (rora Dan. 7:8).
Omonto omoriri nigo agochecheria obong’aini (Emer. 14:6-9). Nonye omoriri gakororekana gakorigia
obong’aini, amaene naria ng’a tegeneti ase bore, na nigo are nechitang’utang’ua ase bore. Takobonyora
ekiagera, aase ebirengereio biaye omonyene, obong’aini bonde tiboiyo goetania ere omonyene. Egento
giokogosa mono n’ebirengereio biaye biogosaria kw’amachiko. Ninki kerabe ekebe mono goetania
gochecheria ekerengereio ki’ebibe?
Omonto omoriri nigo awancha kende gionsi (Emereng’anio 14:15). Nonye omonto omoriri ogochecheria
baria bare n’ebirengereio ebiya, na begenete ase rigori ri’obong’aini, osiririe okobua kwaye
gw’okorengereia buya igoro ya keria akoigwa; ere nigo akwegena “kera ring’ana.” Abanto bare
n’echitang’utang’u nigo bakomorama Nyasae na bachecheria edini, bagoteba ng’a okwegena oko
n’okwabana na abanto abagotu, korende barabwo abanyene nigo begenete ase ebinto ebiriri mono,
buna ogotongwa kwebinto bire aase ense aase omobasokano.
Omonto omoriri nigo akoberoroka (Emer. 14:16,29). Ekiagera omonto omoriri aegenete ng’a nare
nekeene ime yaye, tari koira chingaki ase okorengereia . Nigo arabe omwango, ara aange okoberoroka.
Abanto abariri nigo bagochanda nagotaba abaremereia, oborir nigo boichire ase ebirengereio bi’omonto
omoriri. Tari omoremereia ase abande na nigo arabakorere ase okobamiga (rora Dan. 7:25; 8:11, 12)
Nigo ere aororo korora chinchera chioboriri ime ase abande, korende naki rende igoro ase tore? Ninki,
kero kende, ase chimbwa echi chimbe oraganie ritang’ani korora, na korigia goetera ase obuya bwa
Nyasae kobibua?
Rituko 2 Feb. 2
Okoiroka Kw’omonto Omong’aini.
Soma Emereng’anio 14 naende. Ninki egokwana igoro y’abanto abang’aini?
Abanto abang’aini nigo bagokwana ase obokanyeku (Emer. 14:3). Abanto abang’aini nigo bakorenda
ebikoba biabo. Ogokira kwabo nigo kogosegetwa goetera ase ogotaba abatindi na ogotaba n’oboenenu
barabwo abanyene. Ase abanto abang’aini, abanto bande nabo barabe buya: ase igo, abanto abang’aini
mbaire chingaki korengereia na korenga ekeene. Nigo bagokira ase engencho bagotegerea, bare ang’e
kwegera korwa ase abande.

Abanto abang’aini nigo banchete kwegera na komanya (Emereng’anio 14:6, 18). Nigo ere akong’u ase
omonto omoriri kwegera, ekiagera nigo ere akong’u asare goikaransa ase amagoro y’omworokia;
korende ase okoreng’ania, nigo ere aororo ase omonto ore n’obong’aini kwegera ekiagera are
nomokanyeku. Ase igo nigo bakogokera obogima bw’okwegera na gokina. Okorigia oko kw’obong’aini,
kw’egento keria batabwati, nakwo gokobokora koba abang’aini.
Abanto abang’aini nigo bakwerenda (Emer. 14:15). Abanto abang’aini mbamanyete ng’a ebibe na
obosaria mbireo. Ase igo bakorenda ase bagotara. Tibagosemeria okweigwa kwabo na ebirengereio
biabo abanyene; Nigo bakorigereia ebinto buya na koboria obosemia. Korende naende nigo bakorenda
keria abanto bande bakobatebia; nigo bagoatanana amaya korwa ase amabe (1 Abat. 5:21).
Abang’aini nigo bare abatoereu (Emer. 14:29, 33). Abanto abang’aini nigo bagokira kiri ekiagera tibari
kweegeka ase “chinchera chiabo,” korende nigo bakweegeka ase chinchera chia “igoro” (Emer. 14:14).
Okwegena kwabo ase Nyasae nakwo gokobanchera gotoerea na kwegambera (Is. 30:15). Okomoiroka
Nyasae nakwo gokobaa oboremu (Emer. 14:26).
Abanto abang’aini nigo bare namabebe na riyianda (Emer. 14:21, 31). Amachiko aria abere, “omwanche
omonene oo” na “Bwanche omogisangio oo,” nigo abwataine (Mariko 12:30, 31). Titokomwancha
Nyasae na ase ekero ekio tokorere abande bobe. Egento ekenene gekoorokia okwegena gwaito
n’enchera togokorera abande, mono baria bare n’okogania.
“Titokonyara korora ng’a mbarenga baito bagotara ase okorora na tari ase okwegena. Nigo tokwegena
ebinto tokorora, korende titori kogokera chiira chi’engencho echio twaeirwe ase ring’ana riaye.” – Ellen
G White, Our High Calling, P. 85. Ninki engencho y’okogenda ase okwegena na tari ase okorora? Naki
etogwenerete gokora igo?
Rituko 3 Feb. 3
“Amaiso Y’omonene”
“Amaiso ‘omonene nigo aroche ande onsi, nigo arigereetie ababe amo na abaya” (Emer. 15:3). Naki
okweigwa ase ekebungo eke, na nase ki?
Ase ebisieri bibere bikobwatia ase Emereng’anio eriogi nigo rigoonchoreria. Ebisieri ebi nigo bikoraga
ring’ana ria Nyasae mono goetania ebio bia magega. Omonene nigo akoegwa esiko mono goetania
emereng’anio yende. Naende ngotebigwa tore egento kiogoichana igoro yaye: ng’a amaiso aye nigo
aroche kera aase (Emer. 15:3).
Ebirengereio ebi ebinene bi’okobao kw’omonene nabio abaisraeli bare koroka “okomoiroka omonene.”
Oboamate obwo obwo ngotoka bore ase Zaburi. “Amaiso o monene nigo are igoro asebaria
bamoirogete” (Zaburi 33:18). Boigo, Ayubu nigo akomoorokia Omonene buna oyokorora chinsinyo
chionsi chiense na korora aria onsi agokoreka inse y’erioba (Ayubu 28:24). Ase engencho y’aya, Ayubu
nigo agokorera ng’a “Okomoiroka omonene… nakwo obong’aini” (Ayubu 28:28).
Omoreng’anio oyo nigo ogotoinyoria okobua kwa Nyasae ase okorora amaya na amabe, tari mang’ana
ng’are are. Buna Sulemani amanyete (1Abaruoti 3:9), obong’aini bw’ekeene n’okobua kw’ogwatanana
gati y’amaya n’amabe. Ase ekerengo kia mwanyabanto, obomanyi obo mbogwenerete gotokonya
koinyora botambe gokora amaya na korende tari amabe, ekiagera Nyasae nigo akorora onsi aria
togokora, nonye onde taiyo ogotorora. Nigo tokweng’aina intwe abanyene, korengereia ng’a ase
engencho, ase bono, tokogenda n’amabe, ayio ase amaene tokogenda n’aro. Ase omoerio titori gokora
bo.

Ase igo, tiga tobe abang’aini ekiagera “Naki getongwa kende tikeri getari maiso marore asare, korende
ebinto bionsi igo bire arabu, naende bimaanoire ase amaiso aye, ere oyo torache koa omobaro” (Ibr.
4:13).
Soma Emereng’anio 15:3, Isaya 5:20, na Abaiberania 5:14. Mbotomwa ki bwengencho ebibungo ebi
bibwate ase tore, mono ase ekiare ekio ekerengereio kia “amaya na amabe” giatubirwe, n’abanto
bagoteba amaya na amabe nigo akobwatia ng’a ninki ekio gose ebio n’ebirengereio bi’abanto ebio
bitabwati kende ase obogima goetania keria bare? Ninki kere ekebe ase ekerengereio ekio kiamaya
n’amabe, na nase ki kere omochando omonene gokebwatia?
Rituko 4 Feb. 4
Omogoko Bw’omonene
Soma Emereng’anio 15. Ninki gekogera omogoko ore egento ki’engencho enene ase mwanyabanto?
Amariko tari gotoriera eira y’obogima botari n’amatemwa. Buna Yeso omonyene aborete: “Kera rituko
riaisanire n’ogwechanda kwaye.” (Mat. 6:34). Emereng’anio 15:15 nigo ekwera ng’a gati y’amatuko
amabe, oyoragenderee koba n’enkoro y’omogoko nigo arabe n’echingaki chingiya. Obororo na
emechando, na amatemwa nache, na ara aange titokonyara gotanga ekero na enchera biare gocha. Eki
toranyare gotanga, ase ekerengo egeke, n’enchera tokoba ekero ekio.
Soma Emereng’anio 15:14,23. Ninki kere ensemo ya Nyasae ase omogoko oyo?
Nonye amariko a Bibilia tari kwera buya egokora tobe n’omogoko, ekerengereio kere gati y’ebibungo 13
na 14 nigo gekworokia ng’a “enkoro y’omogoko” nigo ere “emeremo yoria ore omomanyi.” Nenkoro
y’omonto ore n’okwegena na okorora okoborigwa goetania omoroberio bwa engaki eye y’abanto. Eke
nakio gekogera okwegena ase Nyasae kore okwengencho; eke nakio gekogera ere egento ki’engencho
enene mono ng’a twemanye intwe abanyene, tomanye ase obogima bwaito, ekeene kia Nyasae na
obwanchani bwaye. Erio, matemwa ande onsi, mechando ende yonsi tokoumerana, baria bare
n’obomanyi nabo bakoremereia, ekiagera bamanyete obwanchani bwa Nyasae.
Emereng’anio 15:23 nigo egotoretera ekerengereio kende ekenene, omogoko nigo ogocha mono korwa
ase biria tokorwa goetania biria tokonyora. N’ering’ana rigiya togosanga n’abande erio rirarete omogoko
ase omorwa. Ning’o otanya konyora ogosesenigwa koria gokorwa ase abanto bande, ebe ase amang’ana
gose ase ogokora? Buna twaikire korora ase Emereng’anio, amang’ana aito nare n’okobua okonene.
Nabo arakore amaya amanene, tari ase oria ogokurerwa bweka, korende ase oria okoyakora boigo.
Naki oramanye, aye omonyene obwanchani bwa Nyasae? Mbinto ki biria orakore ebio biragokonye
koigora enkoro yao gochia ase ekeene ki’engencho? Rengereia buna obogima borabe obuya mono onye
ndiria kwamanyete ekeene k’iobwanchani bwa Nyasae.
Rituko 5 Feb. 5
Obonene Bwa Nyasae
Intwe nkorora tore na kobeka emeroberio, naende nabo ebinto bigoonchoreria koba ebiao, kero kende
ase obobe. Bibilia ngwancherana ere nerigori ri’emeremo ya mwanyabanto na obosibore. Korende
boigo Bibilia nkoenekia ere okobua kwa Nyasae ase okogambera chinchera chi’ebinto bigokoreka (rora
Emereng’anio 20:24, 21:31, Dan. 2 na 7).
Ninki Emereng’anio 16:1 egoteba? Naki togwenerete komanya ekebungo eke?

Nkwearigania tore na kobeka emeroberio, korende Nyasae nere ore nering’ana riomoerio. Igo tari ng’a
okwearigania gwaito nokwabosa. Korende ase obogima bw’okwegena, rioka toise korwa emeroberio
yaito ase Nyasae, nakore emeremo amo nabarabwo, na emeroberio yaito neragwe – (Emer. 16:9) na
eikeranigwe nere (Emer. 16:31). Nonye n’emeremo yababisa baito nebe ase ribaga riaito (Emer. 16:4, 7).
Nonye ebi tibiri ebirengereio ebiororo kobibwata, mono ekero tokoumerana n’amakong’u,
mbigwenerete gotoremia na gotokonya kwegera komosemeria Nyasae, nonye n’ekero ebinto
bikororekana koba ebibe mono, naende emeroberio yaito etari goikerana buna twasemeretie. Ring’ana
rinene ase tore nokwegera korwa bionsi gochia ase Nyasae toise gokora igo, ntobe noboene
bw’okonyora oborai bwaye, nonye n’ekero giechingaki chinkong’u mono.
Soma Emereng’anio 16:18, 19. Inki kere ensemo y’okogania ase obobui bwa mwanyabanto?
Buna ere botambe, Bibilia ngotokurera ere korwa ase oboenenu. Nonye n’ekero omonto agokagera ng’a
ogokoreka kw’ebinto ngoetera ase omobasokano, nabo tokoba nogosemeria ng’a Nyasae nere ore
n’kobua ase bire.
Buna togenderee komanya nase ki ebinto bikoba, naki oboene bwesegi enene bogotokonya gokora
emeremo ase amang’ana amakong’u igoro ng’a nase ki ebinto bikoba buna bire?
Rituko 6 Feb. 6
Genderea Kwegera: “Korwa omochakano Saitani oorokirie mwanyabanto okonyora kogocha goetera ase
ogosaria. Nabo aegeretie abamalaika boigo. Ase igo akamotema Adamu na Awa gokora ebibe. Naende
naboigo okobaraa omoganda omonene bw’abanto korwa ase okomoigwera Nyasae. Enchera y’obosaria
nabo ekororekana koba ey’ogosanerwa; ‘Korende omoerio bwero nenchara y’amakweri. Emereng’anio
14:12. Mbare negesio abwo, kobaikire gosoa ase enchera eye, na kwegera buna amatunda y’ebibe are
amaroro mono, na goonchoka korwa ase ere ase engaki eyio.” – Ellen G White, Patriachs and Prophets,
P. 720.
“Kende nkeiyo kegosegeta okoba n’omobere omuya na omoyo goetania omoika bw’omogoko na
ogotogia. Nemeremo emiya kwanga chimbwa chiogwekora abaikeranu, ebirengereio biogotaisaneka, na
okweigwa – buna emeremo emenene buna ogosaba. Onye toganetie kogenda igoro, naki toragende
buna ekeombe kiabanto bare ase ebirero, bakweumia, na kwemurungania ase orogendo gochia ase
enyomba ya Tata? Baria bare abakristo abwo bamenyete ase okwemurungania, na bagokagera ng’a
omogoko na ogochenga n’ebibe, tibabwati edini y’ekeene.” Ellen G White, The Ministry of Healing, P.
251.
Amaboria Y’ogosanga:
1. Sanga ekerengereio ng’a nigo tobwate oborori bw’ekeene bw’ekerengo egeke. Ninki engencho
yaye? Mbinto ki tokorengereia bire isiko aria naende tore nobomaene ng’a nebiekeene, korende
titokonyara kobimanya, ase nchera ende yonsi? Ase omogwekano, n’echinchera irenga
chiechiredio (chisemi chigoakwa, emeroberio y’echisetiraiti, na emeroberio y’echiredio) ere ase
embeo ange nase tore bono iga, naende nonye nabo tokonyara koyerora, koyeigwa, gose
koyekuna nonye nake? Naki obomanyi obo boratokonye korora ekeene kiebinto binde ebio
totanyare korora, buna abamalaika?
2. Nase ki ere egento kiengecho komanya ekeene ki’obosibore bw’okogania na obwogochora kwa
mwanyabanto, nonye Nyasae kare igoro ase ebinto ebio? Nonye ebirengereio ebi (obosibore
bwa mwanyabanto bw’ogochora, obonene bwa Nyasae) nigo bikororekana bigotwomana, bionsi
nkwegerigwa bire ase Bibilia, ase igo naki torabibwatanie?

Eleseni 7 Feb 7-13
GOKOORA CHISEGI
Esabato Mobaso
Egera Echuma Eye: Emereng’anio 17, 1 Kor. 13:5-7, Yohana 8:1-11, Emereng’anio 18, Emereng’anio
19, Okoir. 24:10-22.
Amang’ana Omotwe: “Nigo ere buya konyora ritoronge eriomo ri’obokima na koba n’obotoereu,
kobua kobeera ase enyomba eichire endagera y’omoyega ere n’eriomana.” (Emer. 17:1).
Emereng’anio naende yagikeirie okororekana kw’oborimo. Nabo torarorekane koba na kera egento
ense ekorwa – obotenenku, okobua, omogoko, chinkuma – korende, magega y’ayio chisegi,
okong’usanana, na emechando egendereete gokina. Nabo ekomanyekana ng’a enchera
y’okong’usanana oko na obororo nigo bire obotenenku na omogoko oria abanto bakorwania mono
konyora. Buna omoreng’anio bw’ekemisiri ogoteba: “Mbuya koria omogati na enkoro ere
n’omogoko goetania obotenenku bore n’emechando” – Miriam Lichthaim, “instructions,” Ancient
Egyptian Literature: A book of reading, vol. 11, P. 156. Koreng’ana n’egetabu ki’emereng’anio,
egetambokero egotang’ania gokoora omochando oyo n’okorora ng’a ninki kere ekiengencho ase
tore: oboamate bw’omorembe nigo bore obwengencho enene goetania obotenenku (Emer. 17:1).
Ekere eki’engencho tari okoba n’okonyora okonene, korende intwe ime yaito mbarabi. Obosemia
obo bokobwatia mbotokonye gokerora okogania okwo na botorae gochia aase omorembe oime
(Shalom ase Ekeiberania) ayio oratomentere omogoko oito.
*Egera eleseni Y’echuma eye bweariganie ase Esabato Februari 14.
Rituko 1 Feb 8
Ebibe na Obosani.
Soma Emereng’anio 17:9, 19:11. Ing’ana ki enene egokwanerwa ase ebibungo ebi? Naki torakorere
abande abwo bakogwa?
Ekero omonto akorire okomocha, nabo bagotema korandia omogano oyio, gotebia abanto baande.
“Aye kwaigure egento nyagete akorete?” na toisa koba ng’a mbaria twagechiigwe n’ogokora okwo,
nabo okonyora twanchete gotebia abande igoro y’ekio kiabete. Ase obweng’e, nigo tokogamba, na
ekio nakio togokurerwa, ekiagera embwa eye nigo ararete esegi, nonye n’egati y’abasani baang’e
mono.
Nonye nabo, omosani oo arakora okomocha, mosani ong’encho ki orabe oise goetanana gotebia
abande igoro yaye?
Ribaga erio nigo togosemigwa “gotuba” okomocha okwo. Eye teri, nonye nabo, gotebang’a tobise
ekebe, gokora ng’a ndiria getakoregete, buna ndiria omonto oyio atakorete okomocha. Ebibe biria
bitubire nabo bitigarete kobao, nonye bibisegete. Amaene, ring’ana riekeiberania rionchoire
“gotuba” ase okororekana okwo nabo rikoigweka buna eria “okwabera” (Zaburi 85:2, Neh. 4:5).
Obwanchani, tari okogamba abande, nakwo kogwenerete koba okoiraneria gwaito gochia ase
omonto omochire.
Soma Emereng’anio 17:17 na 1 Abakorinto 13:5-7. Naki obwanchani bogotokonya kogenda
n’amamocho y’omosani?

Omonto tari gwancha omosani gose omogaka gose omong’ina oye ekiagera are omoikeranu. Nigo
tokobancha tari mang’ana nabamochi bare. Ngoetera ase obwanchani bwoka toregere gotagambia
abande, ekiagera ase amamocho na oboremerwa bwaito nabo toranacherwe ekina gi’okomocha.
Ribaga erio, nabo torarere nabarabwo ase engencho ya keria bakorire, na toteme buna toranyare
kobakonya gokoora amamocho. Onye tari bo, inki engencho y’okoba abasani onye tari ase eke?
Rengereia igoro y’engaki gwakorete okomocha okobe mono naende okaberwa, ogakonywa, na
koremigwa. Naki ayio akogotebia igoro ng’a naki, onye gekonyarekana, ogwenerete, gokorera abane
bo?
Rituko 2 Feb 9
Kera Omoronge.
Obwanchani bw’ekeene tibori obouko. Ng’a “totube” amamocho ya omonto onde teri ng’a titorora
ebibe na kobibara koba ebibe. Obwanchani na oboronge nigo bokogenda amo. Ring’ana
ri’ekeiberania rionchoire “oboronge” tsedeq, nigo naende rikoraga “obwanchani,” “obuya.”
Titokoba na maamabebe y’ekeene onye titori abaronge, naende titokoba abaronge onye titobwati
amabebe na obwanchani. Ebinto ebi bibere goika bibere amo.
Omogwekano, ogokorera abataka buya tikogwenereti koira ribaga riaboronge; nigo gekogera
togochikwa titwanchereia abataka ase ebigambero (Okong. 23:3). Onye obwanchani bogotosuguma
gokonya abataka, nigo erabe bobe kobanchereia ekero bare n’amamocho, ng’a ekiagera bare
abataka. Oboronge na ekeene nigo bigwenerete kogenda amo n’obwanchani n’amabebe.
Okoreng’ania oko kw’obong’aini nakwo gokoorokia amachiko, ogochika kwa Nyasae, nakwo
gokwegerigwa na gosegetwa ase egetabu ki’emereng’anio.
Soma Emereng’anio 17:10, 19:25. Naki bigoteba igoro y’okogania kw’ogotogonyerana na
koamereania?
Ekeene ng’a Emereng’anio 17:10 nigo ekoromeng’ana okoboria kw’ogotuba amamocho ase
obwanchani (Emereng’anio 17:9) tikori omobasokano. Ogwatorwa oko “kw’ogotogonyera” amo na
“obwanchani” nigo gokobeka obwanchani ase bogwenerete. Engencho y’ekebungo ekio
n’ogotogonya okonene.
Soma Yohana 8:1-11. Naki tokorora Yeso agokorera ebibe bia maiso marore?
“Ase ogokora kwaye gokwabera omokungu oyo na komosegeta komenya obogima obuya, embwa ya
Yeso nigo ekobara ase obosera bw’oboronge oboikeranu. Noye tari gwanchereia ebibe, nonye
nogokeyia okomocha, tarigetie kogambia, korende gotoria. Ense nigo yarenge komoa omokungu
oyo okomosekerea na komochecheria, korende Yeso nigo agokwana amang’ana y’okoremia na
gosemeria. Oyotari n’ebibe nigo akororera omonyabibe amabera na omoramborera okoboko
gwokomokonya. Ekero abafarisai abeoria barenge komoragereia, Yeso nigo akomotebia, “Genda
tokora ebibe naende!” Ellen G White, The Desire of Ages, P. 462.
Rituko 3 FEB 10
Amang’ana Naende
Soma Emereng’anio 18. Nonye ebirenga ao ao bire aiga, rigereia igoro ya eki egoteba igoro
y’amang’ana aito. Mang’ana ki y’engencho akoorokigwa aiga igoro ya aya togokorerana totari
gokwana?

Naende twaumeranire n’ekeene na okobua kwamang’ana: ase aiga nigo tokorora buya buna abariri
goetera ase emenwa yabo bagwesaria abanyene. Ebibungo 13 nigo bikorwa oborabu obwo. Naki ere
aororo gokwana nonye torategerea na korora eki giakwanirwe gocha ase tore. Nara karenga anga
tweegereete intwe abanyene, amo n’abande, korwa ase obororo botagwenereti n’echisegi onye
ndiria tokwegera korengereia buya keria twaigure nyuma totarairaneria. Chingaki nchire ekero
ogokira gokoba okoiraneria okuya.
Soma Emereng’anio 18:4. Nase ki amag’ana y’omonto omong’aini are buna amache amange?
Ebicha ya “amache amange” nigo ekooroka buya ase egetabu ki’emereng’anio gotenenera
obong’aini (Emer. 20:5). Nigo ekoreta ekerengereio ki’ogokira, korende boigo obogare na
obotenenku. Abang’aini tibari abaigoro bosaigo. Nigo bakorusia amang’ana korwa ase obotambe
bw’okorora kwabo abanyene na obomanyi. Ning’o otana goichanera kero kende ase obogare
bw’ebirengereio na oborori korwa ase baria bare n’obong’aini na obomanyi?
Soma Emereng’anio 18:21. Inki engencho yaye?
Emereng’anio nigo egototebia egento egwenerete ng’a anga ntomanyete: amang’ana aito nigo are
nokobua, naende nabo arabe chinguru ase ogokora amaya gose amabe, nonye n’obogima
namakweri. Naki etogwenerete korenda mono, ase igo, buna togokorera egekorero eke gi’okobua.
Inyora ekero amang’ana omonto gete agosionorete ase enchera y’ogokumia. Ninki aya agwenerete
gokwegeria igoro buna amang’ana are n’okobua okonene? Ninki agwenerete kogosomia igoro buna
agwenerete korenda mono amang’ana agokwana?
Rituko 4 Feb 11
Chinsemo ibere gochia ase Omogano.
Soma Emereng’anio 18:2. Ninki gekogera abanto abariri bataganetie koira chingaki kagacha
ebirengereio biabo?
Abanto abariri nigo beremetie barabwo abanyene na bare n’amaiga y’okworokia ebirengereio biabo
abanyene ng’a tibari n’okogania gokwegera korwa ase abanto bande. Ebirengereio biabo bisiekire
nigo bikogenda n’emenwa yabo eigoire. Ebi n’ebinto biamakweri. Naki n’etogwenerete korenda ng’a
titonyorekana togokora boigo naintwe, mono ase eng’ana eria tomanyete ng’a mbuya tore.
Nonye naboigo, titwanya kwenyora ase eng’ana gete tokweigwa tore nechinguru mono ase eng’ana
eyio na omoerio, twenyora ng’a mbobe tore? Eye teri koraga ng’a titworokia okogania gwaito ase
oborori bwaito; nigo ekworokia ng’a ntoganeirie koba abakanyeku, ekiagera onde oito taiyo
omanyete kera egento, naende nonye n’ekero okoiraneria gwaito kore okuya, ekeene ara aange
nigo kere ekegare na ekiogwatananeka okonene ekio taranche na komanya.
Soma Emereng’anio 18:17. Ing’ana ki y’engencho tokoegwa aiga?
Nyasae bweka nere otaganetie korigia ekerengereio gia kabere, ee ekiagera ere buna are nigo are
nakio, ekiagera amaiso aye are kera aase (Emereng’anio 15). Nyasae nare n’okobua gw’okorora kera
ensemo y’egento. Intwe, ase okoreng’ania, nigo tore nokorora okweng’e gwa kera egento; okorora
okwo kogenderete koba ogoke mono ekero togosiekerwa ase ensemo gete, mono ase amang’ana
aria togokagera koba ayengencho enene.

Eeseni_Y_(Autosaved).docx

Recommended

Recommended

More Related Content

More from ssuserd6f082

More from ssuserd6f082 (20)

Eeseni_Y_(Autosaved).docx