1. comisión executiva nacional
sindicato nacional de comisións obreiras de galicia
Circular n.º 1: Plataforma «Galicia con Garzón»
A especial gravidade do que está acontecendo co xuíz Garzón, relacionado co contido
esencial da democracia en España, obríganos a pronunciarnos ao respecto, porque afecta á
loita antifranquista e á memoria histórica dunha parte, e á persecución e castigo da
corrupción doutra. Ningún poder está libre de control nunha sociedade democrática:
tampouco a Sala do Penal do Tribunal Supremo nin o Consello Xeral do Poder Xudicial.
Considerar que un xuíz comete delito de prevaricación porque se disente do seu criterio
xurídico, que está motivado e fundado, compromete gravemente o Estado de dereito e a
independencia do poder xudicial. A persecución do xuíz Garzón cuestiona a
consideración da Xustiza na sociedade española, e tamén no ámbito internacional.
Dende o Sindicato Nacional de CC OO de Galicia queremos manifestar publicamente a
nosa solidariedade nestas horas co xuíz Garzón e o recoñecemento da súa traxectoria
exemplar de defensa dos dereitos humanos. Por iso dende CC OO nos sumamos á
plataforma «Galicia con Garzón», formada por numerosas entidades da sociedade civil
galega, sindicatos, fundacións, organizacións pacifistas, de loita contra o narcotráfico, así
como personalidades da vida cultural galega.
A Plataforma «Galicia con Garzón e coas vítimas do franquismo», convoca a toda a
cidadanía de Galicia a unha concentración diante do Tribunal de Xustiza de Galicia
na Coruña, o vindeiro día 21 de abril, mércores, ás 19:30 horas, para manifestar o
apoio e a solidariedade co xuíz Baltasar Garzón, que ao día seguinte podería ser apartado
da carreira xudicial
Santiago de Compostela, 13 de abril de 2010
Sindicato Nacional de CC OO de Galicia