1. Kin-balla
Kin-Balla kirol kooperatibo bat da, Mario Demers Gorputz Hezkuntzako irakasleak sortua, 1986an,
Quebec-en (Kanada), helburu honekin: osasuna, kooperazioa, talde-lana eta kiroltasuna
bultzatzea.
Zelai karratu batean (20 m x 20 m), lau jokalariz osatutako hiru taldek –gehienetan, mistoak– baloi
erraldoi (1,22 m-ko diametroa) baina oso arin (1 kg, g.g.b.) batekin jokatzen dute. Jokoaren
oinarrizko estrategia baloia botatzea eta jasotzea da. Partida hasteko, taldeko hiru jokalarik eusten
diote baloiari eta laugarrenak egiten du sakea; beste talde batekoek jaso egin behar dute baloia.
Jokalari guztiek hartzen dute parte jokaldi guztietan, sakea egiten nahiz baloia jasotzen.
Puntuazio-sistema ezohikoa izanik, bermatuta dago talde guztiek lortuko dituztela puntuak: batek
falta egiten duenean, beste biek puntuatu egiten dute.
Nazioarteko Kin-Ball federazioak 3,8 milioi jokalari ditu, gehienak Kanada, AEB, Japonia, Belgika,
Frantzia, Suitza, Danimarka, Espainia, Alemania eta Malasia herrialdeetan.
Lantzen diren balioak
• Hezkidetza: neska-mutilek elkarrekin jokatzen dute.
• Aniztasunaren trataera: teknika sinplea da, eskuratzen erraza –trebetasun maila
gorabehera– edonorentzat.
• Integrazioa eta autoestimua: premia bereziak dituzten ikasleek edo trebezia handia ez
dutenek ere parte hartzeko aukera dutenez, guztiak sentitzen dira taldekide.
• Lankidetza: beste kirol batzuetako indibidualismoa baztertuta, talde-lana indartzen du.
