Skilgreiningin á hugtakinu heilbrigði er nokkuð flókin og á sér margar hliðar. Ein þekktasta alþjóðlega skilgreiningin á heilgbrigði er komin frá Alþjóða-heilbrigðisstofnuninni (WHO, 2009 ) og felst ekki bara í því að vera laus við sjúkdóma heldur einnig í fullkominni líkamlegri, andlegri og félagslegri vellíðan. Þessi skilgreining hefur verið gagnrýnd í gegnum tíðina þar sem fáir geti talist heilbrigðir samkvæmt henni. Ýmsir fræðimenn hafa bætt við skilgreininguna og lagt t.a.m áherslu á margþættan veruleika heilbrigðis sem hafi ýmsar hliðar eins og líkamlega-, huglæga-, félagslega-, þjóðfélagslega-, tilfinningalega-, trúarlega- og andlega hlið. Þar hafa þættir eins og erfðir og umhverfi mikil áhrif ( Hrefna Kristmannsdóttir og Sigríður Halldórsdóttir, 2008). Er ég skoða hugtakið út frá líkamlegri, félagslegri og andlegri hlið þá koma þættir eins og hreyfing, mataræði, svefn, hreinlæti, líðan, sjálfsmynd, verkir, vinir og félagsskapur m.a. upp í hugann. Ég tel skilgreiningu hugtaksins felast í upplifun og huglægu mati hvers og eins sem markast af þáttum eins og menningu, gildismati, fjárhagsstöðu, siðum, venjum, reynslu. ofl.