2. Ակվարիում Գոնե մեկը լիներ` ջուրը փոխեր Ասացեք խնդրեմ, ինչքան կարելի է մեզ պատմել, որ ինչ-որ մի ֆիլտրով հերթական անգամ անցած ջուրն ամենաթարմն է, իդեալական որակի և առանց վնասակար խառնուրդների: Կա մեկը, որին բախտ է վիճակվել իր սեփական աչքերով տեսել այդ առասպելական ֆիլտրը: Գուցե այն վաղուց արդեն խցանվել է և ընդհանրապես չի աշխատում: Իսկ գուցե այն երբեք չի էլ եղել: Ենթադրություններմիայն ենթադրություններ: Ստիպված ենք հավատալ ուրիշի ասածին, իսկ այնքա~ն հաճելի կլիներ գոնե մեկ անգամ, գոնե դռան նեղլիկ ճեղքից նայել, թե ինչպես է այդ ֆիլտրն աշխատում: Ես մեր ակվարիումում էլ տեղ չեմ թողել, բոլոր ծակուծուկերն ուսումնասիրել եմ` որևէ ֆիլտրի գոյության հետք էլ չկա: Իսկ գուցե այն ակվարիումում չէ, իսկ ամբողջ ջուրը ֆիլտրվում է մեր` հասարակ մահկանացուներիս, աչքից հեռու մի ինչ-որ անհասանելի տեղում:
3. Ինչ կարող ես տեսնել այստեղից` 6x5 չափի բանկայից: Հա, իհարկե, ինչպես քաղաքակիրթ համարվելու հավակնություն ունեցող ցանկցած ակվարիումում, մեզ մոտ էլ ապակիները թափանցիկ են: Միայն մի բան պարզ չէ. դրանք ոնց որ թե ուռուցիկ են կամ էլ հակառակը, համենայն դեպս կասկածներ կան, որ այստեղից ամեն ինչ բոլորովին այնպես չի երևում է, ինչպես իրականում է: Դե լավ կարևոր չէ: Ես ոնց որ թե ջրից էի խոսում: Ուրեմն այսպես. մեր ջուրն արդեն քանի տարի է չեն փոխել: Նույն պղտոր ջուրն է, նույն տիղմը, որն, ինչպես ինձ տեղեկացրեց կրթված մի քարթակ, նույն այդ ջրի կանաչակալելու պարզ արդյունքն է: Իսկ կանաչակալման մեջ, թույլ տվեք ասել, ոչ մի լավ բան չկա: Չնայած, դա ոչ ոքի չի հուզում: Երևում է, գլուխները խառն է, ժամանակ չունեն Լուրջ-լուրջ գնում-գալիս են` գործերի ու հոգսերի մեջ խրված Իսկ երբ հարցնում ես ախր, ինչով եք այդքան զբաղված, բոլորը մտասույզ խոժոռվում են, խորը հոգոց հանում ու պատասխանում. Ոնց թե, ինչով:
4. Նախապատրաստվում ենք հերթական ֆիլտրացիայի: Ինչի, դու մեր ակվարիումից չես, թե քեզ ժամանակավորապես են այստեղ բնակեցրել: Ու ընդհանրապես, այդ ինչ հիմար հարցեր ես տալիս: Հերթական ֆիլտրացիան մեր մի խոսքով, ամեն ինչն է... Ու հետո, ջուրը դեռ չարիքի կեսն է, բա թթվածնի հարցը Փողրակն, ինչ խոսք, անզեն աչքով երևում է, օրերս նորն էլ անցկացրեցին: Ուրախացել էինք լավ է, չէ, որ քո ակվարիում մեկն էլ չէ` միանգամից երկու փողրակով են օդ հասցնում: Իսկ թե ով է հացնում, որտեղից ու ոնց, ախր, դա ում է հետքրքիր: Կարևորը թթվածին կա:
5. Շնչի ու լողա, ձկնիկ, լող արա: Ես եմ, որ հենց այնպես հանգիստ լողալ չեմ կարողանում, ուզում եմ անպայման փականը գտնել: Ու նորից անհաջողություն: Չգտա: Մեր ակվարիումում ոչ մի փական էլ չկա: Երևում է փականն էլ ուռուցիկ ապակիներից այն կողմ է: Բայց սա էլ քչերին է հուզում Բոլորը` անճաշակ գունազարդված պոչերով գուպիներից սկսած մինչև անտանելիության աստիճանի տափակ սկալյարները, այնպես ինքնագոհ են լողում, ասես շնաձուկ լինեն: Երեևի, տեղյակ չեն, որ դեկորատիվ են. Ու այդպես լողում են իրենց համար, քանի դեռ օդը փողրակներով տեղ է հասնում, փականները բաց են, կափարիչը պինդ-պինդ չեն ծածկել ու ինչ-որ մեկն էլ ժամանակ առ ժամանակ վերևից մի պտղունց կեր է գցում: Լողում են ու անդադար ճառում համաշխարհային օվկիանոսի հրաշալիքների մասին
