1. Exmo. Concello de Padrón
CIF.: P150660-D
Rúa Longa 27
15900 - Padrón (A Coruña)
www.concellodepadron.es
Tfno: 981810451 -Fax: 981811550
NOTA DE PRENSA
Padrón contará cun técnico para colaborar nas tarefas protocolarias e a
relación cos medios de comunicación
O Concello e a Escola Internacional de Protocolo asinaron un convenio co que a
administración local busca protocolizar axeitadamente os eventos que organiza ou dos
que é partícipe, ao mesmo tempo que axilizar o contacto cos medios de comunicación
Padrón, martes 24 de abril de 2012. O concello de Padrón non conta actualmente cun
gabinete profesionalizado que se encargue das tarefas protocolarias e da debida e fluída
relación cos medios de comunicación. Deste xeito, ditas labores son asumidas
directamente por persoal político, cos inconvenientes que isto reviste ao ser ao mesmo
tempo partícipes e organizadores dos actos e eventos. Considerando que Padrón é un
concello con suficiente entidade como para ter regulamentados determinados aspectos
protocolarios e para ter unha relación seria cos medios de comunicación, dende o
concello establécese un convenio de colaboración coa Escola Internacional de
Protocolo, totalmente gratuíto para a administración local e por unha duración inicial de
tres meses.
Este convenio permite dispor nas dependencias municipais dun técnico en protocolo, que
colaborará na realización destas tarefas, axustándose a parámetros protocolarios
obxectivamente establecidos. Todo isto, contando co asesoramento profesional desta
prestixiosa entidade con sede na nosa comunicade en Coruña. Na actividade política
deste concello existen numerosos actos que se realizan ano tras ano seguindo criterios
baseados unicamente nos costumes e tradicións sen ter en conta que nos actos de
carácter oficial existen unhas normas protocolarias establecidas por lei, decretos e
disposicións. De igual xeito, existen múltiples actos de carácter non estritamente oficial,
pero no que se conta con presenza de autoridades, debendo atender a diversas cuestións
formais que o persoal político que integra as corporacións debe coñecer.
O mesmo acontece co departamento de prensa. No concello non existe un gabinete como
tal que actúe como referente cos medios de comunicación, carecendo polo tanto de
dosieres de prensa, bases de datos de medios, regulación axeitada da información
institucional nas redes sociais e demais tarefas asumidas por estes organismos. Dispor
deste material, con continuidade no tempo, suporá ademais para posteriores corporacións
a posibilidade de ter un referente histórico da actividade política, cultural e social da súa
vila. Así, con este convenio preténdese regular todas estas cuestións de xeito obxectivo,
atendendo non a criterios políticos senón en base a coñecementos profesionais en
materia protocolaria e comunicativa.

2. Exmo. Concello de Padrón
CIF.: P150660-D
Rúa Longa 27
15900 - Padrón (A Coruña)
www.concellodepadron.es
Tfno: 981810451 -Fax: 981811550
¿Que é a EIP?
A Escola Internacional de Protocolo é, ademais dun centro de formación, unha entidade
de carácter privado, dirixida por un grupo de recoñecidos especialistas no eido do
Protocolo, integrada por unha rede de centros con sedes en: Madrid, Barcelona, Valencia,
Granada, Asturias, Elche, Valladolid, Palma de Mallorca, A Coruña, Tenerife, Budapest,
Bos Aires e Paraguai. Consolidouse como primeiro centro mundial especializado na
formación en Protocolo, Relacións Institucionais e Xestión de Eventos. Conta con: Centro
de Investigación, Centro de Datos, Servizo de Publicacións,Biblioteca especializada,
Servizo de Asesoramento ás Institucións públicas e privadas e Medio de comunicación
especializado no sector de Protocolo e Eventos. É tamén a organizadora dos principais
eventos internacionais de Protocolo: Congreso Internacional de Protocolo e Premio
Internacional de Protocolo
Saúdos
Prensa : 673 656 163