Biografía Lázaro Condo

1. LÁZARO CONDO
KISHPIRINATA YUYASHPA APUK RUNA
Ajospamba ayllullakta, allpamanta wiñayta makanakuk runakunapak ayllullaktapimi
Lázaro Condo wacharin.
Waranka iskun patsak kanchis chunka kimsa wata, wayru killapimi Reforma Agraria
kamachik willarirka General Rodríguez Lara apuk kak pachapi. Mana alli pukuk
allpakunata runakunapak rakinkapa, mana tarpunkapa allpakunata charishkamanta.
Lázaro Condo runami Chimborazo markapi runakunapak hayñikunamanta makanakuyta
hatarichirka.
Paymi karka runa wamrakunapak tantanakuypi yanapak. Mons. Leonidas Proaño
yanapaywan, hatun allpayukman llamkak runakunamanta makamakuypi churarirkakuna.

2. Tantanakuypa chunka chusku apukkuna, runakunapak hayñikunata willak kallarirkakuna.
Imapish runakunaman pakta pakta rurarichun, pimanpish pakta pakta kachun munashpa.
Progresista Apunchikwasi nishka shina. Kimsa puncha manakashpaka chusku
punchatami purik karkakuna karupi sakirik ayllullaktakunaman chayankakaman. Ña
mana amukunapa wakllichishka kawsana kanchikchu nishpa willakarayku. Shinallatak
allpakunapish llamkakkunapakmi kan nishpa.
Kuski killa ishkay chunka sukta puncha, waranka iskun patsak kanchis chunka chusku
watapi. Awkakancha, chapakkuna, runakunawan, shuk pantariy waktanakuypi Lázaro
Condo wañushkashi.
Shinapish chay samayka shukkunaman kawsayta kunkapakmi kurirka. Tukuy runakuna
kushka tatkikunapimi kunanka kan. Maski tukuykuna mana riksikpipish, paypak
samayka kunanka punchanta ñukanchikwanmi kan, runakunapak sinchita ritiy katiy
waktanakuykunapi.
Chunchi kitipa (Chimborazo) 30 chinikuta rishpa, rumimanta shuk chakatallami
Toctezinín ayllullakta sallkapi sakirin. Chaymi kan sapalla sakirik yuyariy, awkakancha,
chapakkuna, ayllullakta runakunawan chapushka waktanakuypi maypimi wañurka.
Ayllullakta runakunaka Instituto Ecuatoriano de Reforma Agrariapak nishkata
rurarichunmi mañarkakuna, allpata runakunapak rakichunkuna Toctezinín ayllullakta

3. sallpapi, kay ayllullaktaka mamakuchamanta 3300 tatkikuna hawamanmi sakirin,
Chimborazo markapak Chunchi kitipi.
Hatun allpayukka kay allpakunata mana kunata munarkachu, chaymantami kuski killa 25
- 26 punchapi Almidon Pucarapa hatun allpakunapi chay llaktapi wiñashka runakunaka
siwara killpashkata pallay kallarirkakuna.
Kuski killa ishkay chunka pichka puncha murukunata pallay kallari pachapi, mana nima
llakikunamanta willay usharirkachu, shinapish ishkay chunka sukta punchataka ñapish
marukunata pallanata tukuchikrikukpika. Awkakancha, chapakkancha chayarkakunami
allpakunata runakunamanta chaskinkapa, Chay pachami runakunata wañuchik
antakunawan tukyachiy kallarirkakuna. Shinami chay waktanakuypi Lázaro Condo
wamra runaka kawsayta chinkarka.
Kay waktanakuyta maykan rikuk runakunaka Lázaro Condo runataka wañuchikantawan
chakikunapimi wakllichishka kashka nin, kipaka paypak ukkupa chukrikunawan
awkakancha waktashka, sirik sirikta aysashkashi kashka.
Paypak wañuytaka haykapi mana taripanakurkachu, ashtawanpish 43 watapika pipish
mana chay llaki hawamantaka tapurinakurkaschu; shina kashpapish payka
waktanakuykunapi runakunapak allpakunamanta makanakuk hatun apuk yuyarishkami
kan. Paypak chay yawarka tallirishkashpapish allpa ukupi kawsayta kuk yaku shinami
kan. Hatun amukunata, apukkunata imatapish tapushpa chay kaparik shimimi kan.
Chaymantami mana manchashpa shimita charinkapak samay shamun.

4. Kay waktanakuyta yachak maykan mashikunaka, llaktatapura maykan shuk runallatami
amukunaman, chapakkunaman willashkanka ninkunami. Shinashpami wiñayta yuyay
paskashka kana kanchik, wiñaykawsaypika hatun pushak apukkunaka
ñukanchikpuramanta maykanllatakmi willanakushkakuna; chay runakunaka yapasampa
ima yuyaytapish kullkimanta, mana kashpaka llamkaypi alli kanamanta amukunaman
katurishkakuna.
Maykan yachakkunamantaka yacharinmi inti punchami wañushkapa Pachakamakmanta
yachana kallari pachaka Mons. Leonidas Proaño nirkami: ¡Lázaro, hatariy puriypish!
Chaymanta pachami Lázaro Condo ñukanchik kawsaymanta, Pachamamamanta
waktanakuykunapi ñukanchikwan pakta purin.
Mishu shimiman tikrachik: Segundo Heriberto Chimborazo Zhau.
Cañari-Pueblo Kichwa Cañari-Chinchaysuyu