1. Festival de Nadal 2012
Como unha verdadeira tradición recuperada neste centro, o Festival de Nadal rexurdiu
en data de 21 de decembro de 2012 con gran forza, esmero e preparación por parte dos seus
vinculados. Despois dunha tarde de xoves preparando escenario e demais ornamentos, a
calidade do Festival de Nadal do C.P.I. “Virxe da Cela” superou as expectativas.
Un longo programa de actuacións presentado por Lucía Otero e Daniel Vázquez fixo
deste un evento dinámico e sorprendente, pois houbo na súa maioría, moitas e dispares
felicitacións de Nadal e Aninovo 2013. É de boa fe recoñecer o traballo de tódolos grupos que
actuaron, pero acentuando actuacións como a de 6º de Primaria ou a de alumnas de 1º e 2º da
ESO que cantaron.
Entre tódalas actuacións, vímolas tradicionais, coma o Belén vivente interpretado por
alumnado do 1º ciclo de E.P. e outras que se viran con anterioridade pero que foron recuperadas
dende xa hai anos polo alumnado do 2º ciclo de E.P., que recitou unha poesía (3º) e narrou un
conto de Nadal (4º) rematado con atentos agradecementos e recoñecementos.
A orixinalidade marcárona nesta ocasión os de 5º, cun espectáculo visual con caixas que
amosou unha estampa. Falamos de tradición, orixinalidade ... Pero como xa dixemos antes, a
sorpresa foi marcada por 6º de E.P. coa súa combinación da panxoliña galega e do “Gangam
Style”, cunhas coreografías traballadas e moi ben exhibidas ó público.
Tamén temos que facer mención do mérito dos máis pequenos, que subiron ó escenario
a demostrarnos as súas dotes de canto, pero que realmente foron vehementes á hora de dárllelas
cartas aos Reis Magos de Oriente para cumprir os seus desexos. O señor Papá Noel, que visitou
a escola do Xestal o día anterior, durante o marabilloso xantar de Nadal que nos prepararon os
nosos cociñeiros; este home das nevadas terras do Norte é estimado mais, por así dicilo, os
cativos de Irixoa e Monfero téñenlle máis fe e respecto ós Reis Magos, que como son tres,
sempre veñen máis cargados.
As derradeiras actuacións fixeron pequeno o escenario, pero así mostrouse a calidade do
mesmo, que soportou o peso de toda a ESO sobre os seus alicerces. Un fermoso canto en
francés cun solo interpretado pola voz da nosa presentadora, Lucía Otero, e unha actuación
instrumental da moi coñecida “Jingle Bells” pecharon as actuacións.
Antes da despedida elaborada por Lucía Bouzón e Sandra, de 4º ESO, tivo lugar a
entrega de premios do Concurso de Postais de Nadal e do Certame Literario; ámbolos dous
concursos realizados anualmente e con premios entregados nestas datas. Despois da visita dos
Reis Magos, alumnos/as de toda a ESO recollémolo salón de actos.
Cumprimos a tradición un ano máis e expresamos na nosa maioría a intención e vontade
de que continúe coa mesma regularidade durante toda a historia deste colexio.
REVISTA XESTEIRA 2012/13
Antonio González López ---- Mércores, 26 de decembro de 2012.