1. NON CHORES, MULLER
Ev'rything's gonna be alright.
No woman, no cry.
No, no woman, no woman, no cry.
Bob Marley, "No woman, no cry"
Non chores, muller.
Eu viaxo dos ollos
á túa dor azul.
Non chores, muller.
O teu pranto é
o comezo do pánico.
E eu só son sal
para as túas augas.
Non chores, muller.
Eu son o ronsel
que rega a túa cara
afogando amor
no pozo sen fondo
das pingas celestes.
Non chores, muller.
Somos nada e ninguén
despois de toda a vida
xuntos nunha noite.
Xa verás como todo irá ben.
Xa verás como todo irá mal.
Xa verás como todo irá ou non irá.
Pero ti serás sempre o froito
da flor das páxinas brancas.
Non chores, muller.
Teño medo de min
ou de ser eu
por ti.