1. MERCADILLO DE NADAL “COMERCIO XUSTO”
Achégase o Nadal, e nestas datas tan especiais queremos agasallar aos nosos familiares e seres
queridos con múltiples regalos para expresar o noso cariño. Mais ás veces este xesto tan xeneroso
convértese nun acto de puro consumismo… Este ano, e da man da ONG Solidariedade Internacional
Galicia (coa cal xa levamos colaborando un tempo) trocaremos de hábitos e mercar regalos axudaranos
a reflexionar sobre o consumo responsable e o comercio xusto.
O comercio xusto é un sistema comercial solidario e alternativo que ten por obxectivo mellorar
o acceso ao mercado dos produtores máis desfavorecidos e cambiar as inxustas regras do comercio
internacional, que consolidan a pobreza e a desigualdade mundial. É, ademais, un movemento
internacional formado por organizadores de todo o mundo.
Se vos queredes, pois, unir a este movemento, non deixedes de visitar o CPI Virxe da Cela, que
albergará durante a semana do 14 ao 18 de decembro un “stand” de comercio xusto. Aquí poderedes
mercar artesanía, café, chocolate, xabóns e outros moitos atractivos produtos de calidade e poder facer
os típicos regalos de Nadal.