2. Virelay:
MI-HLEMHLE
Thiang leh thiang lo a dáwn lo va,
Mawi leh mawi lo a thlei lo va,
Dik leh dik lo a thlu hek lo.
A hatna tùr a hâi hreh lo,
Mi’n tuar mah se a pawi ti lo,
A hlâwkna tùr a nih phawt chuan.
A thawk rim, a lang a pâu chuan,
Chhûngril lamah erawh chuan
Lungpal hnawih var iang a lo ni.
Awlsam taka hmuh a tum si,
Nawm a thlahlel a, a buai ru si,
Neih euh tumin kawng a insiam.
Duhâmna tinrêngin a bàwm,
Dâwtin a fawm tangka rosum,
A chhep relh a, a thai bo daih.
Chatuan khua a lo vàr hunah,
Sulhnu laihlan a nih hunah,
Engkim a la lang dáwn e.
Leiah nuamsain léng mah se,
Hrem lohin chhuak rih mah se,
Vânah erawh a pumpelh lo’ng.
He hla hi August 24, 2007 Zing dar 1 : 46 A.M.-a ka phuah
a ni a, French Verses form chi khat ‘Virelay’ an tih ang chi-a phuah
a ni a; rhyme scheme hi aab, bbc, ccd......a ni.
3. Villanelle:
A REM LO LUL MAW?
A rem lul lo maw nang nên lên dun?
Min nghilh bîk suh aw Lungrunpui,
A na lua e rairah riang vál tán.
A biak ka sual em ni Vála hian?
Nge ka lo zuam sual che em ni?
A rem lul lo maw nang nên lên dun?
ThinlaiahihluiloNgaihlungrun
Khua tuah loh dî ka tawng che’m ni?
A na lua e rairah riang vál tán.
I dáwn ve lo em ni Ngaihlungrun?
Nang ngaia ka ah khua sei tùr hi;
A rem lul lo maw nang nên lên dun?
I zun phurh kian ni awm si lo hian,
Mi tàwna pár ang i vul tùr hi;
A na lua e rairah riang vál tán
Lengdang tàwna khiangawi mai tùr chuan
Ka phal lul lo che Lénghermawi
A rem lul lo maw nang nên lên dun?
A na lua e rairah riang vál tán.
He hla hi August 24, 2007 Zing dar 2: 37 A.M.-a ka phuah
a ni a, French Verses form chi khat ‘Villanelle’ an tih ang chi-a
phuah a ni a; chain verse an ti bawk hin. Rhyme scheme hi aba,
aba, aba, aba,aba, abab a ni. Chang 1-na, tlar 1-na hi tlar 6-na,
tlar 12-na leh tlar 18-na-ah hman nawn a ni a; Chang 1-na, tlar 3-
na hi tlar 9-na, tlar 15-na leh tlar 19-na-ah hman nawn a ni bawk.
4. Altar Poem
KRAWS
Mi sual thi tùr
Anchhedawng te,
Tawpna hmun tur,
Khaikanna hmun.
Sual nei lo Lal,
Van la fa pawh
Khenbehna chu,
A l o n i e .
Hringmi ânchhedawng thlafam khua lawina lamtluang,
Ka Lal Riangvai thlafam a channa hmun ngei chu;
Chu thing, thing ânchhedawng, kan tána hlu tak mai chu,
Kan tán inenfiahna dárthlalang a lo ni e.
A va hlu êm!
Hringmi tán hian;
Sual nung tlâk lo
Chhandamna chu.
Hringmi zawng tán,
Hmangaih vànga
Isuan kan tán
A tuarna chu.
He hla hi August 14, 2007 Zing dar 1: 10 A.M.-a ka phuah a ni a,
Altar Poem an tih ang chi, phuah chhan hmelhmang anga hla thu
rem khawm a ni.
5. ZORAM HUN INHER
1. |hál favang romei tláng tin bâwmtu zîng ri riai,
Lung tiléngtu hawihte’n a her chhuak a;
Khua tin chuanin han thlîr vêl teh mah i,
Kan Zoram nuam hlimtea tual kan lênna;
Thing rihnîm leh uahpui leh vâu vul a mawi,
Chhîngmit a tlai ngei e, Pár ang kan lâwm za.
2 . |hál favang kawl êng tùrnî iang a her liam a,
Khua tin hawi vêl i tláng tin ro rep e;
Chungléng va tin erawh pár ang an lâwm za,
Duh tin dáwtin, thing tin, zár tin an bêl e;
Mahse maw léng tin va léng lung lâwmna kha,
Pàrlai a tliak hring hnah thar siam nán maw e.
3 . Hun pui sul angin a lo inher liam zêl a,
Zua tin, vál tin tùk loh ram dai lama’n;
Káwla ni chhuak chhiarin an liam za a,
Chûni leh haléngite’n pâi-em phurin,
Nuihiauvin maw tuahthing an phur an hlim za,
Charlai chhûng zawng âwllai nî awm lo rêng a’n.
4 . Chhumpui a zîng, mal ruah a awn siau tláng sáng a’n,
Fur khaw hnawm a lo inan dáwn meuh chuan;
Khua tin a hnâwng, tuallai lên kan nuam lo,
Sawmfáng lama’n uan zai rél theih chang si lo;
Vala léngi rûnah nilên awl asin,
Tleidang rûna uan leh zai reng rél lote’n.
5 . Kipte’n han dáwn vêl ila, Zoram hun inher,
A mak ngei Siamtu remruat dàn rêng hi;
Hringmi, sa tin, va tin tán a hlu ber,
Zoram hun inher han dáwn vel teh mah i;
Siamtu lung fing duan dàn a lungawi thlâk ber,
Mahse, hena’n suihlunglêntu a chang si.
____________________________________________________________________________________________________________________________________
He hla hi ni 21.01.1998-a kan khua (Zawngin)-a
ka phuah a ni. Rhyme scheme ababab a ni.
6. ZAWLTLING VAWN NAT
A khi thangvan sangah len ka nuam.
AWmhar nau ang ka ah ni chuan;
Bang mahna e ka di ngaih lunglen
CHhailai di lung min hnemtu ka tawng mahna e
Dardawn i zun ngaih a sei lua,
Endi chim loh chhawl ang ka uai chhun ni tinin,
Fam theih chang se suihlungleng hian ka fam awm e.
Gehenna hmun thleng rawk pawhin.
NGha ang an leng siau zaleng dangte
Hawi vel ila, vangkhua an mawi;
I sakhmel tawn tur reng a awm si lo,
Jeriko kulh hual chep chhunga awm ang maiin
Ka tham vel e mahte’n vangkhaw sum tualah
Laimi zingah ka riang hluan / chuang e
Min theihpui lo ve, dawn lungruk chinlai lengten,
Nau ang nuih ni reng ka tawng lo, ka vai lua e
O !! Ka di lenna tlang a dang si,
Par ang lawm laini ka dawnkir a;
Rial tui ang a ral suihlung a leng thlawn e.
Sul ang hawi ka nuam i liamna lamtluang a’n
Tawng mahna i sakhmel sensiar;
|ahlai bang vein i anglaia bei ka nuam,
Uaipui zawng a na e, i zun ngaih, lungrunpui;
Van ruai ruaiin zatlang rel reng ka dawn zo lo
Zawltling vawn nat zawng kei ka tan a na ngei e.
He hla hi ni 21.12.1997-a Electric Veng-a in ka luah laia ka
phuah a ni. Hla tlar bul zel hi saphovin ABC/Absey/Abecedarius
an tih angin ka’n dah ve ’ngawt a! Mi thiam zawkten engtin
ngai ve ang maw?
7. Shakespearan Sonnet
DI NGAIH LUNGLEN
Ka hawi vêl a, tláng tin, mual tin hrûtin,
Chhîngmit lênin ka zawng ruai che asin;
Tùrnipui her chhuak ang maw nang tawn nán,
Ka nghâkhlel êm e nang nên hlimtea lên dun.
Nghilhni ka nei lo i sakhmélmawi kha,
Lunglawm a kim thei lo, i tel lo chuan;
Thinlaia’n a châm reng i anka nêm kha,
Tawn leh ka nuam ngei i kimtláng mawi hluan.
Hûiva lênthiam ka tîr mai nang che aw,
Thlawkin léng la ka di lênna tlánga’n;
An rûn bêlin biahthu hlân nang che aw,
“I chhailaidi a vâi ruai e,” tiin.
Kan uanna tláng chu lo dang rih mah se,
Tawn leh nghâkin ka tán vul reng ang che.
He hla hi ni 26.8.2007 zing lam dar 12 : 19 A.M.-a
Shakespearan Sonnet zulzuia ka phuah a ni a; rhyme
scheme hi abab,cdcd,efef, gg a ni.
8. DUHTHUSAM
Tu nge maw i lo nih a,
Tu nge i chûn leh zuate?
Khawiah nge i uan hin a,
Khawiah nge i lo awm le?
Min zawng ni la, ka lâwm ang,
Min duh ni la, ka hlim ang;
Nang hi em ni, ka zawn chu,
Nang hi i ni, ka duh chu.
Ka hlân nang che, biahthudi,
Ka nghâk nang e, tiamthudi;
Min hlân ve la, hmangaihna,
Min hrilh ve la, lunglâwmna.
Ka thlang tawh che, nuthai a’n,
Ka thlang ber che, rûnlum a’n;
Rem ve mai la, ka tán hian,
Rem ve ngei se, nang nên hian.
He hla hi ni 26.8.2007 zan dár 11 : 55 P.M.-a
ka phuah a ni a; rhyme scheme hi abab a ni.
9. Free verse
A RUN A DANG IN TÊ
(Kawhalo hla)
1. Ami lengte pisa kaina run in,
Tuk tin chhiarin an liam
Thla lo tharin thawh hlawh an la,
An tan malsawmna lo ni e.
2. Kei zawng pisa ka kaina ve lem hi,
A run a dang : in tê;
Mahte’n ka bel lairil a ná,
Lam ang let chuan laitha a khur
3. A zur zutin vawi sawm pathum lek lek,
Tuk khata’n ka lawi a;
Arva ek tia lek lek a tla
A hnung kharna a phuan berh berh
4. Dawi chi tin reng sakhming hriat ngai loh kha
Flagyl, Tetracycline
Furextion, Sulphaquinadine
ORS, a mum uk ei pawhin
5. Dam ni reng awm si lo laitha a zam
Zopa dawi ráwn zelin
Lungthi, kawlthei zik phak chep chup
Ka hril seng lo : ka kawl ruih mai
6. Ka sakhmel a chul, a ki riam mai maw
Lung reng a awi zo lo
Lamtluang ka zawh khur der derin,
Chhingmit a vai khaw hmuh a thim.
7. Vallai tuar a’n zawng hril tam a mawi lo
Ngai mah ila lanu
Tawn ka zuam lo thinlai a zam
Sepui ruah tuar iang ka inchan /
Laikhum belh nin a har ngei mai
(Ka kawhalo denchhena fiamthu atana ni 10.05.1998 11:30-
P.M.-a Aizawl Venglai-a kan in luaha ka thaikawi mai mai a ni.
10. LAIKHUM
1. Zantlai a lo ni a
Leng tin zalna laikhum
Thlehtenem puan sin a
Zankhaw tlaitluana zan mu chhinna
Zingian bawhar pau chuan
Sam ang hen tir e
Mileng laikhum bel zawngte
2. Awmlai vei leh suihlungleng te’n
Bel zel ta’ng e tiin
An zal e laikhum zawlah;
Par ni an nhgak relthang dawn loten
3. Duatten thlehtenem puan,
Mawi chuang zelin
An rem dim e zingianah;
Rial ang lo dai chhun ni-ah
Awmharsuihlunglengin
Ngaiin au ve tak ang maw e,
Zantlaia bel zawng te.
He hla hi ni 03.10.1997-a Electric Veng-a in ka luah laia ka
phuah a ni.
11. LAIKHUM
1. Khua hal lo niin,
Hnamchem leni tuk loh ram dai;
Kan vat dairial an chang
Val tin, zua tin hnam chem an len
2. Zual zelin khua hal lo hrang
Thlirin tuk loh ram dai
Hring nghial kha maw
A ro rip rep
3. Khua tin a ngur zawng ten
Senmei lenzai relin
Tuahmei an chantir
Parmei chhuan chang zawngin
Khua tin an hlim hin e.
4. Zankhua khat a lo liam
Chun zawng an liam chi leng tuhin
Pai em phurin kawltu an chawi
5. Kang bang lawrin chhungtin an hman hlel
Sakhmel a dang dum nuauin
Bukthlam a awm nem maw
Chungturnipui lo hrang
Siktui thiang dawn zing tlut e.
He hla hi ni 22.10.1997-a Electric Veng-a in ka luah laia ka
phuah a ni.
12. TAWNMANG LUNGMAWL
1. Laikhum thlehte nem ka bel zantlaia’n,
Ka tawnmang lungmawl a’n ka di Thanghniangi
Ka lo tawng asin!
Hai ang hang i lunglam ka vai,
Ka hawi ruai ruai tawnmang lungmawl mai a’n
Ka phal lo, tawnmang a lo chang mai si.
2. Ka dawn, ka dawn kir a maw tawnmang,
Auhkir ruai ka nuam e, theih chang si lo;
Nghilhni a awm lo’ng,
Nghilh thei reng hian ka mawi si lo;
A i emaw suihlung tileng tur reng
Hian maw ka tawn, kohkir theih chang si lo.
____________________________________________________________________________________________________________________________________
He hla hi ni 09.02.1998 Zing dar 8 : 00 A.M-a kan khua
(Zawngin)-a ka phuah a ni. Rhyme scheme abab a ni.
Zan muthilh laia mumang hlimawm tak mai : Mahni
bialnute han hmuh meuh hi chuan a hlimawm thei em em a.
Nimahsela, mumang na na na zawngin awmzia a nei si lo.
Kan han hangharh a, kan mumang chuan min kiansan nghal
a, auhkir tum mah ila, a theih tawh si loh. A chang chuan han
hangharh thut hian a tak emaw tiin kan han hawi ruai ruai
ma; mahse mumang na na na zawng belhchian dawl lo hlimthla
mai a lo ni hin si a. Mang a hat deuh chuan mumang mai
mai atan chuan kan phal lo hin teh zawng a nih hi.
A ngaitein khumah kan let kan let a; a ngai ang chiah
emaw, a chhunzawmna emaw man hat lehte kan chak rum
rum a; mahse a theih si loh. Theihnghilh theih hian kan hre lo
va, kan ngaihtuah veng veng a, lung tilengtu a chang leh mai
si hin.
13. ZANTLAIA’N LENGI RUNAH
1. Tlang sel pawh dawn zo lo reng hian,
Zantlai a’n Lengi runah mahte’n ka lawi;
A sakhmel sensiar ka thlir ning thei lo asin!
Zankhua lo rei mah se Lungrunpui,
Sial ang hawn zai reng rel a har hin,
Hrual hrui ang min phuar lam ang let a har ngei.
2. Mahse maw lunglam ka lo vai
Hun sul ang a liam zel si, zankhua a rei
Nangnena sam ang hen nan maw bawhar lung fing
An lo pau, hen nan kawl a lo eng,
Tlai khua var mah ila nang nen hian
Ka ning lo’ng e nang nena len dun nan chuan.
3. Lam ang ka let, lamtluang a thui,
Zanmu chhin a har ngei i tel lo chuanin;
Dawn a sei, i tel lo chuan zankhua a rei
Varkhua nghakin Vala laikhum a’n
Zan mu chhing loten ka zal reng mai
Engtin ngai ve ang maw e zaleng zawngten.
____________________________________________________________________________________________________________________________________
He hla hi ni 20.01.1998-a kan khua (Zawngin)-a
ka phuah a ni. Rhyme scheme ababab a ni.