Sr. secretario xeral,
O Concello de Ferrol conta desde hai anos cun órgano asesor en materia de política lingüística, o
Consello Municipal da Lingua (CML), que eu teño a honra de presidir. Está composto por 23
membros representantes dos distintos sectores da sociedade ferrolá; é un Consello activo e dinámico
que, na súa función de órgano asesor, está a colaborar actualmente no desenvolvemento e
activación do Plan de normalización lingüística de Ferrol en determinados sectores da sociedade
ferrolá.
O pasado 21 de maio, en sesión ordinaria, o CML acordou por maioría absoluta transmitirlle a
vostede, como secretario xeral de Política Lingüística, a nosa preocupación ante a nova situación da
política lingüística en Galicia, reflectida nas últimas declaracións e accións dos máis altos
representantes da Xunta de Galicia.
A nosa preocupación vén precedida por outras manifestacións como o recente informe da Real
Academia Galega ou o informe do Consello de Europa do pasado ano en que advertía que non se
daban garantías para un uso normal do galego na educación, na xustiza, nos medios de
comunicación ou nos servizos públicos de Galicia.
Os avances no proceso de normalización social do noso idioma nos últimos anos son innegables,
mais están moi lonxe de garantir a plena igualdade social e xurídica do galego e o castelán; moi
lonxe de garantir que en Galicia se poida vivir en galego con normalidade, sen ter que esixir.
Por todo isto, o Consello Municipal da Lingua de Ferrol manifesta o seu rexeitamento á
posibilidade de que se produza a primeira regresión na protección legal da lingua galega, o seu
rexeitamento á situación de conflito que se está a xerar coa nova política lingüística e esixe que
desde a Secretaría Xeral de Política Lingüística se traballe para acadar a igualdade xurídica do
galego e o castelán.
Atentamente,
O presidente
Manuel Santiago Pérez
Ferrol, 8 de xuño de 2009
Don Anxo Lorenzo Suárez
Secretario xeral de política lingüística
Consellería De Educación e O.U.
Xunta de Galicia